II. VA HRVUATIH (ČA)

210. Kosiz veli i njegovi bojovnici i oni ki su od carske vojske otili poć šnjimi su se pomalo probijali kuntra urinjsko-ishojskin mejašon. Te mejaši propaloga carstva su od vavek čuvali Hrvuati. Za svoju službu su dobivali plaću od cara. Seda kada Cesarstva više ni bilo, su se svi Hrvuati skupa zi svojimi kosizi pridružili kosizu velomu osobnoga zdruga i se naputili va zemju svojih oci.

211. Žnjimi, bojeć se sužanjstva, su šle i postrojbe drugih narodi ke su živile va Cesarstvu. Šlo je par kosiz velih Hiksi, par kosiz Smeri, niš Palovci, Varjagi i Harzi. Oni su sobu pejali žene i dicu, svoje obiteji i rodbinu. Po putu su kanići javjali svin kosizan ča se je dogodilo i neka se svi pridruže pohodu doma.

212. Kosiza za kosizu su se pridruživale. Ustrojili su pohodnicu ka je bila udelana od čelnih postrojb, bočnih postrojb i zadade. Va sredici je bila carska udovica, hrana, živina i ono malo nejači ki su bili zi oci doklek su bili va carskoj službi.

DIDOVINA

213. Pohodica je prišla nakon par miseci va hlmovitu, krševitu, kamenitu, prašnu, ogujenu i siromašnu zemju. Hlmine su, činelo se je, dotikale nebo. Šuša, ka je svako godišće unišćivala čudo intrade, frutja i trsja, je ovoga lita bila još strašnija. Zemja je bila sva jako razpucana, trava je bila suha, a drva su bile rijavo crjene zi suhimi peri. Kadikadi je blizu potočin i lokav bilo još ko god zelenije stablo i niš zelenije trave.

214. Suša je još više otežila i onako teško živjenje. Bojovnici su se rastrkali po pokrajini. Prišli su doma. Živili su va komardah. To su bile zi kamici na voltu grajene i zi pločami pokrijene kućice ke su se nastavjale jena na drugu. Svaka komarda je bila zi pleton ali zi gromaču podijena na dva dila. Va prvon su spali dica i starci, a va drugon muži zi ženami. Va svakoj komardi je bila žena ali dvi, petnajs ali dvajset, ča veće ča manje dičine, did i baba i po kagod teta.

215. Živilo se je od onoga ča su dobivali od svojih bojovnici va službi cara, niš malo škrte zemje i od marve ku su pasli. Ono ča su bojovnici prinesli se je brzo stopilo. Jimitva je bila slaba. Struki su zaminjali armu zi težaškin orudjen i provali zi škrte zemje zisisat sve ča su više mogli, ma ni bilo vele koristi. Zemja je bila prenapučena. Sve više je bilo lačnih ust. Počela jih je mučit glad.

216. Hrvuatia je bila zemja va koj je po zimi bilo jako hladno. Pokrival ju je veli snig i vitrale su jake vitri. Protuleća bi bile prišle nenadijano, brzo, i kopnilo je va par dnih. Sve potočići, ričice i rike bi bile poplavile, bujice su nosile sve sprid sebe, kajuže bi bile diventale lokve, a lokve jezera. To je trajalo kratko vrime i bružere bi bile brzo osušile zemju. Vitar je nosil prah po ciloj krajini. Potoci bi bili presušili ali jimili samo malo vode va mirnacih i va jezercih ke su bile šišno učinjene zi jazinami.

217. Va vrime od kopnjenja sniga do bružer se je kosilo i šušilo travu, spravjalo ju va stogi i čuvalo za zimu. Va to vrime se je sadilo i štentalo poja. Kada bi bile pričele bružere, se je napasalo marvu, ofce, koze, kravice, kobile i ždribad. Napasat se je pričelo va dolinah, a ondat se je pomalo tiralo marvu va hlmine, aš tamo je bilo hladnije i paša je bila boja.

VAJA

218. Živinu su pasli odsluženi bojovnici i časnici. Kako je va Hrvuatiji svaki muški od šesnajtoga do šesdesetoga protulitja bil bojovnik, jih je doma šempre skarsivalo i su za to pomagali čuvat živo dica i mlaje struke. Odsluženi časnici su jimili još jenu nalogu, morali su svaki va svojen selu, vesi i zavesi vadit dicu jahat luši, baratat zi oružjen i pazit ča se dogaja kolo njihovih črid. Kako je bojovniška služba bila vezana za konja, to je svaki zaselak i svaka kuća jimila najmanje po desetak kobil i konji.

219. Časnici bi bili zibrali najmirnije konji i na njih učili dicu, mušku i žensku jizdu. Svi dica su već kad su jimili pet protulić vidili jizdit i se dobro držat na konju bez sedla. Kada bi se bili naučili jizdu, su jih pričeli učit turgat zi strilami, najprije va turge ke su bile fermative. To su bile običajno kožice od zeca napunjene zi slamu ali kožice od kozlića i jančića napunjene zi slamu.

220. Kada bi bili abeli zadinut fermativu turgu, bi bili turgu vezali na dugi špag koga su spričela va trku potezali utruci, a potlik bi ju bili vezali za luša ki je va trapu, a potlik va halopu za sobu potezal turgu. Svi dica i muški i ženske su bilo jako dobri turgači. To bi njin bilo dobro prišlo kada su čuvali živo i kada su morali sami skrbit za sebe.

221. Na protuliće bi bili dicu, ki su bili istešo postrojeni kako i njihovi oci i didi va trijice, desetače, trejsetače, satnije, trosatne, bojne, trobojne, kosize i kosize vele, pejali va siče. To su bile močarine kadi je rasla trstika. Na protuliće se je moral trst posić i pejali su ga va sela za pokrivat krovi i strihe.

222. Satnici su učili starijih dicu kako moraju i pod kin kuton posić trstiku zi mačen. Mač se je moralo najprije dobro nabrusit zi bruson i ondat se je trstiku moralo posić tako da je posičena ustala na jiston mistu kako kada je rasla. Tek kada su se to naučili, su jih časnici zapišivali za bojne kosize. Ti šuškriti su bili jako ponosni na to ča su dosegli i svako dite se je zi svu svoju moćju trudilo naučit sve ča su jih satnici učili.

223. Svako lito su jimili pripetavanja, turganja zi strilu, badanja zi sulicu va trku, a ondat na konju i va siči trstike. Turge su jin bile mišine napunjene zi travu i slamu. Propetavanja su bile najprije va desetini, ondat va trejsetini, ondat va satniji, i sve do kosize vele. On ki je bil najboji je bil slavjen i dobil bi bil najlipje udelan zi dvojno savijenimi kraci luk, strilnicu zi strilami, mač zi zlatnin bulbcen i sulicu zi zlatnin bušcen i vijoru zi zlatno črjenimi kvadrići.

224. Žitruci su vadili i luši (konji) boju i bojnomu šušuru. Jedan dil tih dobro zučenih konji su prodavali va Kinu i minjali za svilu. Svilu su prodavali naprida i zanju dobivali ča su rabili.

225. Va Hrvuati je bilo jako puno kovači, ki su kovali oružje, mači, noži, nožići, vretena za vozi, zakučki za balancini, veruge, striminci i potkove za konji.

226. Lukovci su delali luki od više šort drv, tise, drina, jesena, pokrive i judovine. Drva su posebojno šušili kako nebi pucale. Posičeno drvo bi bili klali va blatino pod vodu i tamo pustili tri ali četire misečine. Od takovih drv su delali ferse ke su takivali zi lipilon i ondat kraci dvojno savijali va teploj pari.

227. Mej kraci je bil ćapac ali hvatac na kon je bil mirnik i na koga su se zagvozdivali kraci zi šćikami i lipilon. Kraci su se natezale zi vržcen od gremika prije leh se je šlo turgat, a pred tin nisu bile nategnjene, leh mlohave, da se nebi spačivale. Turgan je bil vrh strile ali ubadac. Takove luki su bile kraće i š njimi se je jako lipo turgalo si luši.

228. Strilicu su vadili delat svako dite i ni bilo bojovnika ki ni znal udelat stril. Strile su bile posebojne. Trstenicu se je delalo od trstike ku se je zi užarenu žicu prošupjilo i znutra i zvana zagladilo. Na trstenicu ali prstanicu bi se bilo sprida klalo trokutast ubadac ili bužac, a zada se je klalo tri pera pod jistin kuton jeno od drugoga. Prije leh se je klalo va trstenicu ubadac, se je nutar klalo jenu ali dvi balice olova ke su morale glatko teć od jene do druge strane trstenice. Zada se je udelalo uši za veržac.

229. Strila ku bi se bilo ziturgalo je, kad je poletila, jimila balice na zadnjen kraju kol zaletnic, a kada bi bila zadila, turgu su se balice naglo ruknule kuntra ubadcu i tako pojačale tofac strile i više puti izbile ubadac zi trstenice ki je ondat ustal va turgi. Ako se ni jimilo kovanoga ubadca, se je na njegovo misto kladal ubadac od kosti, veli trn ali oštar kamik. Zi timi vajami dice su kosize jimile stalan dotok novih bojevniki ki su se jako brzo snašli va pravoj bojnici.

