III. PUT VA ILIRIK (ČA)

469. Pasivale su stolitja, viki i godišća. Sve više narodi je jizdilo kuntra zahoju. Svaki je pasival skroz hrvuasku zemju i više ni bilo sigurnosti i blagostanja kako prije. Stalni boj je pomalo zičrpal zemju i judi.

470. Za vrime Honorija, ki je Hrvuati pozval va Ilirik, se je vist o tomu brzo proširila po svih krajih kadi su živili Hrvuati. Jedan dil Hrvuati se je preselil priko Danuba i Drave va Rimski Inperij. Drugi dil je ustal kolo Balatona, od Danuba pa sve do Visle. Va Iliriku su se naselili na opustilu zemju, ka je bila zbog barbarskih narodi ki su pasujuć Dunav unišćivali sve na svon putu posve unišćena.

471. Hrvuati ki su živili kolo Volge, Dona, Dnjestra, Dnjepra i Buga su bili navajeni plovit zi svojimi ormanicami, po rikah i se pušćat zi tovaron robe do mora i potlik po morih do kraji kadi su prodavali robu. Kada su čuli za tu vist, faštidijoži, nemirni i žejni vidit novih kraji, i ako jin je bilo, osin ča su svi patili od reumine i bulsine zbog mačarin i umidece ka je bila va zraku, jako dobro su se odlučili na ojati poć va Ilirik zi ladami. Ilirik su od prije poznivali niki od njih, aš su trgovali, najprije zi Teutu, koj su prodavali šenicu, a potlik zi rimskimi glavari, kin su jistešo vozili i prodavali šenicu.

472. Zibrali su banskog plovbana. On je od najbojih efuri zi svakoga povirja rik zbral plovbana. Banski plovban je naredil svin ki su se odlučili za poć šnjin na dlgi i teški put neka poprave i urede sve lade.

473. Kada je to bilo udelano, jih je skupa zi skupbani pregjedal. Poznova su popravili sve šabe i sve uredili. Nato su stabelili udelat još čudo novih ormanic i jih opremit za visoko more. Dvigli su jin boci, ojačali prove, ražme i ojci. Proširili su bočne perajice i kobilicu produnbili i na nju klali bočne perajice, malo angulane kuntra dnu lade.

474. Priprave su trajale više protulić. Kada su bili pripravni, su se dogovorili kako ćeju plovbani zi ormanicami svoga poričja poć zi skupbani ki su spravjali lade od svake pritoke poć najprije do glavne rike, a ondat će svaki plovban zi svojimi skupbani zi svojih rik poć kuntra moru i ćeju se tamo čekat. Kako su stabelili, tako su i učinili. Kada su se zbrale sve ormanice od jenoga poričja na mori, su pod plovbanon zarugale, a potlik su kako duplačice zajidrile kuntra Črnon moru, a ondat priko Helespunta i Jegejskoga mora va Jadriju .

475. Zi povirja svake vele rike je bilo tisuće i tisuće driv ke su, ne gjedajuć na teškoće, jadrile i rugale kuntra obećanoj zemji. Nike lade su, bilo zbog kvara ali drugih teškoć, ustale po putu, i tako su se Hrvuati naselili od Jilade priko Škipetarije pa sve do Vneci. Oni ki su ustali va staroj domovini i su bili ustrojeni va kosize, su po kosizah prozvali Kosaki .

HRVUASKA VA ILIRIKU

476. Hrvuati su naseli tako sve od Balatuše do Jadrije. Za vrime sejenja su poznova ojačale rodbinske i plemenske vezi. Poznova se je uspostavil stari ustroj. Ban je poznova dobil vlast va svoje ruke. Župani i kosizi su zi tvrdu ruku vladali i čuvali naseljeno od suvraga. Uredili su i vojno ojačali zemju. Po brigih su zgradili i stare kašteli obnovili. Kašteli su jimili stalne posade.

477. Zi staroselci je više puti prihajalo do svaj zaradi paše i škode ku je hrvuaska marva delala po pojih. Brzo su se zi staroselci sprijatejili. Kako je va Hrvuatih bilo vavik više muških leh žensk, su se pričeli ženit zi staroselkami i brzo su se svi pomišali. Svaka ves, naseje i selo je jimilo ustroj kosize.

478. Dicu se je, čin su mogli, vadilo jizdit, turgat zi strilu i zadinjat zi sulicu. Svi Hrvuati su bili od šesnajstoga pa do šezdeset i petoga lita bojovnici. Po rikah je plovila efurica, ka je za svako poričje jimila svoga plovbana, ki je bil va svojih odlukah samostalan i ravan kosizon va županijah.

479. Na velih rikah su bile lade istešo duge i vele kako i po moru, samo su jin boki bile niže. Po monjih rikah su bile ormanice kraće i pliće i kobilice su jin bile samo pet prsti dunboke, a perajice na njih šu bile šire i tako su jimile dobru segurnu. Mogle su prit i va najpliće dili rik. Kosize i efurica je dobro sudilovala i jena drugu pomagala.

480. Efurica je jimila dužnost oskrbjivat bojnicu zi svin ča je rabila. Prevažala je robu zi jenoga dila rike na drugi. Judi i luši, vozi i bojne stroji. Na mori je bila mornarica istešo ustrojena. Va Ninu je bil banski plovban, ki je zapovidal svin plovbanon i bil je podrejen banu. Pod svakin plovbanon su bili skupbani, ki su jimili pod sobu korbani.

481. Svaki skupban je mogal va svojen kraju sve trgovske brodi, ako je rabilo, pretvorit va bojne i jih rabit va bojih. Plovbani su jimili svoje sedeži va Rabcu, Senju, Zadru, Splitu, Omišu, Dubrovniku, Kotoru, Budvi, Cresu, Veji, Lošinju, Hvaru i na Visu.

482. Stalno je bila ustrojena obhodnica od jene postaje do druge i sve visti su se brzo širile od jenoga kraja obvale do drugoga. Sinjali, bilihi, su se slale i zi dimon od jenoga briga do drugoga. Ta ustroj hrvuaske mornarice su najboje zapametili Vnečani, ki su mislili kako su jačan moć na Jadriji. Više puti su se zapleli va boj zi hrvuaskimi ormanicami i svaki put zgubili.

483. Hrvuaske ormanice, za ke su uhodili svi Hrvuati, su jimili jako dobre glasi kadi i kamo gredu veneške helandije i dromoni. Skupbani i plovbani bi bili prosudili kakovu moć jimaju Vnečići i brzo spravili skupa sve za boj pripravjene lade i jih hranili va lučicah kuda su morale pasat veneške brodi. Čekali su pravi mumenat i ondat napali zi svu moćju.

484. Najviše su kumpanjali veneške driva na par mij razdaje, tako da jih zi tujih brodi nisu mogli vidit, a ondat, kada je k večeru bonacalo, šišno se koštali i zi velu brivu razbili boci tujih brodi, ali ako su jih otili zarobit, bi jin bile dvi ormanice ali pesime, kako su jih zvali Vnečići, zi svake bande jena va bojnon huću zaletili i skršili sve vesla na helandiji ali galiji.

485. Tako je brod ustal ne samo brez vesal leh i brez veslači, ke bi bile vesla, ruge, prije leh su se škršile, poubijale i ziranile i više nebi bili mogli, ako bi i otili veslat.

AVARI

486. Malo nakon selidbe su se va Hrvuasku probili Avari. Ban je poslal teklići i kanići, ki su zi krvavimi mači tekli od sela do sela od mista do mista i struki zvali va kosize. Svih župani i kosizi je pozval na bojnu ojat. Raspravjali su o škodi ku delaju Avari i odlučili jih napas, potlić i premoć.

487. Zbrali su bojnicu. Mej sobu zibrali kosiza veloga, ki je bil jedan od Domagojevoga i Ištarina kolina i komu je bilo ojanje va krvi. Nakon dugoga zbiranja je zbral desetak zvižbanih kosiz, ke su, kako va stare vrimena, samozatajno, stegovno, kurajno i zi ostočno razdelanu taktiku potukle Avari va nikoliko boji, a ondat jih skupa zi Franci unišćili va njihovon taboru, hringu .

