V. HRVUASKI KRAJI (ČA)

KRAJ TOMISLAV

816. Kniz Tomislav ki je bošćinil kniza Branimira se je, kada je potukal Bugarskoga cara Samuila zi božju pomoću i pomoću pape ki mu je poslal krunu, okrunil va Hlivnu devetsatdvajset i petoga lita za kraja. Kraj Tomislav je zgradil novo misto. Nazvali su ga Biograd. Potlek su ga nazvali Stolni biograd.

817. Misto je po Rimskon običaju bilo podijeno zi presičnicami, kardu i dekumanu, na četire dili. Va sredini je bila vela ovalna placa, kolo ke su bile državne palače i vela palača na tri podi kadi je stoloval kraj i kadi su bile sve državne hrvnice, čartnice sindiknice i državna badovina. Kale su spajale jednu i drugu presičnicu. Va kalah su bile kuće državnih hrvi, sindiki, badovinci, badrači, kosizi, kosizi velih plovbani, banskoga plovbana i časnici.

818. Orban je jimil velu palaču naprotiv krajeve. Kako je bilo misto udelano posve nanovo, su mu kale i place bile široke i zračne. Zidari su koristili uskušnje rimskih graditeji i dodali još svojega, spominjajuć se gradnje još va staroj domovini, ča su mislili kako je dobro. Puk je pričel najprije prodavat va mistu na placi svoju robu, a ondat su se pomalo pričeli i nastanjivat va mistu. Misto je postajalo sve veće i rabilo je više jizbine, robe i stvari i zato se je više gojilo i delalo. Va mistu se je razvil obrt. Po svuda su bili kovači, postolari, šilci, stolari, jidrari, malendari, kalafati, tkači i konopari. Kolo mista su težaci više kopali i više jimili za prodavat.

819. Cili kraj je procval. Vele dvorane kadi su se zbirali i saborili župani veli, kosizi veli plovbani i drugi inpijegati, su bile lipo urešena zi duborezi i slikami. Risari i duboresci su prišli zi tujih kraji i zi domaćimi delali lipo i složno. Va sredini je bil dlgi stol i kolo njega šedije. Kolo zida su istešo bile poredane šedije. Na zidih su bile okovki za bakje i mjedene kjini za obisit robu i oružje. Na sredini je visela vela ćoka od mjedi, ku su skovali domaći kovači, zi sto svićnaki. Sviće su se delale od loja i čelinjega voska. Va svakon kantunu su bile, obišene na verugah, vele lončene ujanice ke su jimile deset stinji poredanih va kolu. Po ciloj dvorani se je blišćila svitlost i obsijala i najdaji kutić.

820. Po kantunih su bile, jena ozgora druge, pulene od suvragovih driv ke su Hrvuati zarobili ali važgali i ondat prije leh su zgorele, ji pobrali i prinesli kraju na dar. Na sproti vraton su bile vijore na sulicah ke su bile zaplinjene va bojih. Zi svake bande su bile zarobjene meči, bodeži, bojne sikire i sidra dešvanih brodi.

821. Zgradili su velu crikvu zi visokin zvonikon. Zvoni su naručili va Veji, kadi su jih delali Mikulinovi kovači, ki su zvoni prodavali i po ciloj Taliji. Nutri je crikva bila lipo urešena. Zi Vneci su pripejali dvi prekrasne ćoke od murana zi po trejset svićnjaki svaka. Ćoke su visile zi štuka. Glavni luntar su delali beli fratri va Zadru. Čudo lipih slik ke su kazale Isusovo živjenje su udelali meštri zi Kastva. Put križa, ki je bil jako lipo ocvitan, je narisal meštar Stipan zi Trogira. Kore va crikvi su bile klajene va četire redi. Livo su bile redi za muških a desno za ženske. Sprida na kolonicah su kječali i sidili dica.

TRPIMIR II

822. Mežnjar je pazil na svih i delal red. Po smrti Tomislava, ki je združil hrvuaske zemje od Drave do mora, je prišal na vlast Trpimir ki je istešo vladal zi tvrdu ruku i držal jaku hrvuasku mornaricu, efuricu i kopnenu vojsku va stalnoj pripravjenosti. Još vavik je držala stara navada kako je svaki struk od šesnajstoga do šesdeset i petoga lita bojovnik i kako svaki struk i struka moraju znat turgat zi strilu, sić zi mečen i jizdit luša. Još se je vavik dicu zarana učilo jizdu i rabi boguna i strile, ma učilo jih se je i naviganju, jidrenju i veslanju, a nikih i čarki.

823. Lita 902. je bil va Splitu veli sabor na kon se je raspravjalo o crikvi va Hrvuati. Prije, dokjek je bil Split i sve veće mista na Jadriji pod vlašću Bizanta, je glavna biškupija va Hrvuati bila Ninska, zi biškupon Grguron na glavi. Sada, kada je kraj Tomislav dobil nazad sve gradi pod svoju jurizdikciju, se je pobunil spliski nadbiškup i otil pod sebe klas i ninsku biškupiju. Tamo su se vodile duge debate i noći i noći su zgubili kako bi poznova sve bilo po staron.

824. Biškup Grgur se je držal tvrdo i va Rimu dokazal kako su njegove bukvice jistešo prave kako i latinske. Patrijarh va Ugleju ga je podprl i tako i ako je ninska biškupija pala pod vlast spliskoga nadbiškupa, služba božja va Hrvuatih se je glagolala na Hrvuaskon zajiku i va crikvah, i ne samo va crikvah se je čarkalo zi glagojicu.