230. Va dugih zimskih večerih bi bili zitruki i zitruke poli ognja ki je goril na sredini hiže utrukon pravjali štorije. Učili jih o bogu Horu, Davoru, Dobrinju, Dažbogu i bogu Kišu, koga su se svi strašno bojali. To je bil bog ki ni jimil milosti za jizdajice. Svaki ki bi bil jizdal je moral umrit. Babe su vavik govorile vnukon: „Čuvaj se Kiša, aš on ne prašća!“ Pod bošcih boga Hora su vavik bile jame boga Kiša.

231. Svaka jizdaja se je osvetila, ni bilo važno kamo je jizdajica ušal. Za njin se je slalo uhode, ki su ga prije ali kašnje ubili i prnesli njegovu glavu glavaron. Vela vašćina je bila za cili rod ako je ki od roda bil jizdajica i zato su se svi jako čuvali. Dicu su učili va najmlajih liti kako moraju mučat i ono ča znaju držat za sebe.

232. Iskušeni bojovnici i časnici, ki su po četrdeset i više lit bili va kosizi i pasali sito i rešeto, su kazali brazgotine i ožijci na svojih rukah, nogah i obrazih i pravjali kadi su ča ćapali. Pravjali su dicin i svin ki su otili habat kako se mora uvik bit na oprezu i na vahti i nikada se nesmi zaspat ali pustit ča na lahku ruku, aš to se vavik osveti, ne samo onomu ki je to udelal, leh i svin drugin ki su žnjin.

233. Pravjali su kako se napada i kako se mora vavik skopat jaruge i obkopi sprida bojnih čart, aš se tako vavik more branit i tornat se na bojnu čartu ako napad ne bi uspil. Iskušeni časnici su pravjali kako su kadi jimili tatiku kada su premogli ovoga i onoga, ma su pravjali i kada su i zač su zgubili i ćapali kapeladu.

234. Babe su pravjale o vilah, krsnikih, malikih, čaravnjakih i vilenjakih. Pravjale su kadi su vile, kako zgjedaju i ča sve moru udela. Pravjale su o morah i višticah ke delaju tuču i unišćuju ča čovik dela. Svaka je jimila svoju štoriju i ju zagovarala zi svin ča je znala, kjenuć se va bogi i boginje, kih su jimili Hrvuati koliko god ćeš. Čudo su štorij pravjali o požgajih, gomarjih i zmajih.

235. Te priče su vavik bile strašjive i skoro ni bilo diteta koga nebi bil spreletil srh kada ju je habal ali kada bi bil šal leć va škuru i mrzlu stran, daje od ognjišća. Va trih bogi i jenu božicu se nisu nikada kjeli, a to je bil Hor, Davor, Kiš i božica Aštur. Svi su se jih bojali aš su to bili bogi boja i osvete.

JISKANJE ZA NOVON HRVUASKON

236. Kada su prišli svi bojovnici doma, je Hrvuatija postala pretisna i prenapučena. Časnici su pričeli govorit kako bi se moralo nigdire nać niku zemju kadi bi mogli prehranit svojih. Poslali su kanići i teklići po svoj dežiji i sazvali sabor.

237. Na saboru su odlučili poslat uhode zi nalogon neka najdu zemju ka bi bila pogodna za živjenje. Va prilog tomu kako se moraju selit je bilo i to aš su se njihovi susidi Varjagi bili odselili po rikah nikamo dugo dugo i sigurno jin je tamo bilo dobro, aš se nisu više tornivali kolo Amudarje i Hilmanda, kadi su prije živili. Niš Varjagi, ki su ustali, je živilo zi Hrvuati.

238. Uhode, mej kimi je bilo čuda žensk, su zajahale bojan konji i šle. Uhode su, kada su se malo dištakali od njihovih kraji, odlučili i se ustrojili po trijicah. Običajno su skupa bile dvi ženske i jedan muški ali dva muški i jena ženska. Te trijice su bile vavik skupa. Kada bi bili prišli va ki god kraj, bi se bili delali kako siromasi i petljali. Ženske bi se bile oštanjale zi sajami i obukle raskinjenu i okrpanu robu. Hodili su od jenoga naseja do drugoga i petjali.

239. Hitali su sriću i pitali judi kako je urodilo, kako je paša za živo, i jimili široko otvorene oči i sve pametili ča su vidili. Više puti se je dogodilo kako su jih zignali i potirali zi kraja. Ki god put su ćapali i ki god tofac. Sve su to trpeli i, pomalo ma sigurno, vili sve više o zemjah skrozi ke su pasivali. Niki put bi se bili trefili zi drugimi trijicami i jedan drugomu pravjali ča jin se je dogodilo, kadi su sve bili i ča su sve vidili.

240. Pametili su sve običaji, fešte i sve ča su čuli o vladarih i bojnici. Tako su se pripravjali za prit doma i sve pravit na pohodnoj ojati, ka jih je čekala. Pasalo je fanj vrimena i uhode su se tornale. Poručili su kako su našli jako lipu ravnu zi travu bogatu zemju kadi sve rodi. Rekli su kako je zemja ritko i slabo nasejena i judi ki živu tamo su mirni i dobroćudni.

PRIPRAVA ZA PUT

241. Stariji judi su odlučili, na saboru, poć tamo. Poznova su kanići jizdili od kraja do kraja i teklići tekli od sela do sela. Javjali su juden ki žele selit va bogatu zemju neka se sprave skupa, poberu svoje imitje i svu čejad i neka priprave živo i vozi za dugi put. Zibrali su kosiza veloga, ki će bit zapovidnik sve pohodnice, i njegovoga namisnika. Zibrali su kosizi, trobojnici, bojnici, trosatnici, satnici i dosatnici trejsetači, desetači i trijci.

242. Kosiz je bil stariji truk, serih, malo valovitih vlasi, zada spletenih va kiku. Obraz mu je bil suh, obrazne jabučice su se isticale na zategnjenoj i zi brazgotinami zišaranoj koži. Obrazne mišice su se na svaki mig trzale i kazale odlučnoga i ozbijnoga struka ki je kadar svoj naum i odredbe sabora spejat do kraja. Oči su mu bile šajne, modre, pune živjenja.

243. Kada bi bil pogjedal, spod jakih i na krajih zvitih branic ke su mu čuvale oči od pota, bi bil šlovika spreletel srh. Bil je sulit, i ako nebi bil med svojimi sunarodnjaki, bi mu bili rekli kako je jako visok, ovako je zgjedalo da je ravan zi svimi drugimi. Bil je visok sedan nog i škina mu je bila široka dvi noge.

244. Bil je obučen va svilenu odoru ka je bila na više mist zasičena i skrbno zašijena. Kolo vrata je jimil po hrvuaskon običaju krpu ka je bila ocvitana na črjene i zlatne kvadrići obrubjena zi črnin cviton. To je bil znak zapovidnika cile pohodnice, znak ki su svi poštovali.

245. Nehabanje je značilo smrt na mistu. Njegov dugi meč, koga je nosil na livoj strani hrbta, je bil vavik lipo oluštran, oštar i pripravjen na mot. Priko svilene žutastokafene odore je jimil črjeni kaban ki je bil zi prsaču zapućen na prsih. Kaban je bil širok, zi kratkimi rukavi. Rubi su mu bile obrubjene zi žlatnin trakon. Na prsih na livoj strani je bil izvezen, rakaman, zi zlatnimi i slebrnimi niti znak pripadnosti Hrvuaton.

246. Jahal je na visokon, brzon i žilavon konju svitlo sivoga cvita. Luš je bil napet, brz, mišićav i habal je svaki mig svoga gospodara. Postijak na konju je bil od najfinije kože, zišaran zi zlaton i slebron. Prsače, podrepnjak i potrbušnjak su bili od lipo udelane naplati zi zlatnimi brozačami. Pod postijakon je bil pokrovac zišaran zi crjenimi, čnimi i modrimi cviti i balicami, ke su bile zašijene.

247. Zašitki i balice su čuvale konja od tofca va boju i volovskoga roga va miru. Kopita su mu bile dobro oluštrane i dobro potkovane. Zi bande postijca je bil na cinturi strimen va koga su se kladale noge i ki je rabil za bolje jahanje, turganje zi lukon i sik zi mečen. Strimen je bil va boju jako koristan.

248. Zaminik mu je bil istešo visok mlaji muž plavih vlasi isto tako spletenih va kiku. Plave hladne oči su švigale naokolo i akoržile sve ča god se je kadi dogajalo. On je jimil istešo žutokafenu svilenu odoru i kolo vrata krpu zi slebrnimi i črjenimi kvadrići obrubjenu zi črnin cviton.

249. On je jimil, istešo kako i svi bojnici, črjeni kaban zi slebrnu prsaču i zi slebrnin obrubon na skutih i rubih rukavin. Jimil je murvastoga konja ki je bil brz i poskočan kako jiskra. Mišice su mu jigrale i jedva je čekal znak svoga gospodara za poletit va halop.

250. Kolo njih je na črjenon lušu, lipo obučen isto tako kako svi pripadniki njegovoga naroda, ovit va črjeni kaban, stalno tekal mladić i izvrševal njihove nalogi. Učinili su pohodnu ojat, ka je bila istešo tako učinkovita kako i bojna ojat, aš se va pohodu nikada ne zna ča se more dogodit i kako će se morat dilovat.

251. Kada su se zbrali svi ki su otili selit, je veli kosiz odredil kosizu ka će bit čelna i ka će pošijat uhodicu sprida sebe i javjat pohodnoj ojati ča se dogaja pred njimi. Odredil je bočne kosize i zadadu.