488. Hrvuaske kosize su se razvrstile va bojni postroj, jisto kako kad su se borili zi momulskimi hordami. Prva kosiza je šla na livo, druga na desno, treća na livo i četrta na desno. Peta i šesta kosiza su šle na krila. Efurica je ustala va sredini zi bojnu ojatju, a zada su bile tri kosize i jena je bila va zadadi. Uhode su bile sprida svih i javjale va zadadu ča vide i ča se dogaja sprida. Franci su jin zi svojimi postrojbami bili na desnon boku.

489. Na bilih kosiza veloga i po dogovoru zi frankovskin kumandanton su šle sve spridnje postrojbe va navalu. Najprvi su bili suličari zi dugimi sulicami, ki su bili ustrojeni va kunicah, prvi red dva, a zadnji dvajset bojovnici, zada njih je bila strilnica, a zada strilnice teške stroji: hitače, strilometi i praćari.

490. Avari su bili siguri va svoju jizdicu i kada su vidili ča se dogaja, su va strašnon halopu pojurili kuntra udruženin silan. Teške stroji su pričele hitat, huhji, zapajene teške strile, poti zi zapajenu smolu i praće, praćak. Va isto vrime je strilnica sturgala sve strile.

491. Avari nisu bili navajeni na tako ustrojen napad. Nikoga je zadila strila, nikoga praćak, nikoga huhaj ali zapajena smola. Konji su jin se prestrašile i pričele skakat i gris i kopitat. Ranjene luši i ranjeni kuhuri su puhali, bleli i zapomagali. Oni od Avari ki su se probili do prvih čart bojišnice su naletili na dlge sulice ke su probijale konji i kuhuri. Ono malo ča se jih je probilo je naletilo na oštre meči strilci.

492. Pišci su na to propustili hrvuasku jizdicu i poznova zaprli svoje redi. Jizdica je va halopu zi golimi meči sikla sve pred sobu. Preskočili su priko od zemje nahitanoga prstena i jaruge i našli su se va hringu. Nastal je strah, bleka i plač žen i nejači va Avarskon taboru. Spričela su avarske skupinice strilcev, turgale i branile šatori i deli tabora. Jizdica je zi svojimi kratkimi savijenimi luki i teškimi strilami brzo razbila svaki odpor.

493. Avarski kan je najprije držal boj, a ondat je mislil spasit glavu zi bigom. Jedan od jizdici je to vidil, nategnul bogun i zi strilu ga zadil va prsa. Kada su zgubili kana, su Avari još na nikoliko mist držali boj, a ondat je sve fermalo. Plaznica je va trih redih obkolila hring i korak po korak šla naprid čisteć sve sprida sebe.

494. Kosiz veli je zi pripovidanja prič ke su se vavik pravjale i pisam ke su se pivale večer kol ognja na kominu vil kako je bil zgubjen boj zi Momuli va Harezmu i zato ni dozvolil plaznici pustit svoj red. Dal je strogu naredbu prije boja na bojnoj ojati kako nijedan plazun nesmi napustit svoj bojni red i on ki bude zadit ali pogine se jima šubito menti nadomistit zi pričuvnin bojovnikom. Na ojati je bilo stabejeno, kako plaznica, kada propusti skrozi kunice jizdicu, mora zatvorit redi i zi korakon poć kuntra hringu. Jistu tatiku su dogovorili i zi Franki.

495. Pobrali su po mirišću plin, meči, sabje, luki, strilice, branci, veružnice i konjsku spravu, sedla, uzde i pokrovci. Svu živinu. Konji, koze, ofce, voli i krave su spravili na kup. Ono ča je bilo ranjeno i ubijeno su oderali i razdilili mej bojovnici. Ranjenih Avari, zasužnjenih kuhuri, žene i dicu, su spravili na jeno misto i jih klali pod stražu.

496. Plin su podilili zi Franci. Svoj dil plina pa su razdilili po starih užancah, najprije onin kin su oci poginuli va bojih, a ondat svin čjenon kosiz. Franci su samo gjedali hrvuaske kosize, ke su jena za drugu jizdile kuntra suvragu, držeć se svih starih navad i osigurujuć boci, zadadu i spridnjicu i sridnjicu zi jakimi postrojbami i uhadami. Frankov ustroj, i ako je bil dobar, ni bil tako ostočno urejen i više puti jih je to guštalo fanj zgub.

497. Čudili su se, aš oni su jimili zapovidnici ki su bili klajeni, a ne zibrani kako va Hrvuatih, kako je to lip običaj kako on ki je boji pride ojit na pravo misto. Po premagi su se Hrvuati tornali doma i poznova pričeli delat, kopat, orat i gojit živinu kako i prije. Njihove ormanice, duplačice i kundure su plovile po moru i prevažale i prodavale robu kadi god su mogle.

KNIZ VIŠESLAV

498. Rimsko Cesarstvo je propalo. Hrvuati su, kako bi lagje vladali, uredili dvi knižije : jenu na ishoju i urinju, a drugu na zahoju i sorinju. Još su vavik zbirali svojih bani, župani i kosizi, ma više jih ni zbiral cili puk, leh samo glavari mej sobu. Doduše, ako je ki bil izvanredno sposoban, bi bil prišal mej glavari i je mogal zbirat i bit zibran. Va obih knižijah je pričelo cvas čalarstvo, ni bilo obiteji ka ni jimila deset i više uli .

499. Gojile su se krave, koze, ofce, i svaka obitej je jimila najmanje dva žribca i po deset kobil, aš konji su za Hrvuati bile važnije od jila. Po ciloj Hrvuaskoj se je trgovalo. Teške vozi ke su potezale vitoroge voli su pasivale od kraja na kraj, pušćajuć za sobu kolniki. Po rikah i jezerih je efurica i nje efuri pejali robu od jenoga kraja na drugi. Po moru su ormanice, duplačice i triplačice vozile robu od luke do luke i od naših luk va talijanske porti. Poznova je Ilirik divental bogat, nasejen i siguran.

500. Franki su hitili oko na Hrvuati i jih provali posvadit i ondat potlić i premoć, aš su vidili kako će bit to teško ako budu složni, spominjujuć se njihovoga boja i premage nad Avari. Privoč su Franki napali Hrvuati za vrime kniza Višeslava, kol Trsada .

501. Kako je cila Istra i dili kolo Ogleja, Vneci i Rezijska dolina bila nasejena zi Hrvuati, su ovi, kada su franaške postrojbe hodile kuntra Hrvuaskoj, slali poruke va Hrvuasku i javjale kadi su franaške postrojbe, koliko su jake, koliko struki jimaju i kakove sve stroji voze sobu, ča sve šaju zi brodi. Uhode su, čin su ča čule i vidile, vaje sve pravjale knizu Višeslavu.

502. To je bil muž visok, sulit, sridnjih lit, zi črnimi na bandačah malo serimi vlasi ke su bile zada spletene va jaku i debelu kiku. Kada je čul ča se dogaja, je prišal kuntra mejašon zi svu svoju ojatju. Svaki dan je jimil više obavisti. Poslal je teklići i kanići ki su pozvali svih Hrvuati va kosize.

503. Kosize su poslali i postrojili kolo Trsada i va dunbini sve do Zadra i do Ogulina. Na bojnoj ojati su raspravjali par ur kadi bi bilo najboje čekat Franki i jih potlić. Bilo je ovakovih i onakovih pridlogi. Jeni su bili za jih čekat nigdi kol rike Raše i jih tamo potlić, drugi su mislili kaki jih je boje čekat va Vučkoj hlmini.

504. Svi su se složili kako ormanice moraju čekat Frankove brodi zi teškimi bojnimi stroji i jizbinu za frankovu vojsku nigdi va velih vratih. Banski plovban neka sam odluči kadi mu je najboje. Nakraju su se odlučili Franki pustit nutar va Hrvuasku i jih potlić kadi jin bude najmanje odgovaralo.