KREŠIMIR

825. Lita. 935., kada je Trpimir drugi umrl, je prišal na njegovo pristoje Krešimir ki je bil istešo dobar i pametan vladar. Mornarica, efurica i kopnena bojnica je va njegovo vrime bila jačan va ton dilu svita. Lita 945. kada je umrl su se za njegovu bašćinu, aš je umrl brez diteta, pričeli mej sobu gložit župani i kosizi. Niko vrime se nisu mogli složit i to je oslabilo mornaricu i kopnenu bojnicu.

826. Za vrime dužda Orseola 996., je on sam, kako poglavar bojnih driv, šal na pohod proti Dalmaciji. Sva bodulska i mista na kiriji su mu odprle vrata i se bez boja predale moćnoj veneškoj floti. Hvar i Korčula se nisu otile predat i jih je Orseolo napal potukal i osvojil. Tako je cila hrvaska obvala prišla pod vlast Veneci. Pod Vneci se je rascvala poznova trgovima mej svimi dili Jadrije i trgovaške brodi zi svih mest pod Vneci su trgovale po cilon Sredozemju.

KREŠIMIR III.

827. Po smrti dužda Orseola, je prišlo va Vnecih do mejsobnih trvenj i njihova moć je pala. To je iskoristil hrvuaski kraj Krešimir treći, ki je poznova zgradil hrvuasku mornaricu, obnovil efuricu i ojačal kopnenu bojnicu. Va njegovo vrime je Bizant poznova pripojil sve mista od Grada pa do Budve pod svoju vlast. Lita 1032. su dubrovaške i hrvaske brodi pomogle Bizanskoj mornarici potlić Arapi ki su poznova pričeli dvizat glavu.

SURONJA

828. Krešimira trećega je po smrti bašćinil 1058. lita, Krešimir četrti koga su zvali Suronja. On je još više ojačal sve rodi bojnice. Zgradil je tvrdi grad Klis i va njen stoloval. Sve turni i kuće je ogradil zi tvrdimi zidinami. Zidine su bile po paš i pol debele i osan paši visoke. Pod zidinami je posikal sve grmi i drva kako jih suvrag nebi mogal rabit ako bi napal grad. Na turnih su vijorale hrvuaske vijore na slebrno črjene kvadrići i kazale svin ki je ovdi gospodar.

829. Va palačah nutri grada su bile vele dvorane zi lipo zrezbarenimi duborezi, slikami i oružjen pobranin zi svih hrvuaskih bojišć. Pod velin turnjen su bile badovine za ke su skrbili badovinci. Za grad je skrbela badračina. Vavik su bili sabori župani, kosizi, plovbani i drugih. Kraj je bil jako ostočan i svaki dan su mu morali poručit kadi je ki brod, zi čin se trguje, ča se dogaja va koj županiji i kadi se ča gradi, kadi je suša i kadi pada daž, ke rike su plovne i kadi su poplave.

830. Teklići i kanići su stalno prihajali i odhajali zi grada. Česta do grada ni bila nikada prazna. Straža je uvik badrela i svi ki su hodili nutar su morali pustit svu armu va stražnicah. Glavar va gradu se je zval orban ali sudac ki je va nenazočnosti kraja prezel sve dužnosti za obranu grada na sebe. Bizant ki je va to vrime bil slab je prepustil sve mista i bodi hrvuaskomu kraju. Va žunih su bili kapi straže, ki su koržali ča se , kadi dogaja i ako je rabilo, mogli su dvignut postrojbu, ka je mogla branit naselje.

831. Sada kada je bila poznova združena sva Hrvuaska, se je bojna i trgovaška mornarica i efurica opomogla. Zi trgovanjen je prišla gospodarska moć. Zgradilo se je čudo kundur, velih i malih ormanic i veslačic. Hrvuaske kosize su bile pripravjene po cilon krajevstvu. Svaki ki je pomislil napas na Hrvuati se je prije tri puti premislil. Hrvuati su živili na svojen svoji i nisu badali za tuje. Popravjalo se je stare kašteli, gradilo nove veće i boje utvrjene. Štanaji su bile posvuda po brigih i va pirikulu se je okolno pučanstvo zatekalo va štanaji. Rasle su žuni i vesi. Gradile su se crikve i samostani.

832. Va Hrvuasku su prišli Benediti, red ki je bil jako napridan i je širil pismenost. Prepišival i čarkal libri, bukve i knjige. Učil je judi sadit voćke, sadit vrduru i gnjojit zemju. Svaki ki je otil se je mogal prit učit va kapitul. Kapituli su bile va Opatiji, Crikvenici, Sepenu, Baški, na Punti, Veji, Glavotoku, Cresu, Lošinju, Rabu, Senju, Zadru, Trogiru, Splitu, Dubrovniku, Kotoru i Budvi. Na Kiriji su bile istešo samostani po svih većih mistih, Sisku, Zagrebu, Varaždini, Koprivnici, Virovitici, Srimskoj Mitrovici, Zemunu, Baču, Banskoj lugi, Krajevoj Sutiski, Brodu i Hlivnu. Čudo mladih judi i divojak je šlo va samostani, bilo kako redovnici, bilo kako laiki. Svi su oni učili i delali.

833. Judi su videć kako se grade kašteli, samostani, crikve i tvrde gradi i sami provali udelat niš slično za živit. Gradili su prostranije, veće i sigurnije kuće. Pokrivali su jih zi pločami od kamika i kupami ke su naučili delat i zi slamu. Gradili su dimjaki kako kuće više nebi bile zadimjene i črne. Odvojili su živo od kuće i udelali mošune i štaje. Va svakon većen selu su bile kovačije, stolarije, tesarije, kolarije i postolarije.