252. Va sredicu je klal nejač, ka se je vozila na vozih i hodeć hodila. Malih dicu su jimili va koših zi svake bande konja ali tovara. Za sredici su bili efuri, ki su se skrbeli za premošćivat potoki, rike i jezera. Oni su sobu pejali orudje za sić, rizat i pilit drva, ke su jin rabile za delat splavi, lade i mosti. Za efuricu su bili manzi, ki su tirali konji, krave, voli, koze, ofce i kamile, ke nisu rabile za nosit i vozit, ma su bile pričuva va slučaju potribe.

253. Carica, dva princa i princeza, ki su se odlučili poć zi osobnin zdrugon njihovoga pokojnoga oca, pokojnoga cara, su bili va mezdrici uz pohodnu ojat. Za njih su skrbili i jih čuvali koliko su god mogli. Oni su jimili svoj posebojni voz zi tendu, va koga su bile zaprežene najboje luši zi štaj Cesarstva, a ke su Hrvuati kada su šli doma pobrali sobu, kako nebi pali va ruke Momulon.

254. Carica je bila starija gospa ka je jako skrbela za svojih dicu. Strašno ju je pogodila smrt muža i premoć Momuli. Na van ni kazala boli i tuge, ma je zato kada ju ni niki vidil i po noći plakala i ni mogla spat. Kada bi bila zaspala, se je naglo budila sva va suzah. Vavik je bila va palačah, prije va ocovih, a potlik, kada se je oženila, va muževih, i ni bila navajena na štrapac putovanja. Strašno je bila trudna. Putovanje, spanje va vozu, jilo koga su pripravjali za svih i ko se njoj ni pijažalo, sve ju je to još više utrujalo.

255. Najviše su jili mučnik, zamočen zi ovčjin ali kozjin lojen, na ražnju pečeno meso i kruh, koga su pekli svaku treću noć kada su mirovali. Kruh je bil prvi dan jako dobar, drugi dan je bil još istešo dobar, a tretji dan bi bil pričel malo potezat na kiselo. Za potribu su jimili i dva puta pečen kruh, koga su jimili va svakon vozu i ni se smil rabit, leh kada je bila potriba, ako se ni moglo peć kruh aš je bil daž ali ako je bil kadi napad ili kada su prebrodjivali vele rike.

256. Mučnik se je kuhalo va velih kotlih. Kotli su bile od rama i nutri žingane. Svaki put se jih je nakon kuhanja lipo pralo i luštralo. Prije kuhanja se jih je ponovno pralo aš bi se bile po putu naprašile. Va vodu bi se bilo klalo sol i ondat kada je voda kuhala, pomalo zamilo šeničnu muku pomišanu zi rženu. Kuhalo se je na malon ognju pol ure i cilo vrime mišalo kako se nebi ćapal za kotal. Mišalo se je zi velin mulentačon ki je bil udelan od žestili i ki je na kraju jimil širok lopatasti kraj. Kuhan mučnik bi se bilo streslo na dasku, pustilo neka malo omrzne i ondat rasiklo na čudo dili zi koncen ali zi nožen. Za vrime kuhanja bi se bilo klalo nutar ovčji ali kravji rastopjen loj ali uje od ulik. Svaki je dobil kus mučnika i ga veselo jil.

257. Carica, ka je bila navajena na boje, ga ni volila, ma se ni nijedan put tužila. Znala je kako bi brez Hrvuati ona i nje dica bili zasužnjeni od Momuli i kako bi jih posvuda kazali, jih poniživali i na kraju ubili paljenjen dolinjega dela trbuha i mejnožja zi užarenin ležezon pred momulskin pukon. Kada bi pali va nesvist, bi jih klali va plot i pustili pod stražu do smrti.

258. Smrt je bila strašna, aš su, kako su pravjali, niki umirali va strašnih mukah i po šetemanu dan, obkojeni zi zeleno modrimi muhami ke su plazile po zipečenih i razjidenih dilih tula i tamo odlagale svoje zapjuvki od kih bi se bile razvile črvi ke su, pomalo ma sigurno, jile meso i odpirale jenu gnjojnu ranu za drugu. Umirujući su zi slabin glason molili stražu neka jin skrati muke i odsiče glavu, ma straža jin to ni smila udelat aš bi bila i sama finila na isti način. Svaki dan su se kolo plota gnjetli dičina, a i stariji, ki su na osujenih hitali kamičići, konjski gnjoj, polivali jih zi pišaku i pjuvali.

259. Princi i princeza su bili istešo zadinjeni zi padon Inperija, ma su kako mladi judi to zimali nikako lagje. Brzo su se prilagodili navadan i običajen va Hrvuatih. Princi su postali del kosize i pričeli su učit svoj bojni zanat od samoga dna. Hodili su na straže, jizdili zi trijci, hodili va obhodnju kako prozori i lovili divjačinu za prehranit svojih. Princeza se je sprijatejila zi kosizovimi hćerami i njihovimi prijatejicami. One su ju stalno pitale o carskoj palači, o časnicih, princih i poklisarih. Pitale su ju o živjenju ko je jimila na carskon dvoru i, kako sve divojke, ki joj se pijaža i za koga bi se oženila.

KUNTRA NOVOJ DOMOVINI

260. Pohodnica je na zoru pričela hodit kuntra novoj domovini. Put je bil dug. Više puti je prišlo do boji zi vojsku zemje kroz ku su pasivali. Hrvuaske kosize su to brzo uredile. Navajeni ratu i boju, Hrvuati su jedva čekali koga ki bi jin se suprostavil i jih napal.

261. Minjali su tatiku. Jedan put su va napad poslali bojne vozi, ke su va tri ali četire redi opkolile suvraga i ondat ga zi turgale zi strilami, povozile zi koli i zigazile zi konjskimi kopiti. Drugi put bi bili poslali strilnicu i jizdicu. Strilnica bi bila sturgala sve strile i ondat je jizdica va strašnon halopu navalila zi kopji i sabjami i razbila suvraga. Treći put su poslali va boj strilnicu, bojne vozi i atalice.

262. Kada je suvrag bil jak, su va zadadi jimili bojne stroji hitače, ke su hitale kamenje, huhji, gruh, barilci zi kaškami i kjišćari, i zemjane lonci va kih je bila zapajena smola. Strilometi, ke su hitale teške i zapajene strile ke su palile po suvragovoj zadadi.

263. Dan za dnevon, šetamanu za šetemanu i misec za misecon su, trpeć bružere, nevire, vitri, daž i mraz, bili sve bliže novoj domovini. Premostili i preplavali su čudo potoki, ričic i velih rik. Efuri su svaki put, bez falit, udelali svoje. Potoki bi bili premostili zi drvi, mej sobu jih vezali zi konopi i tako udelali most priko koga su pasivali judi, vozi i živo. Bojovnici su šli na konjih priko bez se zadrživat i osigurevali prilaz dokjek i zadnji šlovik zi pohodnice ni bil na sigurnon. Na kraju su pasale priko kosize zi zadade i uhode.

264. Priko većih ričic su delali mosti na ladah ke bi bili mej sobu vezali zi konopi i priko njih kladali daske. Živo bi bili osigurali zi mišinami, a istešo tako i vozi. Prije leh su vozi prišle na mostine, bi bili odpregli voli, konji i krave, i mladići i muži bi bili sami na o-ruk potegnuli vozi priko na drugi brig .

265. Na velih rikah su po dvi ormanice premostili zi moston i na njih klali voz ali dva. Po dvajset i trejset mladići bi bilo zarugalo va svakoj ormanici i prevezlo vozi na drugi brig. Živinu bi bili osigurali zi napuhnjenimi mišinami i ju natirali va vodu.

266. Ormanice su delali od najvećih stabal. Stablo bi bili prepilili na pol. Na jenu i drugu polovicu bi bili klali korbe i na njih madiri. Madiri su dobro zastupali zi paveron kako nebi prijimale vodu. Sve bi to bili pokrili zi kuvertu. Takovu ladu bi bili napunili zi vodu i ju pustili tri četire dni, a ondat, kada se je namočila, osekali. Zi svakoga boka je bila škermadura na koj su bili škermi za ke se je zi štropi vezivalo ruge. Na svakoj ormanici je veslalo od dvajset do trejset judi. Na boki bi bili klali perajice ke su bile malo angulane kuntra kolumbi i bi bile držale ladu kako ne bi vergulala .

VOLGA, DON, DONAC I DNJESTAR

267. Ormanice su bile duge, sulite i jako brze, pa su mogle odolit i najbržin rikan. Prebrodili su Volgu, Don, Donac i Dnjestar. Cila ta pokrajina je bila skoro opustila od kuge ka je tamo harala prije pet godišć.

268. Skiti, Anti, Sarmati i Rusjani su samo gjedali kada su hrvuaske kosize pasivale priko njihovih drmuni, pojan i zelenic. Nisu mogli virovat svojin očin kakov to narod gre. Kosize su bile dobro urejene. Svaki bojovnik je znal svoje misto. To su bili visoki, jaki judi, obritih obrazi zi vlasi spletenih va kiku, širokih ramen i ušpitnih klki. Same mišice, kosti i koža. Obrazi i ruke, gole do ramena, su bile opajene od slnca.