FRANKI

505. Hrvuati su Franka pustili nutar va Hrvuasku. Franki, ki su mislili kako se jih Hrvuati boje i kako nimaju sile sku bi jih mogli fermat, su postrojbe razkropili i oslabili. Stroji ke su Franki poslali zi brodi su kraj Glavine na Cresu čekale hranjene zada grot hrvuaske pesime.

506. Kada su se Frankove brodi pokazale i zi lipin vitron jadrile kuntra Kvarneriću, su jih napale va brzon huću hrvuaske pesime i do jenoga fundale. Boj je bil končan strašno brzo. Frankovski mornari nisu bili navajeni na brze i strašno moćne napadi hrvuaskih lad. Franki su ustali prez stroji i dodatne oskrbe.

507. Koštivali su se Trsadu i pregazili Ričinu. Skrozi trsje, zi kin je bil pokrit cili brig od Ričine do štanaja, su šli kuntra Trsadu. Počeli su se dvizat proti jako dobro utvrjenon i na vrh briga stršećen Trsadu.

508. Hrvuaske kosize su jih čekale va busiji, hranjene zada trsja i va jarugah ke su pokrili zi trstičinu. Franki su hodili i dvizali se po brigu, misleć kako ćeju naskočit kaštel.

509. Kada su Franki bili na jeno sat metar od kaštela, se je na Franki pričelo vajat kamenje, trupci i huhji. Hitače su pričele hitat poti zi zapajenu smolu. Strilometi su pričele turgat zi zapajenimi strilami i pod franaškimi kuhuri je pričelo gorit šmahje, a za njin i trsje. Zaradi ognja su morali prit na čisto.

510. Na čistini jih je turgala strilnica zi svojimi strilicami. Kada su Hrvuati malo cedili, su Franki pričeli hodit naprid, poznova jih je zahitala tuča kamenja i zapajenih lonci. Cilo mirišće je pričelo gorit.

511. Sprida Franki su najedanput stali zi jarug, dvižuć pokrovi od dasak i trstičine hrvuaski bojovniki. Njihove sulice, joštrulci, meči i batice su badale, sikle i lomile ruke, glave, lebra i noge. Franki, zipajeni, zidimjeni i razrejeni, su pričeli bižat. Bojovnici su njin slidili va neprekinjenoj bojnoj čarti va trih redih. Ki je bil zadit ali ranjen, je bil vaje nadomešćen zi drugin ki je bil va drugon redu.

512. Franki su se ufali kako će jih Ričina spasit i bižali kuntra njoj. Kada su prišli do Ričine, su Hrvuati otvorili jazinu na škuji ku su bili zajazili kada su Franki pasali Ričinu i prije plitva rika ku se je dalo pregazit je diventala dunboka i deruća i Frankovi kuhuri, ki su jimili na sebi nadci i armu, a čuda jih ni znalo ni plavat, su se topili kako muhe va medu.

513. Ono malo ča jih je ustalo je bižalo kako i kokoši brez glave. Bojovnici su počekali neka rika kala i ondat, hodeć, a jizdica na konjih, jih je gonila i dešvivala kadi su koga ćapali. Misleć kako su Hrvuati jimili sriću, je novi markgrof poznova navalil na Hrvuati. Sve se je ponovilo kako i prvi put. Poznova je Trsad ustal neosvojen, a Franci potučeni.

514. Pasalo je niko vrime franaškoga cesara Karla Veloga je priznal cili Rimski Inperij. Kako su Hrvuati bili nasejeni va njen, su ga i oni priznali. Ča bi bil urdinal su čuli, a delali su po svoje. To se fronkovin cesaron ni pijažalo i otili su na svaki način klas pod sebe hrvuaske knižije.

KNIZ JUDEVIT

515. Poznova su zavojšćili na hrvuasku panonsku knižiju. Kniz Judevit, ki je stoloval va Sisku, jih je po staron hrvuaskon običaju čekal zi pripravjenimi kosizami. Pustili su Franka neka pasa riku Kupu, ku su va gorinjen teku zajazili, i tako je diventala plitka. Franki su priko buta pasali Kupu.

516. Kada su Franki prišli na sto sat sežnji od mista kadi su bile hranjene hrvuaske kosize, su na Franki pričele letit huhji, prudci, praćki i goruće lonci ke su važgivale i zognjivale sve šmahje pod Franki. Mirišće je bilo sve va plamenu i dimu. Franaška jizdica je zgubila red.

517. Jizdici nisu mogli obvladat konji. Luši, bojeć se ognja, su skakale, dvizale se na zadnje noge, tukle zi kopiti i grizle sve kolo sebe. Čuda jih je ćapalo let i frankovih jizdici stuklo va kite od dubci i drugih drv ko je tamo raslo.

518. Jizdica je bila brez moći. Zgubili su kumandanta i ono ča je ustalo se je razbižalo. Pišci su bižali sami kako su znali i mogli. Gonili su jih va tvrdon bojnon redu hrvuaski bojovnici. Kada su prišli Franki do rike i ju provali pregazit, su vidili da je va vrime od kada su ju pasali do seda narasla i da ju ni moguće pregazit. Bojovnici su jin bili za petami i su zato hitili svu armu, sukli veružnice i nadci i se hitili va nabujanu riku. Čuda se jih je utopilo.

519. Oni ki su mislili kako su spašeni su se pravarili. Hrvuaski bojovnici su prišli do rike. Svaki je pričel napuhivat mih i kada je bil napuhnjen, su šnjih preplavali riku. Poznova su se postrojili va red i va trku pričeli lovit onih ki su bižali. Brez oružja su bili lahak plin i brzo je cila vojna propala.

520. Franki to nisu mogli podnes. Slali su jenu vojnu za drugu. Hrvati su se skarsivali, bilo jih je sve manje, a Franak je pejal nove i nove kuhuri. Va desetoj vojni je zčrpanu zemju konačno osvojil. Judevit je ušal va Primorsku Hrvuasku, kadi su ga ubili, aš jin je Franak pritil kako će i njih unišćit kako ča je Judevita.

POKRŠĆENJE HRVUATOV

521. Hrvuaski knizi su, koristeć položaj Hrvuaske mej Frankon i Carigradon, pomalo sve više jačali. Za kniza Višeslava su Hrvuati posve pokršćeni. Pokršćivali su jih frankovski misijonari i širili mej njih kršćanstvo.

522. Zi kršćenjen su zatirali staru viru i nje bogi i božice Davora, Hora, Kiša, Dobrinja, Moranu, Laru, Visnu ali Vislu, Dažboga, Buruta, maliki, vile, vilenjaki i lari i penati. Stin je Hrvuaska prišla va zahojski dil Europe. Kniz Višeslav je dobil blagoslov od Pape, ča je jako puno značilo.

523. Bizant je držal pod svoju vlašću sve gradi kolo mora od Vneci pa do Budve. Va Ugleju je bila patrijaršija ka je jimila pod sobu Splisku nadbiškupiju i sve biškupije kolo mora. Va nikih od tih biškupij je bila služba Božja na latinskon, a va drugih na hrvuaskon zajiku.

524. Tamo kadi je bil latinski zajik, va rabi je bilo i latinsko pismo. Ondi kadi je bil va rabi hrvuaski zajik, je bilo va rabi pismo ko su po glagolu „glagolati“ nazvali glagolica.

525. Kako bi svi biškupi priznali rimskoga papu za vrhovnoga poglavara, su na pregovorih va rimu utanačili kako je hrvuaski zajik jistovridan latinskomu i kako se služba Božja more držat i na hrvuaskon zajiku. Pod timi pogoji su se hrvuaske biškupije priklonile rimskomu papi i ga priznale za Pontifexa Maximusa, glavnoga svećenika-popa.

526. To hrvuasko pismo, glagolica, se je rabilo ne samo va crikvene leh i za civilne potribe. S tin pismon se je širilo kršćanstvo ne samo po Hrvuaskoj leh i va Bugarskoj, Ukrajini, Rusiji i Pojskoj.