834. Po mistih su bile sve moguće obrti. Po cilon krajevstvu su bile sajmi po kih su hodili trgovci i prodavali svoju robu. Po primorskih gradih i gradićih su bile sajmi ke su trajale i po šetemanu dan. Trgovci su se selili od jenoga sajma na drugoga. Za vrime sajma se ni smelo jimit oružja. Sve oružje se je moralo predat badračen. Dugo va noć se je tancalo pivalo i škercalo. Badrači su čuvali skladišća zi robu. Brodi na kih se je prodavala roba su čuvali sami mornari.

835. Na te sajmi su prihajale brodi zi Vneci, Ćoze, Barija, Brindizija, Sicilije, Genove, Marseja, Španje, Afrike, Bizanta i zi Črnoga mora. Nisu bile ritke i brodi zi Ingleške ke su prišle skrozi Gibraltar i zi Varjag ke bi bile prišle priko rik va Črno more, a od tuda va Jadriju. Kako se je sve moglo prodat i roba je hodila va špac, su judi više delali i više jimili.

836. Od prodane robe se je davalo davak, koga su marno pobirali davčari. Krajeve badovine su bile sve punije. Zi šoldi se more čudo toga. Gradili su još više brodi, ušavršivali obrti i izmišjali sve boje i boje stvari. Po ciloj Hrvuaskoj su se redale turniri i pripetavanja va turganju zi strilu, kopjen i praću. Sve to je jačalo vojsku i sposobnost obrane.

837. Vneci su plaćale davak va državne badovine i za to su mogle nesmetano i lažvano trgovat i pasivat po ishojskoj strani Jadrije, ka je bila i ustala puno boja za plovidbu od zahojne, talijanske bane. Kraj je naredil kako će svakoga ki se bude pačal va veneški brod obisit na jarbul najveće kundure. Krajeva besida je bila zakon. Hrvuaska plemena Kačići, Gušići, Smičiklasi, Cuce, Tugomirići, Babonići, Šubići, Milošići, Nelipići i drugi su poštivali i habali kraja aš su vidili kako je svin svaki dan boje.

ZVANIMIR

838. Normani su 1074 lita osvojili Bari. Va Hrvuati je vladal va to vrime kraj Dmitar Zvanimir. Kako su mu niš prije toga Vnečići osvojili skoro sve primorske mista jih je kraj proval poznova tornat pod svoju vlast. Udružil se je zi Normani proti Vnečićen i Bizanton. Napujski Kraj Giskard je videć brzinu, okretnost i moć hrvuaskih pesim odredil deset ormanic za svoju osobnu pratju. Srčanost, kuraj, virnost zadanoj besidi i poštenje Hrvuati ga je jako oduševilo i zato jin je viroval.

839. Kraj Zvanimir je poslal jaku hrvuasku mornaricu ku je vodil plovban Jakov, a koj se je pridružila i dubrovaška mornarica. Udružena mornarica je jimila priko 150 velih driv i čuda malih, na njoj je bilo više od trejset tisuć bojovnici. Šli su napas i osvojit Drač. Stin bi bili zatvorili put Vnečićen zi Jadrije i Bizantincen nutar va Jadriju.

840. Vnečići su istešo od svojih uhod doznali ča se dogaja i pod kumandu samoga dužda Sivija partili kuntra Draču va dogovoru zi bizantinskin carem Aleksijen. Po dlgoj plovidbi su hitili sidra va plitvoj dragi pali. Dužd Silvijo se je odlučil kako neće čekat Bizantsku mornaricu i sam se je odlučil za napad na združenu flotu. Sve vneške brodi su se mej sobu povezale zi konopi, bok na bok, i tako branile boki svojih galij. Na ta način su mogli više struki lažvat za boj.

841. Bojovnikon i hortatoron ni bilo potriba pazit na galijoti i mogli su se borit kako i svi bojovnici. Va kaštelih i po kuvertah su bili rasporejeni strilci i brodi su jimile ašeri zi kimi su tukli po suvragovih brodih. Dužd Silvijo je ostočno pripravil brodi za boj, ma se ni ufal napas, zadnji čas se je premislil.

842. Normanski kraj Giskard, je, kada je mislil da je najboje, napal Vnečići. Boemund, admiral normanske flote, je zi svu silu navalil na Duždov brod. Normani su već pričeli skakat na Vnečića kada su oni rabeć ašer na dva mista probili Boemundov brod. Brod je pričel prijimat mornicu i se je moral deštakat od duždovoga driva. Va to vrime se je po normanskon brodovju proširil glas kako je Boemund ubijen. Na normanskih brodih je nastala panika.

843. Hrvuati, kada su to vidili, su se potegnuli zi boja i hitili sidra pred Dračen kako ne bi ki probil blokade. Normanske brodi su nato istešo prekinule boj i se zasidrile kraj hrvuaskih. Drugi dan je prijadrila bizantinska eskadra i se pridružila Vnečićen. Po noći su združene eskadre Bizanta i Vneci napali hrvuasko normansku flotu. Bizantinci i Vnečići, kin su Bizantici dali grški oganj, su napadali zi svin ča su jimili. grški oganj ki je posve unišćil Arabsku flotu pred Bizanton, zaradi vele požrtvovnosti normanskih i hrvuaskih mornari ni jimil veloga uspiha.