269. Svi su jizdili dobre, visoke, urejene, počešene i poskočne luši, ke bi bil svaki poželil. Konj i jizdic su zgjedali kako da su sklesani od jenoga dela, zrasli skupa. Arma jin je bila sva luštra i urejena.

270. Branci su jin bile ocvitane zi črjenimi i slebrnimi kvadrići i obrubjeni zi zlatnin rubon. Branci nisu bile vele i svaki je jimil na gorinjoj strani zarizu. Va boju su jih koristili za lovit i lomit suvragove meči. Svi su jimili savijene luki, strilnice pune strilic ke su jimile šare zaletnice, dugu trstenicu i ležezni ubadac.

271. Luki su bile va posebojnon tujaviću od kože ki je visil na desnoj strani postijaka. Duge meči su jimili na škini i zvali su jih končari. Za pason su jimili dva duge oštre noža i jedan ali dva kraće, od kih je bil jedan jako širok i je rabil kako lopatica za skopat jamu, nahitat zemju i poravnat zemju sprid sebe.

272. Niki su jimili za pason, a drugin je visila za postijakon sikirica na dugon toporišću, ku su zvali težica. Težicu su jimili i svi zitruci i zitruke, žene i stariji dica. Težice i toporače su rabile za sve, odsić kolac, zabit ga va zemju, presić kitu, odrizat šibu i skopat škuju va zemji, ako bi to rabilo.

273. Mlade divojke su jimile još bogun i strile i za pason kratki široki nož. Sve su znale turgat va turge. Manju divjačinu, zeci, orebice, fazani i srne su običajno lovile same. Sve žene su znale udelat oganj, oderat ubijene koze, ovce, konji i voli. Znale su prest, plest i učinjat kožu.

274. Posebojna viština je bila ličit bolest i šit rane. Va svakon selu je bila jena ali dvi ženske ke su se razumile na trave, čaji, zakuhe, ličenje bolesti i rajanje dice. Va bojnici je svaka satnija jimila čovika ki je znal šit i ličit rane.

275. Rane su se šile zi glavanjen. Ranu bi se bilo pregjedalo. očistilo zi vinon, oston ali kiselin mlikon i dili rane potegnulo na dvih mistih. Ondat se je na tako zategnjenu i skupa potegnjenu žlundru klalo glavu od veloga mrava i kada je mrav ugrizal, mu odšćipnulo tulo od glave. Glava je ustala na mistu kadi je bila klajena i ondat se je tako nastavilo glava kol glave, doklek ni bilo lipo zašijeno. Tako su se glavale olita, želudac, uporine, mezdre i mišice. Ondat bi se bila na isti fin zašila koža i sve skupa dva dni infašalo zi va vosak namočenu krpu.

276. Treći dan bi se bilo fašu znelo i ranu pustilo na zraku i slncu. Ranjenomu bi se bilo dalo srbat vino va kon su se močile glavice od maka. Kada bi bil popil takovo vino, bi bil zaspal. Pustili bi ga bili spat i po tri dni. Nakon osan dan bi rana bila zacijena i nakon petnajs dan bi bil ranjenik prizdravil.

MED VOLGU I HLMINE KARAPATI

277. Kosiz veli je, kada su prišli va zemju med Volgu i hlmine Karapati, zazval sabor, pogovoril se je zi pukon i njihovimi župani. Odlučili su kako ćeju se pogovorit zi judi ki živu ovdi i jih pitat ako bi se mogli naselit. Poslali su kanići poglavaron Rusjani, Skiti, Anti, Saramati i drugin. Nakon nikoliko dan, kada su se kanići tornali nazad, je šal kosiz zi dari obać svakoga poglavara i se šnjin nagodil kadi bi se mogli naselit.

278. Kako je zemje bilo na pretek, a bila je črna, rodna, ravna i brez kamika, puna trave, su se brzo sporazumili. Hrvuati su se, obitej po obitej, rod po rod i pleme za plemenon, naselili jedan kraj drugoga. Cile rodovine su bile blizu. Zgradili su komarde, bune i mošune od onoga ča su tamo našli, kamika, suhe trave i žinte i od drva.

279. Sve kuće su bile po staroj užanci klajene zi vrati kuntra sorinju, a zi zadnjin dilon kuntra urinju. Sprida kuće su bile strihe na visokih sohah pod kimi su spale pasi i se je sušilo sirak, metlač i tikve. Na sorinjskoj strani je bilo slnce, teplina, svitlost i ugodje, a na urinjskoj je bila bura, hlad, škuro i mrsko vrime od koga su se čuvali.

280. Pričeli su orat zemju, sijat žito, ripu, proso, sirak i hajdu. Nastavili su gojit luši, krave, tovari, koze i ovce. Kosiz veli je zadržal svoju bojnicu, ka je obahajala nakolo domovanj i čuvala dom kodi su se naselili. Brzo se je pokazala potriba za sigurniju i jaču državu. Kanići su šli va sve kraji i teklići su tekli od naselbine do naselbine i pozvali svih na sabor.

DRŽAVA

281. Na saboru je bilo postavjen samo jedan vapro : „Ča mislite, nan rabi država ali ne?“ Obitejski, rodovski i plemenski glavari su govorili i raspravjali o državi, o vojski, o glavaru države, o štibri i o načinu izbire glavara. Odlučili su ustrojit državu i kako ćeju se drugu užbu nać svi glavari i odlučit zi balotanjen koga ćeju zbrat za glavara države, a on će potlik sam zbrat svoga namisnika. Va isto vrime ćeju zibrat i župani velih, župani, kosizi velih i kosizi.

282. Glavari su se pričeli zbirat tri, četire dni prije sabora. Prihodili su zi pratnju jizdeć ali se vozeć na bojnih vozih. Svi su bili lipo urešeni. Luši su jin bile počešene, kopita oluštrane i potkovane.

283. Svaki je prišal pod svoju vijoru, koj je na spridnjoj gorinjoj strani bil bilih, pet zlatnih i črjenih kvadrići obrubjenih zi črnu črtu, koga su nosile sve hrvuaske kosize još va Carevini.

284. Cilo poje je bilo pokrito zi judi ki su stali i čekali početak glavarskoga sabora. Kosizi veli su se prižentali na božac, od kuda su mogli vidit svih. Rekli su neka prvo govori kosiz veli pohodnice. Muž se je stal. Pozdravil je svih nazočnih. Rekal je kako on misli da bi bilo potriba udelat državu aš ovako, brez prave vlasti, bi jih mogli pomest zi novoseline prvi ki bi prišli zi moćniju bojnu silu i jih zignat. Svi su se stin složili.

285. Nato se je stal drugi kosiz veli i rekal neka predlože jenoga med sobu za koga misle kako bi mogal bit ban, ki bi čuval i branil državu i va isto vrime pravo svakoga nje čjena. Bilo je više predlogi. Balotali su i tri su jimili najviše balot na kupi. Jedan je bil kosiz veli pohodnice Striloslav, drugi je bil namisnik kosizov Domagoj i treći mladi Jizdislav.

286. Kosiz veli pohodnice Striloslav se je zahvalil na časti. Rekal je kako je fanj star, da će pomoć svakomu ki bude zibran. Ustali su Domagoj i Jizdislav. Domagoj je bil šlovik sridnjih lit, pametan, rasudan i ne jako nagal, ma ono ča je odlučil je udelal, nikada mu ni bilo niš teško. Jizdislav je bil mlad, pun živjena, svoje delo je opravjal dobro i judi su ga volili.

BAN DOMAGOJ

287. Na balotanju je premogal Domagoj. Striloslav ga je pozdravil i položil pred njega šarpu na zlatne i slebrne kvadići i mu rekal da ju je zi ponoson nosil i seda neka ju dâ onomu za koga misli da će ju istešo tako ponosno nosit i služit svomu narodu. Domagoj je najprije rekal neka ju zadrži, ma kada ju je Striloslav odklonil zi besidami da je zitruk i da više ni za tako odgovorno delo, ju je ponudil Jizdislavu.

288. Jizdislav je pogjedal naokolo sebe i rekal da će ju prijet pod pogojen da mu Striloslav bude svitovalac i učitej dokjek ne ovlada zi svin. Striloslav se je stin složil. Tako je Jizdislav postal kosiz banski. Nato su zbrali župani velih i župani, pa ondat kosizi velih i kosizi, odredili kolika će bit štibra po ognju i ki davka nećeju plaćat. Nato su cilu noć pod punin Misecom, ki je žoldanon rasvitjival cilu pokrajinu, pili, jili i se veselili.

289. Drugi dan nazoru su se pričeli spravjat i jedan po jedan zi svojim sprimstvon odhajat doma. Staroselci su brzo vidili da zi novoselci ni šale. Ban jih je pozval i njin rekal kako svaki dim mora poslat jenoga bojevnika va satniju sela ko je najbliže. Podilili su zemju na županije, va kih je svitovnu vlast jimil župan veli, a vojnu kosiz veli.

290. Svakih sto dimi je davalo satniju, tri satnije su delale trosatnu, tri trosatne bojnu, tri bojne trobojnu i tri trobojne kosizu. Tri kosize su delale kosizu velu. Sve kosize vele su bile pod vlašću kosiza banskoga. Ban je jimil svu bojnu i svitovnu vlast. Svi bojnici su svakih četrnajst dan, na dan jenoga od bogi kih su slavili, moral prit na vaje va bojnoj opremi, na lušu i zi jizbinu za tri dni.