527. Hrvuaska je gospodarski postala jaka, pričele su se otpirat škole za dicu po samastanih i va crikvah. Va školah se je učilo ne samo o viri leh i kako se ča mora delat, kako se liči živo i ča se mora jis i pit kako bi se bilo zdravo.

528. Od tih skulic su va puk prišle pisme ke su se pivale po sajmih i ke su judi brzo naučili i po njih se ravnali. Kako je sajmi, crikvenih prošćenj i slavjenja bilo čudo, je ta nauk prišal brzo va puk i puk ga je pričel rabit.

529. Gospodarska moć je bila fundamenat za vojnu moć. Bizant je za vrime kniza, a potlik kraja Tomislava, sve mista od Rike do Budve dal na upravjanje Hrvuaton. Hrvuati su pomalo prodirali va mista i kašteli ke su spričela jimile romansko stanovništvo. Potlik su se pomišali zi staroselci i nastal je mišijot, na kraju su bile sve mista i kašteli pohrvaćeni.

VNEČIĆI

530. Na urinju na plitvinah Lonbardije se je od pribigi zi bivših rimskih provinc stvaralo misto. Na malih bodićih su gradili kuće. Pomalo su nahićevali blato dvignjeno zi mora i kamenje ko su pejali zi kraja i tako su škojići diventivale sve veće.

531. Rubi od brači su utvrdjivali zi trupci od dubci, jesena i glabra. Pomalo su škoj do škoja napučili. Udelali su muli i jatne lučice, va kih su držali brodi. Mej škoji su pustili kanali po kih su mogli vozit zi posebojnimi kajići ke su zvali gundule.

532. Spričela su bili jako siromašni i sve ča su jimili je bilo more. Pričeli su ga jako dobro iskorišćat, ne samo loveć i pradavajuć ribu leh i trgujuć i prevozeć blago i robu zi zadade. Brzo su vidili kako je more put ki ne rabi delat, leho ga moraš poznat i po njen znat navigat.

533. Misto je postajalo sve bogatije i niš zi kupnju, a niš zi oružjem, je pomalo pričelo rast. Jimenovali su ga Venecija, ali kako su ga naši zvali Vneci. Njihove brodi su pričele napadat hrvuaske sela, mistašca i kašteli. Veneški poglavar, dužd, je mislil prije bizantske mista i kašteli klas pod svoju kumandu .

534. Jenoga jutra je prišal va palaču Šinjorije struk i molili stražu neka ga najave duždu. Straža je od njega delala bedaka, se je šnjin šalila i ga svaki dan naručila neka pride jutro. Jenoga jutra kada je bil tamo je prišal zi svitu dužd na puti va palaču. Straža je pričela tirat zi puta struka ki jih je toliko molil neka ga puste do dužda.

535. Dužd se je fermal i pital stražu: „Ki je to šlovik?“. Stražari su mu odgovorili kako je to niki ki već par miseci moli neka ga puste duždu, aš mu jima niš važnoga reć. Dužd se je zamislili i naredil neka mu ga pošaju gori za pol ure.

536. Šlovika su pod stražu zeli va jenu kamaru. Moral se je slić do gola. Svu njegovu robu su zeli i ju nikamo klali. Njemu su dali jenu dugu stomanju i mačini ke su jimile drveni podplat i zi gremikon su bile vežene za cive, tako jih ni mogal znet. Kada je hodil, je korak odzvanjal, i tako je straža znala kadi je. Pripejali su ga va rasvitjenu velu dvoranu.

537. Dvorana je sva bila lipo ukrašena zi zrizanin duborezon. Sve od gred, štuketi i ćok je bilo lipo ocvitano. Ćoke, ke su jimile po pedeset svićnjaki, su bile od čistoga murana i lišćile su i šajnale va milijuni ocviti. Na zidu zada šedije, kadi je sidil dužd, je bila vela slika jene pomorske bitke. Na jidrih helandij i dramoni je bil narisan caf. Na podu je bila debela bijačina va ku su se zagruzile noge i više se ni čulo tofci njegovih mačin .

538. Seli su ga na jedan drveni banak tri paši od dužda. Dužd ga je gjedal zi znatižejnimi oči od glave do pete. Pital ga je za jime. Ondat ga je pital ki je on i od kuda prihaja. Straža, ka je bila oboružena zi dugimi helebardami, mačen i štileti je svaki put kada se je šlovik na banku samo malo pomaknul šubito menti skočila. Struk je vidil kako mora bit miran kada govori i kako nesmi delat moti, aš to faštidija stražu.

539. Pričel je svoju štoriju. Dužd ga je jako pažjivo habal. Najprije je rekal kako je bil kuhur na jenoj bizantinskoj helandiji ku su zarobili Hrvuati. To je bilo va jenon boju kol boda Hvara. Pet helandij je šlo od boda Krfa kuntra Splitu. Večer su hitili sidra va jenoj dražici ka je bila jatna od bure i juga i se pripravili za počitak .

540. Straže su bile na brodih i su se minjale svake dvi ure. Nebo je bilo vedro, puno zvizd, Misec je svitil i svitlo je bilo kako dan. Žoldan je bil kako nikada do tada. Misec je zašal i prominila se je zadnja straža. Stražar je bil fanj pospan i šetal je po kuverti zi bosimi nogami, tako da ga se ni čulo. Va to vrime je doplavalo do driv deset hrvuaskih bojovnici.

541. Dvigli su se šišno na brodi. Čekali su kraj kašteli i kada se je stražar ki je hodil po kuverti jušto obrnul, mu je hrvuaski bojnik zi jenu ruku začepil usta, a zi drugu rinul nož pod livu lopaticu. Straže su brez glasa pale. Nato su prišli drugi bojovnici, ki su čekali plavajuć kolo driv, na brodi. Po pričvah od konopa su se sprtili na brod. Šišno su prišli va kapitanovu kajutu, nato va ojbanovu i ondat va prostor kadi su spali mornari i kuhuri. Va desetak minut su svi bili veženi i razoružani. Brodi su pale va hrvuaske ruke.

542. Hrvuaski mornari su zjutra zi trmuntanu zajadrili kuntra Omišu i brodi sidrali va jatnoj luki. Kada su prišli va Omiš, su jin rekli neka napišu poruku poglavaru Krfa, i ako plati odkupninu, ćeju jih pustit i popejat va Krf. Poglavar Krfa ni otil dat ni šolda. Svi sužnji su delali na pojih, gradili obzidje kolo Omiša i sve ča je rabilo.

543. Jedan dan je prišal jedan od korbani jutrin prije leh su šli na delo i jih pital ki bi otil poć na hrvuaske brodi za mornara. Javilo se je više judi, aš su mislili kako je boje bit mornar i delat svoj mištijer leh kako sužanj delat sve najteže posli.

HRVUASKI OJ

544. Mej onimi ki su se javili za mornari je bil i sam. Tri protulića je bil mornar na hrvuaskoj ormanici. Ustroj na ormanici je bil jako dobar. Korbana se je moralo habat i izvršivat svaki njegov mig, aš ako ga se ni habalo, je bil brzo meč zi bedrice i pala je glava. Svi su bili izvižbani i va plovidbi i boju ni rabilo čuda besid.

545. Svaki je znal svoje delo. Ormanice, kada nisu bile na straži, va teklićkoj službi ali na bojnon pohodu, su prevažale robu i trgovale. Vavik su plovile skupa dvi ormanice i nikada se nisu odvajale jedna od druge. Ormanice, ke su jako tvrdo grajene, moru odolit svakon vitru i moru.

546. Njihovi korbani, jidbani, rugbani i ojbani su tvrdi i odlučni judi ki se ne straše svakoga maha. „Kako san delal dobro i smanu ni bilo nikakovih teškoć, su me brzo zeli za svoga, i tako san ja mogal dobro pogjedat ne samo cilu ormanicu leh san gjedal i kada se ju je potegnulo, čistilo, popravjalo i cvitalo. Bil san va hrvuaskih škverih i vidil kako su je gradili.“

547. Dužd ga je habal i ni ga prekidal. Pričel je govorit o gradnji ormanice od samoga pričela. Najprije su na Beleviću posikli najveću šmriku ali jelvu. Onda su ju razpilili na pol po dlžini. Svaki raspilac su nato ogulili od kore i potopili more va blatinu. Raspilci su pustili mori leto dan i nato je potegnuli i klali na važi. Važi su bile na rodulih. Nato su potegnuli van zi mora trupci od dubca.