844. Hrvuaske brodi su bile sve pokrijene zi mokrimi bijačinami i salbunon, grški oganj kada bi bil brizgnul na njih bi bil pričel gorit na bijačinah, ke bi bili mornari brzo hitili more. Tamo kadi je još gorelo bi bili brzo pokrili zi melon. Normani su svoje brodi napol potopili, stin su zgubile brzinu ma su bile delno pod vodu i tako jin oganj ni previše škodil. Jena i druga flota su se potegnule zi boja i šle popravjat svoje brodi. Tako je Drač bil spašen i blokada Otranta ni uspila.

855. Niš kašnje je zi silnu vojsku prišal pred Drač sam Car Aleksije. Robert Giskart je skrcal dil bojni zi driv i jih poslal va boj proti carskin postrojban. Hrvuasko-Normanske postrojbe ke su bile postrojene va kosize su čekale carsku vojsku va ušćacih, na brižinah, sutiskah i kolo potoki i rik, kadi se ni mogla razvit i morala se je borit po tatiki ku su nametnule združene sile. Kada je prišlo do odlučnoga boja, su carske sile bili toliko zmučene, prestrašene i trudne i jako brzo su podlegle. Drač se je još par miseci držal, a ondat se je predal.

BOJ KOD KRFA

856. Lita 1084. su poznova združene mornarice Hrvuati i Normani zi 120 velih brodi i čuda malih, mej kimi su bile strašan pesime ali ormanice, osvojile Krf. Papa, koga je napal nimški cesar Henrik IV, molil je Vikingi neka ga pridu obranit. Normansko Hrvuaska vojska je šla kuntra Rimu i spasila Papu Grgura VII.

857. Kada su uredili stvari va Taliji, su poznova skupa šli kuntra braču Krfu. Tamo su naletili na združenu bizansko-venešku flotu. Prišlo je do strašnega boja. Šli su brod na brod. Grški oganj poznova ni bil jako učinkovit. Sve more je gorelo, brodi su tonule, bojovnici i galijoti su plavali na razbitih kaštelih, veslih i jarbulih, bleli i zapomagali i jedan drugoga i va moru ćapivali za kršćavci.

858. Hrvuaske lade su razbijale boci galij, dromoni i helandij. Ašeri su razbijale kašteli, jarbuli i murade, kosile po kuvertah. Strile zi jene i druge bande su žele svoju žetvu. Guiskard je prvi vidil kako se ne će dobro finit i naredil je svin udruženin drivon neka biže kuntra tumanu. Nad mirišćen je po svuda bil gusti, bilo bili, bilo črni dim ki je pekal oči, sušil usta i dražil kožu.

859. Na širini su se poznova zbrali. Koliko se je to dalo, navigajuć mori, popravili škodu na svojih brodih. Poslali su uhode, na malih veslačicah, ke su koržale kadi je i ča dela, bizansko-veneška mornarica. Guiskard je šal poznova kuntra združenoj floti. Va strašnon naletu je potukal najprvo Bizansko, a ondat i Veneško brodovje. Poznova su gorile more i nebo. Lomile su se ašte, korbe, madiri, jarbuli, baštuni i vesla, pucale su glave, lebra i okraci. Po svih brodih je tekla krv i ocvitala more zi črjenin cviton kolo svih brodi. Mrvih se je, aš su pačili va boju, hitalo priko murade more. Ranjeni su se sami sklanjali tamo kadi nisu pačili bojovnikom.

860. Dužd Silvijo je jedva spasil glavu i bižeć pred hrvuaskimi ormanicami i vikinškimi drakari. Va Vnecih su ga optužili za zgubu, moral je pred sud. Suci su ga pitali ča se je dogodilo zi njihovu dobro armanu i izučenu i jako drago plaćenu flotu. Silvijo je najprije mučal, a ondat je pregovoril. Rekal je: „Časni sude, naše brodi san sam gradil, bil po dnevi i po noći va naših arsenalih i škvarih. Pregjedal svaki madir, korbu, aštu, jarbul, baštun i pilun, čaval, rebatin i pašajicu, opipal svako jadro, flok, konop, konpčić i vijoru i šubito menti zaminjali sve ča ni bilo vajatno,

861. Znal san za svaki dukat koga smo zač potrošili i bil san jako vesel kada san vidil našu flotu ka je blišćila na Slncu. Jidra naših galij su se bilila i na dlgo širila strah našin suvragon. Kada su naše galije plovile kuntra sorinju jih je bilo lipo vidit. Naši mornari, ki su bili na tih brodih su bili bojan ča san jih mogal zbrat. Mislili smo kako se neće nijedan ufat niti nas pogjedat od straha, a kamo napas.

862. Dogodilo se je čisto drugačije leh san mislil. Hrvuati na svojih brzih brodih, ke nismo zalud nazvali pesime, nisu niš badali za naš blišćeći zgjed. Ni jih bilo niš strah naših stroji i naših kuhuri. Zgjedalo je kako samo čekaju naše brodi za se šnjimi ogjedat i jih napas. Prišli su kako šijun zi vedroga neba. Svaka njihova pesima je zela svoju turgu, bubnji su bubnjale sve brže i brže i parale uši. Vesla su sve brže veslala i pesime su ćapale strašnu brivu i kako na vajah je svaka šla zi probojnin hućon na svoju galiju.

863. Pričele su se kršit vesla na naših galijah. Zabijale su svoje arti va boki naših driv. Potezale se van i va škuje ke su bile jako vele je pričela prodirat mornica. Naši kuhuri su škuje provali zaprit zi inceradu. Preškujan brod ki se više ni mogal jako premikat je bil kako stvoren za drugi napad. Brzo je druga pesima zabila svoj art va bok. Va novu bužu je poznova navalila mornica i potopila pol broda. Nato su korbani pesim hitili na naše galije zapajene mujačice zi smolu, ka je cidila i se širila po kuverti. Plamen je ćapal naše murade, jarbuli, kašteli i sve ča je moglo gorit.