291. Svako selo je bilo stalno poveženo zi drugin selon zi teklići, a svaka župa je bila povezana zi kanići. Po ciloj državi su bile postaje va kih se je moglo prominit konji i kolo kih su tekle puti.

292. Hrvuati su bili svi vrsni kovači. Sami su kovali oružje, okovki i alat. Njihovi odkovki su bili znani po svoj susešćini. Oružje jin je bilo od bojan nada ko su oni sami delali va fužinah i kovali va kovačijah kaleć ga va nikakovon uju ko su črpali na dvih mistih zi zemje. Po brušenju na velih brusih ke su vrtile voli, bi ga bili poznova kladali va uje.

293. Sve vozi su jimili rigete i vretena od ležeza. Bojne vozi su bile okovane zi ležezon i na kolih su jimile svidrače. Zaradi toga su bile lagje od suvragovih, a istešo tako učinkovite. Dva puta na lito su se pripetavali najboji turgači, jizdici i strojnici od svake kosize vele ki će boje zadit turgu, to je bilo na dan boga Hora i Davora, a drugoč na dan boga Kiša.

294. Hor je bil bog blagostanja, obija, obiteji, a Kiš bog osvete ki je preganjal izdajice, traditori i svih ki su ali su otili naudit Hrvuaton. Davor je bil bog rata, premoći, oružja i bojnoga vihora. Svi bogi su jimili svoje svetišće na iston bošcu. Bog Hor i Davor su bili gori, a bog Kiš doli va jami. Svaki ki je prinosil žrtvu bogu Horu je obvezno prinosil i bogu Kišu aš se je bojal njegove osvete.

295. Žrici boga Hora, Davora i boga Kiša su vavik bili blizu bana i banskoga kosiza i jin pomagali zi nasviti i zi pajenicami, žartvami ke su palili va čas bogu i ga tako umilijali i privolili na pomoć banu.

296. Živjenje je ćapalo svoju kolotečinu. Pred zimu se je slavilo boga Dobrinja, boga veseja, obija i lipote. Ta dan su se ženili mladići i divojke i žrici su jimili pune ruke posla. Svitkovine su bile na Horovu poju. Tamo bi se bili zbrali svi bojevnici zi cilimi obiteji.

297. Običajno bi bili prišli zi vozi ke su potezale bile i sive voli zi dugimi rogi, ke su bile jako vele zi podkovanimi spridnjimi pačenki i mogle su potegnut voz priko blata, kamenja i priko trnja. Za takovimi vozi, ke su pejale jedan za drugin, su ustajale kolnici i putine ke su se ondat mogle rabit i drugi put.

298. Vozi su bile vele, dobro okovane i pokrijene zi od stupice ponjavami ke su bile namočene va čelinji vosak otopjen va uju od ulik i nisu pušćale vodu ako je dažjilo. Nike vozi su jimile duple ponjave i med njimi slamu, seno ali vunu. Na vozih je brojna obitej spala, se vozila i počivala. Bojovnici, mladići, divojke, golčine i goličine su kolo vozi jizdili na konjih, lovili divjačinu i jiskali drugu jizbinu ku bi bili našli po pojih, zelenicah i gvozdih kuda su pasivali.

299. Kruh su pekli va pećih ke bi bili udelali na brzu ruku. Skopali bi bili škuju va zemji i nutri zapalili oganj. Nakon ure vrimena bi bili oganj zadušen, ujen i lug očišćeni i ondat bi se bilo na dno nahitalo ploče od kamika, gruh ali lončene pločice ke se je za to posebojno kupovalo i pejalo sobu, ako ni bilo kamici, bi se bilo klalo drvene fašići i na to položilo skisan kruh. Nad sve se je klalo poznova fašići, pokrilo zi zemju ali jilon i nad tin udelalo oganj.

300. Oganj je goril jenu uru i ondat se ga je rašobrtalo. Zemju se je pobralo, fašići dobro očistilo i ondat znelo. Nato se je znelo zi peće kruh. Kruh je bil veli hjib zi zlatno žutu koru na koj su bile rizi ke bi bile od pečenja i kisanja raspucale i po kih se je kruh lomilo prije leho se ga je jilo. Kolo pečenja kruha je bila zabavjena cila obitej. Na isti fin se je peklo meso, ripa, mirlin pičurve i druge koreni.

301. Perad se je istešo peklo va jamah. Prije leh bi se bilo klalo peć, bi se bilo patku, orebicu, gusku, kokoš ali piplića namazalo zi dva prsta debelu jilovaču i ondat klalo na oganj. Nakon ure vrimena bi se bilo potegnulo zi ognja, žintu razbilo i meso bi bilo pečeno. Pera bi bile ustale va jilovači. Kuhalo se je va zemjanih loncih na odprton ognju.

302. Na dan boga Dobrinja je bilo cilo poje puno vozi, konji, bojnici, muži, mladići, falaši i golčin. Dičine je bilo koliko god si otil. Žene, divojke, falašuje i golice su se držale bliže svojin vozon i pripravjale su jizbinu za cilu obitej. Žric bi bil dal znak zi rogon ki je jimil tri škujice. Na kraju bi bil pokril dvi gorinje i pustil samo dolinju, tako da je zi roga šal fišć ki se je otegnul va dlgu melodiju. Svi mladići i divojke ki su bili za ženidbu bi se bili poredali va red, mladići zi jene, a divojke zi druge strane, svaki nasuprot svojemu paru.

303. Mladići su bili lipo ubučeni va bile rubače ke su sezale do bedar. Zapasane su bile zi širokin pason. Na tulu su jimili štikani kružat. Črne brageše od bedene su bile pod kolinon vežene zi oputu zi ku su bile vežene stupanje. Brageše su zi strane, od pasa do kičice na nogi, jimile dvi široke črjene trake ke su va sredini jimile žuti trak. Na civah su jimili uvojki od kozlićeve kože. Obraz su jimili obrit, a vlasi spletene va kiku ka je padala na jeno ali drugo rame. Priko svega hićen, priko ramen ali jenoga, je bil kaban zi prsaču pritvrjen na prsih. Svaki je jimil kolo vrata šarpicu zi črjenimi i svitlo sivimi kvadrići.

304. Divojke su bile istešo lipo obučene va robu ku se je prelo, tkalo i štikalo više lit. Na nogah su jimile lipe mehke stupanjice ke su bile kolo kičic vežene zi oputu. Bile hoveji su sezale do pol civ. Široki brhan, ki je jimil spodaj teški črjeni rub, je sezal do stupanjic. Kolo pasa su jimile široki pas črjenoga, zelenoga, žutoga i modroga cvita na kon su bile štikane rožice. Na tulu je bila štikana hajica od tankoga lana na koj je bil njidrac, ki je bil malo spod sis zapet zi zlatnin putcen. Na glavi su jimile štikani rub, ki je bil pritvrjen zi zlatnin ekulon ali zi dragin kamikon za vlasi. Vlasi su opletale va dvi kike ke su se savijale kolo glave i delale krunu.

305. Kada bi bili prišli na red za se ženit, bi bil žric od oca prijel mladu, a od kumpanja mladoženju. Zel bi jih bil za ruke i pripejal sprid luntara boga Dobrinja, ki se je veselo, urešen zi svimi mogućimi plodi, nasmihal zi višine. Zel bi bil livu ruku mladenke i desnu mladoženje, jih vezal zi kurdelu i jin rekal da jih veže zi trajnu vezu va obitej, neka jedan drugoga poštuju, vole i pomoru kada bude komu rabila pomoć. Nato je znel kurdelu, jih popejal do bilih konji lipo urešenih, osedlanih, pokrijenih zi bilu ponjavu, ki su jih čekali zada luntara, i kada su zajizdili, jin potiral konji, zi kimi su oni odjizdili va novo življenje.

306. Nakon dvi tri ure bi se bili mladenci tornali i se zahvalili bogu Dobrinju i dali dari žricu. Večer kada su se sve pari tornale, bi bili udelali velu feštu na koj se je jilo, pilo i veselilo cilu noć i drugi dan. Po noći se je mladencen dalo posebojni šator, va ki ni smel nijedan drugi. Drugi dan po Dobrinji su sve mlade žene poredane pred bogon Dobrinjen zaminjale žute zi zelenimi rubi, ča je bil znak kako su srićno oženjene. Ona ka ni otila prominit ruba, se je smatralo kako ni oženjena i nju je mogal snubit drugi.

307. Mlade divojke i falašuje, a i ka god golica, su se na toj fešti spoznivale zi mladići, falaši i golčinami, i čuda njih je drugo lito prišla na Dobrinju na ženidbu. Tu Dobrinju je bilo strašno živo. Judi su bili zadovojni. Obiteji su bile site i vesele. Svega je bilo va izobiju. Litina je bila dobra. Živo je bilo sito i tusto.

308. Učinili su komarde, niki od kamenja, drugi od blata i drva, a treći od blata i slame. Blizu jedan drugoga su bile obiteji, rodi, plemena, i bojnici nisu rabili hodit čuvat i boj vodit za drugih. Čuvali su svaki svoj kraj i ako je rabilo, je na pomoć priskočila kosiza, ka je brzo učinila red. Zi staroselci su se lipo razumili. Mej sobu su se pričeli ženit i družit.