548. Dubci su posebojno gojili na mistih kadi je jako puhala bura i zvali su jih kokoravice. Te kokoravice su bile naravno od bure savijene i ni jih rabilo čudo krivit za dobit pravu fožu. Jisto je bilo i zi jeseni. Kokoravice su rabile za delat korbe ke su zagvozdili na raspilac.

549. Sprida je bila tvrda ašta. Korbe, aštu i sve daske i sve ča je rabilo pritvrdit su začavlali zi ramenimi i mjedenimi čavli. To se je delalo ovako: najprije bi se bilo zi svidron zisvidralo škuju ka je odgovarala čavlu i drvu ko se je rabilo začavlat, ondat bi se bilo klalo nutar čaval i nato su ga kovači zarebatali .

550. Va svih škverih su kovači ki znaju stopit ram i mu zi dodavanjen cinka udelat mjed i broncu. Kovači su jako višti i znaju udelat sve orudje ko rabi za delo, dleta, tesle, svidri, bati, planje i pile. Va kovačijah su vele mihi ke užare ujeni i oganj je toliko žaran kako z lahka stopi ram va lončenih potih delanih od posebojnoga mela i žinte. Stopjeni ram se ondat zliva va kalupi ke su udelane od istešoga mela i žinte, pusti neka se ohladi i ondat se ga oluštra i očisti i klade va rabu. Na jisti fin se dela i bronca. Tako delaju čavli, brukve, brukvice, ramene ploče, rebatini, oćeti, kolca va bocelih i sve ča rabi za brod.

551. Onda su klali nutarnje i vanjske madiri do pajolca, ki je bil nogu i pol od raspilca. Mej madiri su klali pilotinu. Nato su udelali pajolci na provi i krmi, ki je bil četire noge od šotnjega pajolca, banki za ormanci, upornice za noge na pajolcu, litve za zašćikat branci i rugnice za dlge ruge na svakon boku. Zi live bande na krmi su klali štafu za plamenicu, zi desne bande za vijoru.

552. Pod krmenin pajolcen su bile mujačice zi smolu, ku bi bil korban zapalil i hitil na tuji brod ali, ako se ni mogal dištakat, kada je probil bok suvragovoga broda, tako da je ormanica skupa zi tujin brodon zgorela.

553. Sprida se je udelal art, koga su kovači zakovali zi ležeznimi pločami i dobro oluštrali. Na ašti su bile na verugah obišene dvi gredice ke su čuvale kako se art nebi predunboko zabil va suvragov brod. Na ta način bi se bila pesa ali sagena lagje dištakala od suvragovoga boka.

554. Rekal je duždu, ki ga je sve boje i boje habal, kako bi bilo dobro zgradit slične, samo veće brodi, ke bi mogle bit učinkovitne va bojih više leh današnje helande i dromoni.

555. „Presvitli, pozabil san najvažniju stvar, a to je oj. Oj se klade na ormanicu zadnji. Ormanicu se zmiri koliko je dlga i koliko je široka, i onda zračuna koliko dunbok i širok oj će joj lipo zapovidat. Naše helande i dramoni jimaju na krmi zi svake bande jeno široko veslo, timon, zi kin timunaju i koga tende dva čovika. Moramo priznat kako timunanje ni baš lagak posal. Na ormanicah je jaki i veli oj, koga poslužuje samo jedan čovik, zovu ga ojban.

556. Ta oj je na samoj krmi na kanjolih i lipo i lahko se more obraćat na jenu i drugu stran. Ja san cilo svoj vik nauta, mornar, ma do seda na nijenon brodu nisam vidil ta oj zi kin se lahko oja, timuna, i zato su pesime onako okretne i brzo se obraćaju va boju, za razliku od naših driv. Do ojbana je šubito hućban, ki ako je ojban zadinjen, šubito ćapa ojnicu, langoru, od oja i oja, timuna, naprid.“

557. Dužd ga je pital o oju, aš je i sam vil kako je teško timunat zi timoni. Pital je struka ko bi mogal zklimat ta oj za njihove helandije i dramoni, ma struk ni znal točno kako se to klima. Pital je je još od kada rabe ta oj. Struk mu je rekal kako je čul da su zi takovmi brodi prišli zi Črnoga mora i kako su ta oj od vavik rabili na svojih drivih.

558. Dužd je rekal, više za sebe, kako bi ta oj rabilo dobro proučit i ako je tako dobar, ga pričet gradit na veneške brodi. Struk je na to rekal duždu kako bi on mogal učinit načrt i kako bi mogal vodit gradnju tih brodi. Dužd je pozval svojih kancelari i jin naručil neka struka lipo obuču i neka mu daju sve moguće harte zi kimi more pričet gradit brod koga jima va mislih. Naručil mu je neka pride k njemu kada bude jimil narisan načrt.

559. Šlovika su lipo obukli, dali mu naslov glavnoga meštra za gradnju broda i mu dali ekuli za kupit hartu, lapiši, črnilo, pera i sve ča je potribno za narisat nacrt i fitat kuću kadi će to delat. Pasalo je malo vrimena i glavni meštar je poznova prišal pred duždevu palaču i rekal straži kako bi šal duždu. Ov put se je straža poklonila pred njin i ga pejala poznova va onu istu kamaru i poznova su ga presukli va dlgu stomanju i popejali pred dužda.

560. Dužd ga je gjedal i rekal: „Kanun je kanun“, i ga pital ča jima. Šlovik je pred njega na široki stol klal savijene harte ke je jenu po jenu odvijal i mu tumačil ča je ča i kadi je ča. Dužd se je sva pretvoril va oko i uho. Na kraju je rekal kako mu se načrt pijaža i naručil inpijegaton neka ga pejaju va arsenal i neka mu daju šoldi koliko mu rabi za zgradit prvi brod.

561. Glavni meštar je nato rekal duždu kako bi mu on pokazal jedan mali brodić koga je on zi dvimi kalafati udela i ga proval mori. Dužd je naručil neka svi njegovi admirali i kapitani ki su va Vnecih pridu drugi dan na kanal, kadi ćeju vidit i ocinit novi brodić.

562. Drugi dan je prišlo pet admirali i čuda kapitani na kanal. Čekali su na dužda. Najprije je prišal veli meštar zi svojimi kalafati, ki su na karetiću pripejali brodić. Kalafati nisu dali nijenomu blizu zi krpu pokrijenoga brodića. Kada je prišal dužd, su brodić sokrili i ga destezo kalali more. Dužd ga je gjedal zi svih band. Brodić je lipo plaval. Nato su mu dvigli jidra i timun namistili na jir, kolo, i brodić je zaplovil i va jiru se poznova tornal na misto kadi je bil prije.

563. Admirali i kapitani su brodić gjedali, ga pipali, porivali ovamo i onamo. Niki su rekli kako ni vridan šoldi ke su se zanjega potrošile, drugi su rekli kako je jako dobar i kako jima dobre maritimne sposobnosti. Na kraju su se svi složili, a najviše zbog toga aš se je pijažal duždu, kako je jako dobar i kako bi bilo dobro zgradit takov veli brod i ga provat na velon moru.

564. Meštar je dobil ekuli i misto va arsenalu kadi more gradit brod. Spričela je bilo fanj teško dobit drvo za zgradit takov brod. Meštar je bil ustrajan, šal je va Istru i tamo kupil cer i jesen. Na Krku i Cresu je kupil kokoravice, dren, katram i srdelino uje. Na Beleviću je kupil trupci od šmrike i jelve i drinjinu i pomalo va šest misečin je pripravil sve za gradnju driva.