864. Goruća smola je cidila na ruke, noge, tula i glave naših galijoti. Naši mornari su provali spasit glave i hitali su se more. Ćapivali su se za daske, pokidane jarbuli, škrinje i deli murad. Strašan dim ki je zi gorućih galij ovijal more i nebo je pekal oči i ognjal dih. Hrvuati su kako djavoli skakali na galije i zi svojimi mači fužinari i težicami ubijali sve ča se je micalo. Kada je bil brod napaden su prvo lažbali galijoti, presikli zi težicu verugu i jih pustili neka tuku i ubijaju svih naših kuhuri.

865. Hrvuati su strašno kurajni, znajdjivi, ustrajni i kada odluče bojevat, se bojuju. Njihov kuraj i njihov bezstrah je takov, kako bi i samoga vraga pitali ognja, kada bi ga trefili.“ Suci su pitali: „Ma ča želite reć kako su naši mornari i kuhuri bili straširiti i nisu se borili?“ „Ne, to nisan otil reć, ma borit se zi takovin suvragon ki nima straha i koga ni briga ako će umrit ali ne, je jako, jako teško.“

866. Suci su se pogjedali i poslali Silvija van. Nakon nikoga vrimena su ga zvali nutar i mu rekli kako će bit kaštigan i zaprt va pržun. Nato su ga badrači ćapali i zeli mej sobu va pržun. Va Pržunu su ga presukli i klali va jenu kamaricu pod krov. Nutri va kamarici je bilo niš malo slame, Vrč zi vodu i jedna vrčina za delat potribu.

867. Na vratih je bil jedan mali fineštrin ki je bil zaprt i kroz koga su stražari gjedali nutar ča dela. Na zidu su bile aneli i veruge zi konabjicami za ruke i noge. Zidi su bile klesane od bračkoga kamika. Pod je bil od zemjanih pločic, a krov od olova pod kin je bila mriža od železa. Na krovu je bila puneštrica duga jenu nogu i široka pol noge, kroz ku je prihajala svitlost i zrak. Na spodnjen delu vrat je bila mala portelica. Na jeno tri noge od poda je bil va zidu varmarić.

868. Kada je prišal va kamaricu je pričel študijat zač je ča. Slamu je klal na kup va jedan kantun i malo pospravil po podu. Vrč zi vodu je klal va ormarić va zidu Va samon kantunu je bila škuja duga i široka tri palci. Ni vidil zač je ta škuja. Misli je na ovo i ono ma ni prišal do zakjučka. Večer su prišli kuštodi i mu klali na ruke i noge konabjice. Slama ku je bil spravil va kantun je bila predugo od mesta kadi se je mogal vežen ses i po noći je sidel i sideć spal na kamiku. Veruge mu nisu dale protegnut se i leć.

869. Po noći je postal žajan, ma ni mogal do vrča zi vodu. Jedva je čekal jutro. Kada su prišli jutrin kuštodi su ga molali. Rekli su mu neka nosi vrčinu va baril. Kad je ćapal vrčinu su ga rinuli i je pol pišake prolil po sebi i po podu. Kuštodi su se smeli i ga tirali do barila. Kada je spraznil vrčinu su ga poznova popejali va kamaricu. Naredili su mu neka očisti pod od pišake. Moral je sve čistit zi rukami aš ni jimil krpe za čistit. Zatvorili su vrata i ga pustili neka čeka. Nakon par ur su mu skrozi škuju na vratih klali jedan hjibčić i nalili va vrč vode.

870. Seda kada je znal kadi mora klas slamu aš drugačije će opeta spat na podu, ju je posložil pod aneli. Vodu je klal zbande i hjibčić kruha na grjak od vrča. Vrčinu je istešo klal blizu slame kako bi mu bila pri ruki po noći. Svako jutro, još na svitlac je moral spraznit vrčinu va baril ki je bil va posebojnoj kamarici. Baril su svakih deset dan po tri pržunjeri na čiverah nosili spraznit more. Prvi put kada su praznili baril nakon ča je bil zatvoren, ga je moral on nosit i svi ki su ga vidili su mu se rugali i smeli. Roba va ku je bil obučen je bila stara, napoštu malo ušpitna i zažirala ga je po pazuhah i mej nogami.

871. Postole ke su jimile drveni poplat su lupale i delale šušur. Na glavi je jimi nikakov stari mornarski klobuk ki je bil na dvih mistih škujav. Kada je pasival pod stržu, su se svi ćapivali za nosi i mu govorili kako je njemu lahko aš jima na glavi propuh i zato ne vonja smrada. Dičina, kih je bilo po kalah i kolo kanali koliko god si otil, su se rugali zi pržunjeri, njin švikali i ukali. Jedva je čekal poznova prit va pržun, ma straži ni bilo fuge i hodili su pomalo, tirajuć tobože onih ki su se rugali zi pržunjeri.

872. Kada je prišal va pržun, ga je čekalo novo presenećenje. Komad kruha koga je bil pustil za drugi dan na grkju od vrča, su kada je prišal, lipo jile dvi debele pantigane. Pantigane su se leno obrnule, ga pogjedale zi svojimi malimi očići i ušle skroz onu skuju od tri palci van. Drugi dan je bil lačan i jedva čekal tretje jutro kada bude poznova ćapal kruh i prominil vodu. Treći dan je prišal jedan od kuštodi i mu rekal kako ćeju mu davat malo više jis ako njegovi to plate.