309. Tu Dobrinju je Jizdislav na svojen konju i zi svojimi bojnici bil čas na jenon, a čas na drugon kraju i čuval poje kako se ča nebi dogodilo. Carica Ištur i nje hći Ištar su prvi put općutile kako pripadaju tomu narodu ki jih je pripejal ovamo i spasil od strašne smrti. Bile su vesele, hodile naokolo, razgjedivale po bankih i pod šatorih ča se sve prodava i čega je sve tamo. Jile su i pile i se veselile zi svimi skupa.

310. Jizdislav je bil vavik nigdi blizu njih. Svojin časnikon je govoril kako jih mora čuvat, aš nigdar neviš ča se jin more dogodit. Njegovi časnici i bojnici su ga zavrkavali i mu govorili kako Ištar gjeda previše lipo i da je zajubjen vanju i stin ga dražili. Jizdislav je svaki put na spomin princezinoga jimena postal črjen kako paprika i branil se je kako to ni jistina.

311. Drugi dan fešte je rano jutrin stal i šal do caričinoga i princesinoga šatora. Pozdravil jih je i odjahal naprid. Njegovi časnici su se nakašjali i jizdeć šli za njin. Carica je pogjedala svoju hćer i ju pitala ako njoj se pijaža Jizdislav. Hći njoj je diventala rumena va obrazu i niš je promrmjala i šla va šator.

312. Cili dan su hodile, jizdile i se šetale po Horovu poju. Uživale su va gjedanju i kupnji stvarčic ke su jih veselile. Večer su pričele sos sopile, nabijat bubnji i rožat rogi. Mlade pari su se pričele pripravjat za tanac. Najprije su tancali mladi muži i mlade žene, a ondat je bil tanac za njihovih starijih, potlik su mogli tancat svi ki su otili.

313. Jizdislav je stal zi bande i gjedal kuntra Ištar. Gjedal ju je i gjedal. Parila mu se je kako vila. Bila je obučena va črjeni kamižot, žutu hajicu zi štikanimi modrimi cvitići divjega radića i zelenimi žnjutići i perci i črjeni njidrac, ki je bil istešo štikan na črne kite zi bilimi cvitići buhača. Vlasi je jimila opletene va dvi duge kike ke su bile na dvi trećine vežene zi črjenu kurdelu, ka je bila vežena va fijok .

314. Pod fijokon su bile raspletene črne, kako ujen, vlasi. Obrazi su njoj bile rumene, oči kako dva ujena, ke su bile obrubjene zi gustimi trepavicami i nad njimi guste črne branice ke su dilile čelo od obraza. Mali, malo savijen nos i pune črjene usnice su odavale strasnu ćud. Brada zi jamicu va sredini je bila bleda i svaki put kada se je nasmela, njoj je davala posebujan čar. Bila je visoka, sulita, zi malo božastu puniju zadnjicu, ka je potvrjivala nje značaj.

315. Za Jizdislava je više bila bitje zi onoga svita, anjel, vila, a ne ženska zi ovoga svita. Tri puti je otil poć ponju za tanac, ma se je svaki put fermal. Nje mat, ka je bila uz hćer, je to vidila i pitala je hćer zač ju Jizdislav, visoki, horavi, suliti mladić, stalno gjeda.

316. Hći je postala rumena i materi odgovorila kako je on na straži i zato gjeda za njimi. Materi je to bilo smišno, ma ni niš rekla. Pogjedala je mladića i na njen akoržila lipu podugovatu glavu zi frunćelastimi plavimi vlasi ke su bile spletene va kiku ka je padala na livo rame. Vidila je plave oči ke su rizale spod širokih branic, široke ramena obučene va bilu stomanju, kružat i široki pas ki je stezal trbuh i držal brageše. Činil se ji je kako mladi bog.

317. Parelo se njoj je kako ni zaprike ku on nebi mogal preskočit samo za prit kol nje hćere. Bila je vesela. Nesmihnula se je mladiću. Najedan put je bil Jizdislav kraj njih, vajda mu je nasmih dal kuraja, i zamolil Ištar za tanac. Ištar je postala črjena. Malo se je nagnula naprid, a ondat skoro pala mladiću va naručanj. Sopile su sople tanac. Mladići i divojke su poredani stali jedan pored drugoga držeć se za facolić .

318. Prve pari su pričele pribirat. Noge su pričele letit, brhani se savijat i dvizat, kažuć suknjice i noge do kolin. Par je za paron hodil nasridu. Svaki je vrtil svoju vilu. Tanac je trajal i trajal, mladost se ni dalo od tančišća. Sopci su, trudni, pričeli fermivat i fermali tanac. Niki od starijih, ki je vil kako je teško čuda vrimena sos, jin je va bukaleti prnesal medovaču. Popili su jedan za drugin.

319. Divojke i mladići su se još niko vrime vrteli kako bi se odpuhali po tančišću, a ondat su se počeli tornjivat svaki kadi su i prije bili. Jizdislav je zel Ištar za ruku i ju pejal kuntra materi. Kada je bil na pol puta, su njegovi časnici zaukali i pričeli tlić zi meči va branci. Okružili su jih i pejali kuntra carici. Jizdislav i Ištur su počrjeneli i pucali od smiha.

320. Carica jih je pričekala zi besidami: „Lipo, lipo, a tako, par para najde na vratih od bošca .“ Kada se je fešta finila, je Jizdislav naredil svojin badračen neka gredu obać kolo poja i vidit kako se nebi ča dogodilo. Odredil je straže i sam je šal leć pod svoj šator. Prije leh je zaspal, je mislil na Ištar.

321. Činila mu se je kako vila. Zamišjal je nje lipu glavu, vrat, prsa, tulo i dlge lipe noge. Činilo mu se je kako da je va drugon nebu, a ne na zemji. Ni mogal zaspat, vrtil se je i obraćal od boka na bok. Napokon je zaspal i sanjal svoju vilu obučenu va tanku prozirnu poculicu i va puno puno tančic ke su lepršale kolo nje tila. Vrtila se je i tancala, pripogibala i zravnjivala, poskakivala i posrnjivala pa se poznova zravnala i nastavjala svoj tanac.

322. Poculica njoj je bila čas kalana čas dvignjena i razkaživala pa poznova skrila deli njenoga tila. Va jenon mumentu ga je kušnula i se stisnula k njemu sva srićna. Držal ju je za ruku, gladil njoj je nogu pa škinu i ju jubil tako da je ustal brez sape. Zbudil se je sva mokar, pogjedal kolo sebe. Vani je bila još noć.

323. Proval je poznova zaspat, ma sna više ni i ni bilo. Zi otvorenimi oči je dočekal zabelu, svitlac i zoru. Stal se je, šal do potoka, opral i spravil obuću i opravu va red. Prišal je do luša, ga odputil, popejal do vode i pustil neka malo pase. Gjedal je kuntra šatoru svoje Ištar kada je do njega prišal jedan od njegovih časnici i ga pričel zafrkavat. Malo se je udelal kako ga to jadi, ma se je ondat nasmel i mu rekal neka pogjeda straže i mu poruči kako je i ča se je dogajalo tikon noći.

324. Ištar je nakon tanca šla zi materu va šator. Legle su i se malo ganale, nato su zaspale. Ištur se je vrtela i mišala i ni materi dala spat. Čula je zorzanje zorzići, črčanje črčki, kukunjaganje kukunjag i kreket žab. Nigdi je škrtal i cvilil mišić. Na kraju je zaspala.

325. Sanjala je Jizdislava va bojnoj odori, zi timincen, veružnicu, nadcen i zi svu bojnu armu kako jizdi nikamo dugo, dugo, sve je manji i manji, i ondat najedan put zgine va oblaku. Zbudila se je sva prestrašena i pravila materi ča je sanjala i kako ju je strah za Jizdislava.

326. Mat ju je pomirila i njoj rekla kako je to samo san i kako se svaki zajubjeni boji za svoga dragoga. Vrime je pasivalo. Ištar je zi materu i brati živila svakdanje živjenje. Zi kumpanjicami je lovila zeci, orebice, fazani, jiskala pičurve i koreni, jizdila po lugih i mislila na Jizdislava. On je delal svoju dužnost, jahal ovamo i onama, ma ni niti jedan dan pozabil prit, pozdravit i pogovorit se zi Ištar i nje materu.

327. Domagoj je svaki dan delal svoje delo. Urdinival je Jizdislavu ča jima kadi udelat. Pital ga je kako je va ovoj, a kako va onoj županiji. Moral ga je avizat o svemu ča se dogaja, kako judi živu, koliko je i kadi ča urodilo, koliko jimaju živa i koliko konji je sposobnih za boj. Stalno su jedan ali drugi obahajali kosize, trobojne, bojne, trosatne i satnije, učili bojnih bojnomu zanatu i se skrbili kako nebi pozabili ča su prije svi znali.

328. Cili puk je živil va objidi. Poja su rodile zi šenicu, rži, žiton, sirkon, metlačen, proson i hajdu. Ripe, mirlina i rone je bilo koliko si otil. Broskva, kapuc i kej su rasle kako bedaste. Živina, krave, konji, koze, ovce i tovari, su se množili i bili siti i debeli. Va svakoj komardi i mošuni je bilo poroda, dica su po cile dnevi bižali i tekli po selih.