565. Kalafati su najprije na važi položili kolumbu od tvrdoga dubca koga su kupili na Cresu. Dubac je bil trejset nog dug i zaradi toga su udelali četire intaji. Na intajih su klali zi svake bande ojačitve od dubčevih folk ke su bile pet palci debele. Nato su klali ašte, rebra i mej rebri intajice.

566. Korbe su bile istešo od tvrdoga dubca zi bodi, Kurika, Cresa i Lošinja. Madiri su bile od šmrike ku su kupili na Beleviću. Jesen su dobavili istešo zi bodi i Belevića. Drinjinu su kupili na kiriji. Korbe su bile visoke od trinajs do petnajs nog. Ašta je jimila dvajset nog više

567. Na provi je bil pajolac i kaštelić, a na krmi pajolac i kaštel. Krma i prova su bile premošćene zi punton. Banki za rugači su bile pod vedrin nebon, tako da je nadglednik mogal koržat kako ki ruga i ako ki ni dobro veslal i se otezal, ga zi fruštu prisilit na veslanje.

568. Jidra su posebojno tkali od najboje stupice i jih šili zi najačin koncen, posebojno za to sukanin. Kada je sve bilo finjeno, su brod, šoto man, hitili more i po noći šnjih udelali dva puta vijaj, od lagune do odprtoga mora i nazad. Nato su drivo poznova nategnuli na važi, ga oprali i očistili niš, ča su mislili kako ni dobro popravili i ondat pozvali dužda, ki je stabelil kada će ga se hitit more.

569. Prišal je dužd zi svoju svitu, svi admirali, kapitani i biškup zi svimi kanoniki, brod su krstili i razbili mu va provu butiju črnoga vina ku su specijalno za to puhali va caklarnah va Muranu, i ga hitili more. Brod je zaplaval kako vila. Rugači, ki su bili nutri i za vrime kada su ga hitali more, su pričeli rugat, udelali jir kolo lagune i koštali na rivu.

570. Na brod se je inbarkal dužd, admirali, del kapitani i niš od svite. Jena ženska je zablela: „Amamo, kako gremo lipo, kako da smo na galiji“, i tako je brod dobil jime „galija“. Svi su se složili da je brod bojak od helande i dromoni.

571. Dužd je sam jeno vrime bil na oju, kako bi vidil ako ta novotarija vaja ali ne. Brzo je vidil kako je to jako dobra stvar i kako se puno lagje timuna zi ojen leh zi timoni i kako rabi samo jedan čovik, a ne četiri kako na timonih. Šnju su plovili celi dan. Doklek je bilo vitra su jidrili, a kad je bonacalo su zarugali i šli kuntra domi.

572. Za vrime jidrenja se je galija pokazala jako dobro. Burtižajuć je potezala jako na orcu, lipo je pojivala, a zi punimi jidri je šla kako šajeta zi vitron va krmu. Ugotovili su kako se joj mora klas malo gruža kako bi boje držala rotu va burtižu i kako se njoj mora malo produjit timun. Na njoj se je jilo i pilo i veselilo sve do noći. Nato je galija koštala na rivu.

573. Dužd je odredil kapitana, mornari i kuhuri ki ćeju bit stalan kipaj na galiji. Galiju su poznova potegnuli va arsenal, klali su njoj gruž od žala pod spodnji pajolac i zaminjali timun zi većin i širin. Nato su ju poznova hitili more. Vaje su postavili straže i galija je bila va floti, brodovju Republike.

GALIJE

574. Vnečići su pričeli gradit brodi, galije, zi kimi su pejali robu po Mediteranu. To su bile 40 metar duge brodi, široke 8 metar. Jimile su dva jarbula i dva latinske, trokutaste jidra, baštun i veli flok. Na jarbulu va košu je bil koržač, proretor, ki je gjedal ča se dogaja kolo galije i sve javjal kapitanu.

575. Va štivah su bili sužnji i kaštigani za kraje, ubijstva i druge teške zločini, galijoti ki su morali veslat. Kada ni bilo dosti kaštiganih su njihove brodi lovile i va galiju veživali judi kih bi bili pobrali po selih. Svi su bili veženi zi verugami i nisu se smili micat od svoga vesla. Za veslon su jili, pili, hodili na stran, bolovali i umirali.

576. Svaka galija je zaradi smrada ki se je ž nje širil, i ako su ju polivali zi mornicu dva, tri puti na dan, vonjala kako congula. Kapitan, navarhus, je bil kumandant i njegova kumanda je bila zakon, ki ni habal je bil kaštigan. Do njega je bil sekutor, prvi časnik, ki je odgovaral za galijoti i komu je bil podrejen centurius, kumandant kuhuri.

577. Na svakoj galiji je bilo po trejset kuhuri, ki su va slučaju napada branili galiju. Svi mornari na galijah su bili istešo armani i va slučaju napada su se branili ali napadali. Za kapitanon je bil timunjer, guvernator, ki je timunal zi galiju, ondat su bili velari, bubnjar, ki je tukal huć po bubnju, i po kon su morali galijoti veslat. Kuhuri su bili ujedno nadglednici, hortatori nad galijoti i krvnici, ako je rabilo.

578. Galije su po ugodnon vitru jidrile, a kada je bila bonaca i kada se ni moglo duperat jidra, su galijoti veslali. Na jenon veslu je bilo od tri do pet galijoti. Vesla su jimile posebojne ručice za ke su galijoti držali veslo. Pod podon na kon su bili galijoti i na kon su po boku bile škuje po kih je tekal šporkic van, su bile štive, skladišća va kih je bila zi velu pažnju natovarena roba. Pod, kuverta, je bila posebojno grajena zi madirići na mozgi, zastupana i zalijena zi blakon, kako pišaka nebi tekla skroz škuje va skladišća.

579. Popriko su bile klajene upirače, drvene daske va ke su galijoti upirali noge kada su vozili. Svaka skupina galijoti je jimila banak, klupu na kon je sidila, ležala i umirala.

580. Za krcat i skrcevat robu je bil odgovoran poseban časnik, adjutor, ki je jimil dva sindika, ki su zahrvali i začarkali svu robu ka je šla nutar i van zi štiv. Škrinje, bale, barili i žare va kih je bila roba su se posebojno ocvitale. Težja, i roba ka ni bila tako osjetjiva na umidecu, je šla na dno, a lagja i na umidecu osjetjivija roba je šla ozgora.

581. Na kuverti, zada i sprida, su spričela bile hitače. One su hitale poti zi zapajenu smolu, barilci zi kaškami i kjišćari i kamenje na tuje brodi za vrime napada. Potlik su jimile zada i sprida po dva topa. Od prove do kaštela na krmi je bil most po kon su zi fruštami hodili nadglednici i tukli galijoti ki nisu dobro veslali.

582. Velo viće Šinjorije je na svaki način otilo podložit hrvuasko primorje. Veneške galije su više puti napadale po hrvuaskoj obvali, sužnjile judi i pjaškale sve ča su našli. Ormanice, kih su Hrvuati bili vajeni i ke su va njihovih rukah bile strašno oružje, su brzo napadajuć čudo puti spasile struki, utruki i struke zi veneških galij .

583. Čudo puti je prišlo do jutih boji va kih su Hrvuati premogli veneške galije, helande i dramoni. Vneci su pričele gradit velu flotu i kada su ju zgradile, su ju poslale kuntra Hrvuaton. Misleć kako Hrvuati nisu tako jaki, dužd je zi velu flotu partil kuntra Zadru, ufal je kako će zlahka potlić hrvuasku mornaricu i zavladat zi svin primorjen. Na Puntamiki su ga čekale hrvuaske ormanice.

HRVUASKE ORMANICE

584. To su bile brodi ke su bile slične onin zi kimi su Hrvuati plovili po rikah, jezerih i morih i zi kimi je njihova efurica primošćivala rike. Zi timi brodi jih je čudo prišlo na poziv Onorija, rimskoga cesara, zi poričij Dona, Djestra, Dnjepra, Buga i drugih rik priko Črnoga mora va Jadriju.