873. Prnesal mu je malo harte i lapiš i rekal neka piše svojin kako će umrit od glada ako mu nebudu njegovi stražari davali jis više leh je to odrejeno i neka jin plate za jizbinu. Kada je to napisal, se je kuštodo obrnul i brez beside šal van. Čekal je još dvi ure i kada je prišal kruh i kada su mu prominili vodu je brzo sel na slamu i sve pojil. Kroz fineštrin ga je brzo pogjedal kuštodo i šal. Drugi dan je poznova celi dan bil lačan. Kada je treći dan prišal on kuštodo zi kin je govoril i komu je dal buletin za svojih, je kuštodo rekal kako njegovih ni doma i kako jin ni mogal dat buletin i zato ni mogal kupit niš jizbine zanjega.

874. Čekal je poznova dvi ure i nato je dobil hjibčić i jenu ripu. Ov put ga ni pojil leh prepolovil i klal polovicu va ormarić, kadi nisu mogle prit pantigane i mu pojis kruh. Ripu je pojil i bila mu je jako dobra, činelo mu se je kako je boja od svake jabuke, ke je više puti jil na vijajih.

875. Večer je bil lačan i kruh va ormariću ga je dražil, ma samo ga je gjedal i ni ga pojil. Navečer, kada su ga prišli kuštodi vezat zi verugu, je jedan, kako slučajno zaprhnul pol hjibčića i ga hitil po podu. Vežen ga je na sve načini proval potegnut k sebi ma ni uspil. Zimučen od natezanja i gibanja zi zariženu kožu od verug na rukah i nogah je zaspal.

876. Zbudilo ga je mjaskanje i vidil je tri pantigane ke su pomalo zi velin gušton jile njegov kus kruha. Blel i kričal je na njih i hital slamu ma one nisu za to badale. Mirno su jile naprid i pomalo, jena po jena, brez fuge šle van po onoj škujici kada su kruh pojile. Jutrin je bil lačan i jadan nasebe. Mislil je kako bi bilo boje pojis kruh leho ga pustit pantiganan. Kolo polne je pričelo dažjit i skroz puneštricu na krovu je padalo va njegovu sobicu i ju svu zmočilo. Šetal je lačan od jenoga zida do drugoga i sva se je tresal od zime.

877. Kuštodi su to jedva čekali i poznova mu rekli neka napiše buletin svojin i neka napise koliko dukati moraju dat. Napisal je deset dukati. Kuštodi su ga pogjedali i pitali ča samo toliko van vridi živjenje. Napisal je još jenu ništicu i zi slovi istešo napisal cento, sto, kako oni nebi napisali više. Drugi dan su mu prnesli niš jis, kruha, mirlina i malo suhih smokav i va jenoj zemjanoj butijici ocat i uje od ulik pomišano skupa i jenu dasku za ku su mu rekli neka ju klade na krov kada bude dažjilo pa mu neće močit. Dasku je klal pod kup slame i tako ju hranil, a bilo mu je i teplije kada je sideć spal.

878. Sel se je na slamu, zel va jenu ruku mirlin ki je bil samo napol operen i pričel jis, najprvo zi one bande kadi je bila nat, aš tamo je mirlin vavik malo žuhkast. Klal je vusta čičić kruha i zi gušton jil, pomalo misleć kako je mirlin dobar. Tako je jil mrvicu kruha i malo mirlina. Parelo mu se je kako je mirlin boji od svake naranže i drugoga frutja. Mislil je o tomu kako ga ni i zač ga ni nikada jil dokjek je bil lažvan. Ni mogal i ni mogal mislit kako je ta mirlin tako dobar. Nato je na bokunić kruha polil malo uja i osta. Pustil je naka se kruh malo napije i ondat ga klal vusta. Učinilo mu se je kako je to najveća slast na svitu. Ni mogal virovat kako to prije ni nikada jil i kada je vidil svojih mornari kako to jidu mu se je parilo kako je to niš jako slabo i kako to moru jis samo judi nižega roda.

BOJ KOD OTOKA SEZANA

879. Novi Dužd Vitalo Feriera je dal gradit novu flotu, sve stare brodi je obnovil i kada je mislil kako je strašno jak je šal kuntra združenoj hrvuasko-normanskoj mornarici. Združena flota je va Valoni popravila sve svoje brodi i zgradila još čuda novih. Kol boda Sezan je prišlo do boja zi Vnečići. Njihove brodi su bile na razbite leh raztreskane po cilon valonskon zalivu.

880. Feriera je prišal srićno va Vneci zahvajujuć jednoj maloj veslačici, ka ga je slučajno pobrala zi jene škrinje za ku se je držal i molil boga neka ga spasi, kada je boj bil finjen. Ojbanu je obećal tisuću dukati ako ga spasi i pripeja va Vneci. Ojban ga je vozeć šišno kolo bodi, čekajuć kada je buralo i vozeć po noći i bonaci pripejal blizu Vneci i tamo pustil.

881. Dogovorili su se kadi će mu dužd klas tisuću dukati i kada. Kada je Feriera prišal va Vneci je drugi dan šal va duždevu palaču i još isti dan predložil sinjoriji neka pusti zi pržuna dužda Silvija. Rekal jin je kako je i sam proval isto ča je proval bivši dužd Silvijo i kako tek sada vidi ,kako se je teško borit zi Hrvuati. Sinjorija je odobrila, i Silvija pustila van zi pržuna.