329. Dica su se jigrali čas na špekule, ke su jin oci i didi delali od drva, ondat su letili kolo, pa su jigrali na pupići i kozu lovili si i jigrali gusari, najlipje su se jigrali na košćice od prasak kada su zrijale praskve. Po zimi ni bilo skrbi za jis i pit, a i živo je bilo sito.

330. Jilo se je kiselo zeje, kiselu broskvu, kiselu ripu i mirlin zi trapa, vač bi bil klal svoju nogu ali lebra prasac, osušena ovca ali vol. Jilo se je obilno, zalivalo zi medovaču i kvason, koga su naučili delat od staroselci. Judi i žene su se pomalo pričeli gojit i nisu bili više onako suliti i lipi kako kada su prišli.

331. Pasala je zima. Visla je pokazala svoje lipo lice. Sve poja, lugi i gvozdi su bile pune zelenih per, cvitja i zelenice. Poja su se zelenila i kazala lipu litinu. Mekote su bile zorane, sijalo se je i sadilo ono ča se ni posijalo na predzimje. Va srpcu misecu su želi šenicu, žito i rž. Na žetvu su hodili svi skupa.

332. Muški su nosili kose, a ženske srpi. Svi su bili obučeni va lahku robu. Ženske va šare rakamane hajice i bile kamižoti na kih su bile rožice črjenoga maka i klasi šenice. Muški su jimili brageše i dlgu rubaču zapasanu zi pason. Rubače su na rubu jimile rub ocvitan zi rakamanimi klasi. Muži su jimili žute, a mladići zelene klasi.

333. Žito se je spravjeno va snopi kladalo na vozi tako da su klasi bile obrnjene nutar, a slama na van. Vozi zi žiton se je vozilo doma i kladalo va jatnice pod strihu. Kada su se tornjivali zi poja, su svi skupa pojali, se smeli i veselili dobroj litini. Drugi dan su snopi poredali va guvno i ondat su četire voli, dva para jedan za drugin, pomalo vrhli zi nogami. Slamu se je odvojilo od žita.

334. Nato su ženske, ako je bil lipi vitar, vijale, i vitar je nosil plivu, a žito je padalo na ponjavu na tla. Dva puta bi bili vijali i ondat klali žito najprije sušit, a potlik va škrinje i vriće i ga spravili za zimu. Svaka obitej je jimila svoje žrna na kih je mlila žito i muka je tekla spod žrn.

335. Muku bi se bilo omelo zi dlakavu nožicu od zeca i ondat prosijalo na sito. Mekine su rabile za živo, a od muke su pekli kruh. Muku za pogaču se je sijalo na spacijalno svilno sito. Kruh, ki je lipo vonjal, je mamil na jilo. Bil je svitlo kafenast i svaka pinka ali hjib je bil pedanj va dlžinu.

336. Za posebne prilike se je peklo pogaču. To je bil kruh koga se je misilo zi mlikon i va svaku pogaču se je klalo šest jaj i dvi žlice meda. Pekle su se i presnjaci, va ke bi bili klali ofčji žamak, uje nikolike jaja i muku sijanu na svilno sito.

337. Na kraju žetve je bila vela fešta. Pekle su se kolači od mladoga žita. Kolači su bile narizane i tako se jih je moglo lomit. Svaki mladićac i dite su dobili curandicu ka je jimila fožu samičice i po sredini je bila razpuknjena, a divojčice i falašuje kolačić zi dva kolca i jenin dlgin rogon.

338. Večer bi se bilo zahvajivalo bogu Dobrinju i ondat se je tancalo, jilo i pilo sve do kasno va noć. Pasalo je lito i prišlo predzimje. Spravili su zeje, ripu, mirlin, proso i hajdu. Barili su bile pune kisele ripe i zeja. Čudo mirlina i ripe se je zakopivalo va zemju kako nebi smrznula i ondat se ju je odkopivalo kada je bilo potriba. Ubijalo se je živinu. Meso se je solilo i sušilo na dimu. Zima je bila lipa i ne previše hladna. Jis je bilo koliko je ki otil.

339. Ištar i Jizdislav su se više puti našli večer skupa. Pazili su kako jih nebi ki vidil. Jubili su se i gladili, ganali koliko su više mogli, gjedali jedan drugoga va oči i zavitovali vičnu jubav. Jizdislav je više puti, čekajuć svoju jubav, ležal na kabanu kol vele rike.

340. Rika je lino tekla noseć drvina, travinu i žiline. Svako toliko bi bila ka god riba zarepala i zi pjuskon pala nazad va vodu. Na dvih mistih je voda delala dunboku jarugu. Jizdislav je promišjeval ča bi moglo bit šoto, ča toliko vira vodu va nje toku. Voda je delala uvijač ki ga je spominjal na luk koga mu je, kada je bil dičak, falašina, udelal njegov stric, kosiz veli, i ki je bil tako dobar i lip i na kon su mu bili nenavidni svi drugi falaši, pa i mladićašci .

STRIC

341. Stric je najprije par miseci jiskal pogodno drivo. Kada je našal jesen, tisu i drinjinu, je sve to klal va slanu vodu neka se moči. Kovaču je urdinal neka mu skuje od dobroga zvitnoga jacala fersu ka je jimila od jenoga do drugoga kraja škujice. Fersa je bila fožana kako jako, jako rastegnjen trokut ki se je protezal od sredine kuntra jenon i drugon kraju. Kada se je drvo pol lita halalo, ga je znel van. Lipo ga je razpilil na ferse.

342. Ferse je oblikoval i jih ondat kolal jenu za drugu. Na vrh je klal pol prsta debelu tisovinu, na nju pol prsta debel jesen i pod njega pol prsta debel drin. Na drin je klal fersu od jacala, pod nju poznova pol prsta debelu tisovinu, ondat drin i pod njega jesen. Sve ferse je takal zi kolu udelanu od imelinih bobic, žilin od baka i mličen od rosike. To je sve kuhal nikoliko ur i ondat još zi teplin lipilon takal svaku fersu za drugu.

343. Nato je sve skupa lipo oblikoval i na vrhih sredini i krajih luka klal kuhane rogi od prča četrtaka. Od roga je udelal ćapac za ruku i mirač. Veržac je udelal od gremika mladoga baka. Na sredini veržaca je bil palčnjak va koga se je kladalo zaletnicu od strile. Uzlanke na veržcu su bile lipo ojačane zi ramenu žicu i lipo zapletene.

344. Luk ni bil vavik nategnjen. Jimil je duge kraci, ke su bile lipo duplo savijene ozgora kuntra van, a prije ćapca kuntra nutar. Na gorinjen dilu kraka je bil zariz va ki se je kladala prije rabe uzlanka od vržca. Kada je bil luk gotov, ga je najprije sproval njegov stric, ki je bil znan po turganju.

345. Zel je luk, ga pogladil, klal uzlanke od vržca i ga nategnul. Nato ga je opustil, klal strilu ku je zel zi svoje zlatne strilnice i poznova nategnul luk. Dvignul ga je va višinu oka, naturgal va turgu, i strila je kako lažvani tić poletila kroz zrak. Zašviknula je i ondat se je čul tupi tofac. Pogjedal je i rekal: „Pravi zaditak .“ Ja san proval nategnut luk. Prvoč ni šlo, drugoč je bilo još teže, tretoč san komaj malo nategnul i pustil.

346. Stric se je smel, rekal je kako je istešo njega, kada je prvi put proval nategnut luk, prevarilo. Tri četire dni ga je bolila ruka, ramena i hrbat, ma je istešo svaki dan vadil i vadil, natezal i pušćal, pa poznava natezal sve doklek ni jenoga dneva mogal dobro nategnut luk, ga držat i pomirit priko mirnika va turgu. Jizdislav je svaki dan vadil, natezal i pušćal, ma ni popušćal niti za šćamu. Svaki dan je lagje i više nategnul bogun. Kada ni natezal luk, je gjedal strica kako dela strile.

347. Stric je nasikal trstike ke su već jimile kuruznjačinu i bile jušto dobre za je rabit. Nato je svaku trstiku lipo očistil, ju zmiril i odsikal. Nato je zel užarenu dugu i fanj debelu žicu i šnju prošupjil trstiku. Šupju trstiku je hitil va slanu vodu i ju pustil. Dva dni potlik je poznova zel trstike zi vode, jih ošušil i na zadnji del kolal zaletnice, ke su bile udelane od per od kaluba, guske ali patke. Zaletnice su bile duge kako kazalac. Bile su rizane na kunicu, sprida male, a zada kuntra palčniku visoke. Svaka strila je jimila četire zaletnice.

348. Nutar va šupji del prstenice ali trstenice je klal balice od olova, ke su bile jako dobro zbrušene kako nebi zadinjale kada su se pomicale po strili. Na vrh strile je klal ubadac od jacala, ki je bil kuničast i na četire rubi. Nato je cilu strilu i zaletnice umočil va raztopjeni čelinji vosak i ju klal zi kunicu kuntra zdolu kako bi se ocidila i ošušila. Strilnicu od mehke kože i cinturin je kupil na sajmu.

349. Kada je to sve bilo gotovo, me je pital koliko moren nategnut luk. Otvitil san mu da ga moren dobro nategnut, ma kako mi još vavik tresu ruke ako ga držin više vrimena vajeri. Šli smo provat. Nategnul san luk. Gjedal je koliko i kako ga držin. Pokazal mi je kako moran gjedat priko mirnika i kako mi je zaturgan ubadac od strile.