585. Seda su jih za rabu na moru vusavršili. Gradili su jih na Beleviću. Najprije bi bili, ča je bilo moguće bliže moru, posikli većan jelvu ali šmriku. Posičenu bi bili ogulili, razpilili na dva jednaca dila i ju potopili more. Nakon lito dni bi bili polovice potegnuli z mora. Klali bi jih bili na važi, malo osmudili zi dimon, očistili i na njih pričeli gradit korbe, lebra. Sprida bi bili klali jaku aštu ka je bila sedan do osan nog od kunice jelve.

586. Na aštu bi bili nagradili, od samoga vrha do polovice ašte, zavijen del trupca ki je bil ozgora i šoto oštar. Na ta dil bi bili ondat kovači zakovali mjedene ploče i jih oluštrali. To je bil rat ali art, zi kin je ormanica probijala suvragove driva, brodi. Kada bi se bilo udelalo lebrišće, bi se bilo nutri klalo oplatu i udelalo podac i na njega klalo uprišća za noge ormanci. Kada se je udelalo podac, šoto se ga je istešo udelalo ozgora na krmi i na provi.

587. Ondat se je klalo madiri, na bocih, kada se je prišlo zvana do podca se je mej jenu i drugu oplatu klalo pijotinu. Nato se je klalo madiri do vrha. Na vrhu se je na vanjske i nutarnje madiri klalo škermišće. Nutar, da nebi pačilo veslačon, se je klalo zi fištanji fermane gredice, premosnice, zi kimi se je mogla lada ćapat za drugu ladu.

588. Kada se je udelalo gorinji del lade, se je ladu obrnula i ondat na kobilicu klalo perajice zi jene i druge bande. Perajice su bile duple, mej njimi je bilo dvi noge razmaka. Perajice su bile malo angulane, šotnja kuntra dnu mora, a gorinja kuntra bocih ormanice. Zbog tih perajic su ormanice mogle poć va svako more, a kada su se dvi ćapale zi mosti i konopi na provi i krmi su mogle jako dobro jidrit.

589. Na drugu stran podnoge se je klalo okrugle drva za jarbul, ki se je mogal klas kada su se dvi lade mej sobu ćapale i kada više nisu bile vergule pa su mogle jidrit. To je bilo strašno važno kada se je hodilo na duje puti. Tako ćapane ormanice su zvali duplačice. Kada se jih je više primostilo, skupa su jih zvali triplačice, kvadračice i tako daje.

590. Te driva su bile duge od dvajset i pet do trejset metri, a široke od dva do dva i pol metra. Nutri su mogli veslat svaki, ali zi jenin veslon, ali na parići. Kada je svaki veslal zi jenin veslon, je ormanica letila kako i strila.

591. Svaka ormanica je jimila svoga korbana, ki je bil kumndant ormanice i koga se je habalo, rugbana ki je upravjal zi vesli, jidbana ki je upravjal zi jidri kada se je jidrilo i bil je zaminik korbana, a hućban je va hućak lupal i daval huć ormancen.

592. Kada se je bilo na ophodnji, kolo mist i otoki, su po dvi ormanice veslala zi hućon vožnje. Kada se je gonilo, se je rugalo zi hućon gonje, a kada se je bilo blizu suvragovoga broda, zi bojnin hućon i na kraju zi hućen proboja ali škujanja. Va boju je za vesla ćapala polovica kipaja, a druga se je mogla borit. Takove brodi su bile jako brze, lahke za upravjat i manevrat, spore galije jin nisu mogle odolit .

BATOŠTA KOD ZADRA 887.

593. Dužd je prišal pod Zadar zi više od sto galij. Sve su bile nove, dobro armane, urešene i pune vojni. Bile su va jiru i zi savijenimi jadri, kako jih nebi hrvuaske ognjene strile zognjale, i čekale hrvuaske brodi.

594. Cilu noć su hrvuaske veslačice vozile kolo galij i sturgale čas va ov čas va on brod goruću strilu. Svi na galijah su bili trudni i nisu zbog toga spali. Pred jutro su se veslačice zgubile. Oni na galiji su to jedva dočekali i, misleć kako se Hrvuati boje napas, zaspali kadi je ki mogal. Hrvuati su čekali bonacu, kada Vnečići nisu mogli rabit jadar .

595. Zjutra su Vnečići mislili kako se jih Hrvuati boje i kako se nećeju pokazat na mirišću. Jušto na svitlac zi svih stran su prišle hrvuaske ormanice. Vnečići su jušto otvorili oči i se pričeli spravjat, kada jih je straža avizala. Dokjek su Vnečići prišli sebi, su prve ormanice, vozeć zi probojnin hućon, već škujale njihove boci.

596. Kada se je prva pesima deštakala, je druga udrila. Va škuje, ke su arti udelale va bocih galij, se je zlila mornica. Galije su pričele tonut. Korbani su mujačice pune smole zapalili i jih hitili na kuverte galij. Oganj od goruće smole je ćapalo suho drvo. Zi galij se je čul strašan krik galijoti, kin je po škinah, glavah, rukah i nogah tekla goruća smola. Mornari i vojni su pričeli skakat u more.

597. Zi galij je oganj gorel i po pet paši vajer. Sve je bilo zadimjeno i vonjalo po smoli, katramu, uju i zapajenon mesu. Druge ormanice, su one galije ke su uspile klas vesla more i pričele veslat, lupnule zi boka i pasale tik uz galiju, zi dvignjenimi vesli zi bande zi ke su napale, lomeć i kršeć njoj sve vesla na jenon boku. Druga lada je isto učinela zi druge bane .

598. Galija je ustala na sred mora kako kalub brez kril. Jedan dil posade je skočil na galiju zi jene, a drugi zi druge strane, i potukal sve ča je davalo odpor. Nato su presikli veruge galijoton i jih lašvali. Lašvani galijoti su poubili svih svojih mučiteji i zeli galije va svoje ruke.

599. Zi jenih ormanic su turgali zi strilami na sve ča se je micalo po kuverti. Kada bi bili zadili fanj kipaja, bi bili zableli naka se predaju. Ako bi bili dvigli bilu vijoru, bi se bile ormanice koštale i prezele galiju, sva kipaj vezale i ju popejale zi boja. One ke se nisu otile predat su probili i spravili na dno.

600. Dužd je mislil kako će moć uć i je zi jenu brzu veslačicu bižal kuntra škoju. Akoržili su ga zi dvih ormanic ke su bile va pričuvi i vaje zarugali zi gonilnin hućon za njin. Vnečići su veslali kako maneni, nastojeć prit do škoja i se hranit, a i hrvuaske ormanice su rugale kako po navadi, nastojeć jin presić put i jih ćapat. Ormanice su jimile sve brži i brži huć. Nakraju su vozile zi hućon proboja.

601. Veslačica je minjala rutu, vozila čas ovamo čas onamo i pravalo sve kako bi ušla. Zgjedalo je kako kada maška lovi miša. Na kraju je veslačica ustala mej dvi ormanice. Strilci su nategnuli svoje dvojno savijene luki i čakali. Dužd se je predal. Naredili su veslačici neka vozi kuntra Zadru. Još z dugoga su vidili črni dim ki se je dvizal pod nebo zi mista kadi je bil boj.

602. Kada su pasivali kolo mirišća, su zagjedali čuda veneških galij ke su dogorivale, druge su na pol zognjane i potonjene još vavik plavale, a treće su razbijene ležale na bocih. Svuda su plavale deli jarbuli, kašteli, mujačice, barilci, barili, škrinje i škrinjice. Na nikih su bili još judi ki su se spasili pri tofcu i sada, držeć se kako čeperi za razbitine, ufali spasenju.

603. Po zognjanih galijah su hrvuaski bojovnici znimali pulene, sidra, vijore i jidra. Kada su prišli va Zadar, su vidili čuda zarobjenih galij, ke su bile prazne. Zi njih je congulalo, širil se je smrad i vonjale su kako krepalina. Lažvani galijoti su se va skupinah prali na lažini i provali oprat zi leti va odilo i kožu zabit smrad i patušinu .