882. Tri ali četire dni je bil lažban i ondat su mu prerizali kršćavac va gunduli kada se je pejal na placu svetoga Marka. Čudo vrimena se je po Vnecih govorilo o tomu ki ga je i zač ubil, ma prava jistina se ni nikada doznala. Kuštodi ki su se bojali kako će jih paližat , aš su ga čineli davat dukati za preživit, su se dogovorili i podplatili gondujeru ki mu je presikal krščavac za deset dukati. Nakon nikoga vrimena kada se je pozabilo na Silvija su i gundujera našli va gunduli zi presičenin vraton.

883. Za vrime pohoda je umrl normanski kraj Guiskard i novi kraj Roger je prekinul boji zi Vnečići i Bizanton. Sve brodi su se tornale va svoje luke. Lita 1089. je umrl od kapje Dmitar Zvanimir kada je jimil veli sabor na Kosovu poju blizu Tnina , stolnoga grada kraja Krešimira. Pričele su svaje kolo njegove bašćine i to je oslabilo Hrvuasku mornaricu, silu ka se je zi velin uspihon borila proti do tada jačin pomorskin silan na svitu.

KRAJ PETAR SVAČIĆ

884. Nakon dugih svaj je bil za Kraja zibran Petar Svačić. Zi boji za vlast rasipjena Hrvuaska ni više mogla držat jaku i velu mornaricu, a skarsala se je i efurica i nje vojna moć na kraju. Va mejsobnimi trzavicami je poginula strašno puno judi i opustošene su bile skoro sve županije.

885. Va to vrime su va Hrvuasku prodrli Ugri. Petar Svačić jih je čekal na hlmini Gvozdu. Prišlo je do strašnoga boja. Hrvuati su čekali Kolomanovu vojsku va ušćacih, sutiskah i bočinah. Pomalo su se potezali nazad i davali otpor. Kada su mislili, kako su Ugri fanj unišćeni, su šli va odlučan boj. Ugri su brzo jašuć pripejali novu vojsku i potukli Hrvuaske bojovnike. Hrvuaski kraj Pere Svačić je poginul.

886. Va Hrvuatih se je vodil partizanski rat zi Ugri još dvajsetak lit. Na kraju su hrvuaska plemena potpisali mir zi Ugri. Va zlatnoj buli je bilo začarkano kako će svaka država jimit svoj sabor, i svoje županije, svoju vojsku i svoje biškupije i kako će jimit skupnoga kraja ki će se posebojno krunit zi krunu va Budimu i posebojno zi krunu va Zadru. Tako su bile dvi države vežene zi skupnin krajen.

887. Vojsku po Ugarskoj ćeju oskrbjivat Ugri a po Hrvuaskoj Hrvuati a kada gre vojska vojevat van zi svoje zemje onda će bit na trošku Kraja i njegove badovine. Ugri izrazito stepski puk ni jimil čudo posluha za more i mornaricu. Hrvuaske mista, su same uzdrževale ka brod ka dva i čuvale trgovske puti, koliko su mogle.

VI. ZADARSKI BOJ

888. Lita 1190. su se Vnečići poznova pokazali pred Zadron va namiri kako bi ga osvojili i tako dobili još jenu upornu točku na ishojskoj strani Jadrije. Zadar ki, je pričekival kako bi se to moglo dogodit, je jimil pripravjeno fanj velu mornaricu. Zadarski polvban, ki je jimil velu podporu od skupnoga hrvuasko-ugarskoga kraja, je jimil razdelanu tatiku za svaki slučaj.

889. Vnečići su se pokazali na Punti Miki, kraju kadi su već jedan put doživili strašni poraz. Njihova flota ka je bila sastavjena skoro samo od galij, dobro opremjena, zi izučenimi kuhuri, oficijali i admirali se je pokaživala pred Zadron va svoj svojoj moći, misleć kako će ju se Zadrani prestrašit i popustit tako veličanstvenon brodovju i njigovoj moći. Zadrani su i ov put čekali neka bonaca.

890. Pred zahoj je vitar pal. Bavica je postajala sve slabija i slabija i na kraju je cilo more diventalo kako uje. Va njen su se zrcalile silne vneške galije. Galije su pričele spravjat i savijat jidra, pripravjajuć se za noć. Kada je bonacalo i more pričelo minjat cviti i ocviti zahojnoga neba i hitat duge hladi od plavajućih brodi, su kuntra Vnečićen poslali fanj veslačic ke su se brzo rugajuć koštivale. Vnečići su se pripravili za napad misleć kako ćeju lahko osabatat tako nišćetnu flotu. Veslačice su prišle na strilomet, sturgale niš strilic i se brzo tornale kuntra Zadru.

891. Vnečići su zarugali i zi galijami pričeli lovit veslačice. Veslačice su šle kuntra Punta Miki. Galije su rugale za njimi. Nadzornici su brzo tukli po tamburih, timpanih, i podvojili huć kako bi ćapali lahke veslačice. Bič je švikal i ožimal zadnju moć zi veruganih galijoti. Ojbani na veslačicah, ufajuć va svoju brivu, su se stalno držali van strilometa zi veneških galij, ma dosta blizu kako bi vnečići mislili da jih moru ćapat. Veslačice su vozile malo ovamo, malo tamo, minjale su rutu i se delale kako su njin veslači trudni i ne moru više daje.

892. Kada bi se bila galija zi svu brivu pričela koštivat, poznova bi bile zarugale i se dištakale od galije. Galijoti su postajali sve više trudni i niti frušta niti obećanja, kako ćeju sve lažvat ako budu veslali nisu pomogle. Galije su postajale sve sporije i sporije. Vitra ni bilo ki bi ma i za njmanji čas zaminjal glijotske mišice i jin pomogal se refat. Va mandraćih i blizu grot su čekale pokrijene zi kitinami i ponjavami hrvuaske X ormanice.

893. Kada su jih galije malo pasale, su brzo hitile kitine i krpe i zi svu brivu zavozile kuntra galijan ke su jimile otvorene boki. Galije su se provale obrnut i čekat ormanice obrnjene zi provu ma jin manevri nisu uspili. Brze, sulite ormanice, vozeć zi probojnin hućon, su bile vaje kraj njih i njin pričele bužat boki. Korbani su prije leh su se deštakale od ziškujanih galij nanje hitili zapajene mujačice.

894. Zapajena smola je goreć tekla po kuvertah. Cidila na galijoti. Palila jin hrbti, ruke noge i glave. Kašteli, ke su bile premazane zi ujen i katramon, su gorele kako bakje. Oganj su ćapale i jarbuli, konopi i jidra. Brodi su kako zapajene bakje plutali po mirnon moru. Galije ke još nisu bile napadene su, videć, kako goriju druge, provale uteć. Brze ormanice su jin slidile. Pasale jih za pol mije i ondat se naglo obrnule udelale kolo i napale zi boka. Polomile su jin sve korbe i udelale velu škuju na boku.

895. Mornica je, kada se je ormanica potegnula van zi boka, vdrla va galiju. Kuhuri, i sva kipaj se je proval spasit kako je znal i mogal. Skakali su more, hitali more daske i sve ča je moglo plavat i onda na ton plavali. Ormanci su skakali na galije. Zi toporačami presikli verugu za ku su bili veženi galijoti i jih lažvali. Galijoti, a najviše jih je bilo sužnji zi Hrvati, su poskakali more zi broda i gjedali kadi su njihovi mučiteji, kapitani, timbani, i kuhuri i sva posada i jih mori ubijali, tukli zi čin su mogli i topili.

896. Na krv su prišle morske pasi, ke su zi punimi gubicami judskoga mesa parale morski škorup i se najidale do sita. Jedna za drugu su se sve galije, ali predale i pod hrvuasku stražu vozile kuntra Zadru, ali pa su goreć plutale po bonacanon moru. Veslačice, ke su kunpanjale ormanice su pobirale po moru galijoti ki su se poznali aš su jimili konabjicu kolo vrata i kolo noge. Na kraju su galijoton kovači zi posikači na nakovnjih znimali konabjice ke se nisu dale otvorit aš su bile od prije posve zapeštane. Konabjice su bile na nogah žažrte va meso i znimanje zi posikačen je bilo jako bolno. One na vratu su bile nikoliko boje i se jih je znimalo lagje leh one na nogah. Galijoti su na lažini va veloj luki prali, sebe i svu robu ka je strašno vonjala. Kada su se oprali i kada se jin je roba posušila ali jin je niki dal drugu, su jin dali jis i pit i ondat su jih pustili neka gre svaki svomu domu.

897. Čuda galijoti se je prijavilo za ormanci na pesimah i za galijoti na zarobjenih galijah, ke su seda bile va hrvuaskoj mornarici. Takove galije na kih je posada bila sastavjena od lažvanih galijoti su bile strah i trepet za sve veneške brodi ke su pasivale po Jadriji. Srca lažvanih galijoti su bile pune tuge za svojimi, kih su običajno Vnečići poubijali, pune mržnje, bisa i osvete zbog onoga ča su sve doživili od kada su jih zasužnjili. Nijedan jin ni mogal zapovidat.

898. Kada su vidili drivo zi cafon na jidru su ga slidili, pomalo mu se koštivali i kada njin se je pokazala prilika ga napali. Pri gonjenju su se služili zi svimi fini. Klali bi bili na jidra cafa i venešku vijoru ali cviti Bizanta, ki je bil zi Vneci kako gospodar dobar i Vnečići ga se nisu bojali. Po boju su lažvali svih galijoti a svih Vnečići obisili po jarbulih. Plin su razgrabili i lažvanin galijoton prepustili brod. Takove galije nisu jimile duge izbire leh napadat sve brodi ke su trgovale po Jadriji, kako bi preživile.

899. Večer je cili Zadar bil va svitlu. Po svih zidinah, turnih i kulah su goreli ognji. Posvuda kolo mora su bile važgene ognjići i na sred mora su bile splavi na kih su gorele ognji. Skoro svi judi su nosili bakje i bakjada je hodila kolo Zadra. Sprida punte Mike su gorile galije ke je korenat pomalo nosil kuntra sorinju. More kolo gorućih galij je bilo ocvitano zi črjenožuto zelenin cviton. Još vavik se je čulo zi galij ali na daskah kolo njih bolne kriki ali kriki ke su zvale na pomoć. Veslačice su još vavik vozile naokolo i šalvivale onih kih bi bili našli.

900. Zadarski župan je pozdravil svih nazočnih. Lipo jin je zahvalil na premoći i rekal neka se previše ne vesele, aš Vnečić će opeta provat pokorit grad i neka budu vavik pripravjeni za ga branit. Dugo po noći se je pivalo, pilo jilo i veselilo. Nakon nikoga vrimena kada je prišla dika Zadranon, od skupnoga kraja zi Pešte, su se poznova veselili i udelali bakjadu. Kraj je poslal i fanj ekuli za popravit sve ča se je va boju na drivih dešvalo i još je ustalo za zgradit nikoliko novih ormanic i kundur.