604. Va jenon mumentu je dužd, misleć kako oni va ormanicah nisu više tako averti, proval uć, svojin veslačen je pod glasa rekal neka zarugaju zi svu brivu. Rugači su ga habali i zaveslali. Veslačica je pričela bižat. Korban na jenoj od ormanic ki je to vidil je obrnul oj i se zaletil va veslačicu i ju prevrnul. Veslači, ki su bili lahko obučeni, su plavali kolo prevrnjenoga driva, a dužda Candiana je nadac potegnul pod more i tako se je utopil.

605. Hrvuati su po staron običaju i navadi tri dni koržali za suvragon i tugovali za svojimi poginulimi. Večer tretji dan je bilo va Zadru velo slavje va čast premage nad Vnečići. Tusili su cili dan i cilu noć.

606. Šest sagen je bilo zasidranih va maloj luki. One su bile pod punu bojnu pripravu, zi kumpletnin kipajen, pripravjene za vaje poć va boj ako bi rabilo. Sve druge hrvuaske driva, kundure, ormanice i čudo veslačic je bilo šalvano va veloj luki, ka je bila čuvana zi verugu od jenoga kraja do drugoga.

607. Veruge su čuvale dvi pesime i na svakon kraju turnji, va kih su bili bojovnici. Na sorinjsku i urinjsku stran Zadra su bile poslane veslačice ke su koržale hranjene va mandraćih i škarih, kako se nebi od kuda prikral suvrag i napal na Hrvuati za vrime slavja.

608. Na poju na sorinjskoj strani Zadra je bilo sve pripravjeno za slavje. Na čudo mestih su bile od kamika zgrajene va pol kola, šest nog visoke gromače. Četire noge sprid gromač su bile udelane pilaštri ke su jimile utori va ke bi se bilo klalo drvo od ražnja na kon je bil naboden vol. Va kolu su jeni delali i tendili oganj, a drugi su zbande ubijali tuste voli, jih derali na mih i jih kladali na ražanj.

609. Drvo od ražnja je bilo od suhoga dubca, aš od jesena ni bilo dobro boj je pušćalo žuhkilo. Kolo ražnja i struki ki su to delali se je gnjelo čudo dičine ki su gjedali kako se ča dela. Potlik ćeju još čudo čudo vrimena jedan drugomu pravjat kako se je ča delalo i zač se mora glavu posolit više leh lebra i kuset manje od lopatic. Kruh se je pejal zi vozi od pekarij va mistu. Vino se je istešo pejalo zi podzemnih konob i prelivalo zi barila va mašteli ke su bile klajene na puno mist.

ZDRAVICA KNIZA BRANIMIRA

610. Kada je prišal kniz Branimir, ki je jimil svoje misto na bošcu staroga boga Davora, koga seda više nisu javno štimali, ma još je čudo njih potajno delalo njemu zaviti prije leh su šli va boj i žartve pajenice kada su prišli zi boja živi, su pričeli dilit va kupice svin vino. Vino je bilo črno, opojno je dišalo i na vrhu je jimilo cvit, ki se je držal na rubih kupic.

611. Branimiru su natočili kalež zi vinon. Istešo su zi jiste zlatne žarice natočili i svoj njegovoj sviti. Branimir je dvignul zlatni kalež, ki je bil lipo pokrijen zi hrvuaskin pleteron na sve četire strane i je jimil malo zdunbjene kvadrići na brancu. Na gorinjoj ravanici je pisalo zi glagolskimi čarkami na jenoj strani, a zi latinskimi na drugoj, njegovo jime: „Kniz va Hrvuati Branimir i dux Croatorum Branimiri“.

612. Kniz je dvignul kalež. Nastal je muk. Čulo se je samo pucketanje i jiskrenje ugjeni, na ke su hitali grezu sol kako bi boje teplile, bakalj, plamenic, ognji i krijesi, ke su gorile sve okolo i razsviljivale cilo pozorišće. Svuda su bile bakje i krijesi ke su dičina pod nadzoron zitruki štentali i hitali na nje šmahje i pripravjene kitine, ušiski i faši. Zi rasohami su razgarali od vrimena do vrimena žeravicu kako bi boje gorila.

613. Prvo su popili zamrlinu za svih palih va teškon boju. Nato je kniz Branimir progovoril i rekal: „Puče moj, danas, boje rečeno večeras, slavimo našu premoć nad stalnin suvragon, Vnečićen. Natočite svi kupicu ovoga našega dišećega, mirisnoga, gustoga i črnoga vina ki je plod dela svih naših težaci i težakinj, ki su na prisojnih stranah naših hlmin kungutali, tribili kamenje, sadili trsi i pobrali grozje.

614. Omašćeno grozje je va jatnih konobah dozrijalo i se pretvorilo po vilinoj voji va bojan vino. Zahvajujen se svin našin pučanon ki su pomogli gradit naše driva. Diku dajen našin ženan i materan ke su zgojile junaki, ki su pred par dnevi pokazali suvragu kako se brani hrvuaska domovina.

615. Zahvajujen se svin našin bojovnikom ki su jimili tu čast i su mogli va boju dokazat svoj kuraj, hrabrost i postojanost. Diku dajen našemu banskomu plovbanu, svin plovbanon, skupbanon i korbanon ki su vodili svoje brodi i tukli suvraga na njboji fin.

616. Posebno diku dajen našin kosizon velin, kosizon i svin njihovin časnikon, ki su svoje kosize pripejali na obvalu i va busijah čekali ako bi se suvrag hotil skrcat i nas napas po kraju. Posebno se zahvajujen naših županon velin, županon, hrvon, sindikon i badovincen ki su pomoću efurice i efuri, tih pohodnic voli i luši, oskrbili svih nas zi svin ča je rabilo, leson, šenicu, rži, proson, ramon, ležezon i kositron.“

617. Kada je finil su bojovnici pričeli tlić zi svojimi mači va branci, zarožale su rogi i bojne sopile. Hućbani su pričeli tlić po svojih tamburih, utruki su pričeli mahat zi svojimi bakjami. Cilo poje je odzvanjalo od larme, tofci oružja i bleke razpivanih junaki. Poje je bilo još jedan put jače razsvitjeno od ražarenih plamenic .

618. Branimir je još jedan put dvignul kalež, lupnul šnjih va stol i nazdravil. Popil je vino va kaležu do polovice a drugu polovicu, je po staron hrvuaskon običaju prolil sebi priko hrbta. Niti ni bil svistan toga, kako s tin prinosi žrtvu polivnicu starin hrvuaskin bogon i božican, Horu, Kišu, Davoru, Visli, Morani, Dobrinju i Lari.

619. Tih bogi i božic se više ni smilo javno spominjat, ma dunboko va duši je svaki Hrvuat jimil još vavik čudo mista za svih njih, va svojen srcu. Biškupi i popi ki su bili jistešo mej pukon su jisto tako zlili pol kupice za hrbat. Branimir je još jedan put rekal svin kako je vino jako i kako je prva kupica za zdravje, druga i treća za viguriju, a potlik ako se pije se more udelat zlo i velu porkariju, aš vino postane gospodar, a ne šlovik.

620. Nato su pričeli dilit lande kruha, kusi mesa i za dicu sladko, ko se je delalo od suhoga grozja, smokav, suhih marelic, orihi i mendul i ko su ormanci na ormanicah duperali i jili kada su bili va bojnon pohodu ali na straži i ko jin je davalo, skupa zi kupicu vina, moć.

621. Tusilo se je cilu noć. Na svitlac je kniz i svita šla va knižji dvor. Čudo judi je šlo istešo doma ali je šlo spat va jate. Oni najtvrdiji i ki su malo više popili, su kantali, bleli i tancali još dugo, kada je Sunce vić bilo jako, jako visoko.

622. Vist o porazu i smrti dužda Kandijana je brzo prišla do Vneci. Brzo su zazvali Viće šinjorije i zbrali drugoga dužda. Poznova su pričeli gradit galije i vadit kuhuri i mornari na njih.