350. Pokazal mi je kako oko, mirnik i turgan zi turgu moraju bit va jenoj črti. Namistil san strilu, nategnul luk i priko mirnika i turgana gjedal va turgu. Kada san mislil kako je namireno, san pustil strilu. Poletila je i pala jušto pred turgu. Stric se je nasmel i rekal: „Vaja dela meštra, seda kada znaš kako to gre, vadi.“

351. Dan za dnevon san vadil. Luk strila i ja smo postali jeno. Zadinjal san zi strilu jako dobro. Skoro sve strile su zadile va sredinu. Više nisan mislil na turgu, nategnul san luk i brez gjedanja ziturgal. Strila je poletila i kada san čul tupi tofac, san otvoril oči i pogjedal. Držal san nategnjen luk doklek ni oko, mirnik, turgan, strila i turga postalo jeno, nisan pustil strile. Stric je to gjedal i ni niš govoril.

352. Jenoga dana je prišal i kada san mu se pohvalil kako zadinen kamo želin i kadi želin, je zel moj luk, klal strilu, nategnul i pustil, nato je zel brzo drugu i nato treću strilu. Doklek je još bila prva va zraku, ju je slidila druga i treća. Sve tri su jedna za drugu zadile turgu. Nisan mogal virovat svojin očin kako je brzo minjal strile i zadinjal. Poznova san pričel vadit i vadit. Proval san ča prije nategnut, pustit i poznova klas novu strilu. Spričela je to bilo teško, zi vrimenon je postajalo sve lagje i lagje.

353. Nakon nikoliko misečin san postal pravi meštar. Po tri strile su bile va isti čas va zraku i ostočno zadinjale turgu. Po vičeri, kada su svi skupa sidili kolo ognja na ofčjih kožah, san se pohvalil stricu kako zadinjan zi strilami. Drugi dan je prišal stric na konju na skulicu kadi smo vadili. Potiral je konja va trap, potegnul luk, ga va trku namistil, potegnul strilu zi strilnice, dvigal se na strimenih i potegnul.

354. Strila je poletila i zadila turgu va sredinu. Brez besed je odjizdil. Znal san ča mi je delat. Drugi dan je pital strica ko more zet luša i bojni postijak. Stric se je nasmel, vidil je kako netjak dojima ča mora delat kako bi bil bojak ali čak bojan mej svojimi vršnjaci. Rekal mu je neka zeme jenoga od luši. Osedlal ga je zi bojnin sedlon i jizdeć šal na skulicu.

355. Proval je, kako ča je stric pasani dan, va trapu pripravit luk, nategnut ga i klas strilu. Ni mu šlo od prve. Proval je više puti. Na kraju mu je šlo za ruku. Doduše, ni zadinul turge. Strila je šla blizu i se zabila va kup mela ki je bil za turgu.

356. Drugi dan je bilo bolje. Vadil se je i vadil. Nakon fanj vrimena je zi jizdećega konja zadinjal va turgu kako zi tla. Stric ga je više puti koržal hranjen za grmon. Ni mu otil niš reć kako je dobar. Čekal je da se sam pohvali.

357. Jenu večer za ognjen, ki je veselo goril na ognjišću i kolo koga su se stiskali najprije dica, a ondat stariji, je rekal stricu kako dobro turga zi tla i zi konja va teku. Stric ga je pogjedal i rekal: „Vidit ćemo to na Horovo, kada se pripećuju bojnici ki će najboje zadit turgu skrozi uši od sikire.“ Vadil je i vadil. Bil je sve boji.

358. Zadinjal je zi tla, tekuć, hodeć i zi luša ne samo va trapu leh i va halopu. Čul je kako se i drugi bojevnici vade. To ga je sililo na još više učenja. Va sebi je govoril kako ako ne bude bojan, sigurno neće bit ni gorin .

359. Kako se je koštivalo Horakovo je i stric bil sve više na skulici, i stric i on su se pripećivali mej sobu. Prišli su i drugi bojovnici i vadili. Va kratko vrime je skulica bila tako puna zi bojovniki i luši. Sve je vrvilo, se mišalo i stiskalo i ni više bilo mista za prave vaje.

360. Stric ga je jeno jutro pozval i šli su kuntra riki jizdeć. Tamo su udelali turgu od miha koga su nagnjetli zi suhin sinon. Cili su dan turgali zi tla i zi konja. Stric mu je na kraju rekal: „Još je samo par dan do Horovoga, seda ćemo malo počinut, pa ćemo vidit ča će se dogodit na pripetu.“

HORAKOVO

361. Prišlo je Horovo. Dan je bil kako stvoren za slavje. Zora je bila svitla, brez oblačića. Slnce je jako brzo osvitlilo cili kraj. Sve mlado i staro, muško i žensko, je hodeć, na vozih i jizdeć šlo na pojanu pod Horovin bošcen i Kišovu jamu, kadi je svako lito bilo slavje.

362. Jizdislav je, jizdeć na svojen lušu za stricen, gjedal sve kolo sebe. Stric je zbral jedan kraj. Hitil se je zi luša, zabil va zemju sulicu i zanju vezal konja. Jisto je udelal i Jizdislav. Jušto su vezali luši je pričelo slavje. Počeli su tamburat tamburi, rožat rogi i sos sopile. Žrici veli boga Hora, Davora i boga Kiša su skupa zapivali pismu ku je prijel i puk. Cilo poje je razvanjalo od njihovih glasi.

363. Žrici su na luntaru od kamika žrtvovali mladoga telca i udelali žrtvu pajenicu. Dim je hodil ravno zgoru. Oganj je lipo goril i brzo je pajenica bila finjena. Za tin su poznova zakantali pismu zahvalnicu i dali diku bogu Horu, Davoru i bogu Kišu, ki su jin dali obije živine, žit, broskve, ripe i mirlina, i se priporučili naka jih va buduće čuvaju od svih zal.

364. Žene su pričele zimat ujeni zi luntara i jih nosit va zemjanih loncih doma za palit oganj na domaćen ognjišću. Žeravica bi se bila zakutala zi lugon i ondat svako jutro poznova razpuhala i udelal oganj. Poznova su pričele rožat rogi, sos sopile i tamburat tamburi.

365. Ban se je dvigal na božac, zahvalil bogu Horu, Davoru i bogu Kišu i svin drugin bogon i božican, pozdravil svih nazočnih i nato rekal neka se priprave strilci za pripećivanje zi strilu skrozi uši od sikire. Banski osobni zdrug je razčistil strilišće. Zabili su sulice va zemju i jih vezali zi konopon. Odmirili su sto koraci i jakan bojovnika sta klala na sredinu cok va koga su zatajali sikiru i njoj zneli toporišće . Deset koraci od sikire su klali turgu od sena koj je va sredini bil okrugli bilih od črne kožice od kozlića.

366. Prvih deset turgači je prišlo na stupac. Poznova su zarožale rogi. Bojovnici su se pripravili. To su bili sve judi sridnjih lit, visoki po sedan nog, va hrbtu široki po dvi noge, ušpitnih boci i jakih nog, ke su bile obučene va brageše ke su do pol civ bile vežene zi oputu od stupanj. Priko brageš je bila stomanja od stupice, podvežena zi širokin kožnin pason. Stomanja je bila na prsih prerižena. Va razrizu su se vidile šroke kosmate prsa. Priko stomanje je bil kružat od kože.

367. Svaki je za pason jimil po dva široke noža i težicu ali pernu baticu. Na livon ramenu je bil meč. Bulbac mu je bil pedanj nad ramenon kako bi ga se va potribi moglo lagje potegnut zi koric. Na desnon boku je bila strilnica zi strilami. Bile i šare zaletnice su bile pedanj nad rubon kako bi se jih lagje potegnulo zi strilnice. Va rukah je svaki jimil bogun na kih su bili zapeti veržci.

368. Na znak je prvi prišal na mirišće. Pogjedal je vajer i niš promrmjal. Nategnul je luk. Zi tobolca je znel stril, oslinil njoj je zariznjak kako bi lagje i glaje bil odbit od vržca, va zapalčnjak klal stril i namiril. Jedno vrime je čekal zi nategnjenin lukon, sve mišice na golih rukah su bile kako zapet veržac, nijena ni niti zadrhtala, i ondat je pustil stril.

369. Stril je zašvikala, poletila i za mahnuće oka zadila turgu skrozi uši od sikire. Zarožale su rogi i puk je pričel ukat i se veselit. Turgar je znel okruglu kožicu od kozlića, namistil drugu, a onu prvu zi strilu dal turgaču. Svi od njegovoga roda su otili vidit turžnicu i strilu va njoj. Hvalili su ga i govorili kako misle kako bojega neće bit. Jedan za drugin su se redali bojovniki, jedan boji i jači od drugoga. Niki su zadili, niki zgrišili, jedni su bili jadni, a drugi veseli.

370. Nigdi kolo polne je prišal red na kosiza veloga i na Jizdislava. Kosiza su svi poznivali i vidili su kako je jako dobar turgač. Kada je prišal na stupac, je nastal muk. Kosiz je pripravil luk, namiril, kratko vrime zadržal dih i pustil strilu. Strila je zadila va turgu. Puk je zi grmnimi kriki pozdravil zaditak. Kosiz se je naklonil i prepustil mesto svojemu netjaku.

371. Netjak je bil visok, sulit mladić, ušpitnih klci i široke škine. Mišice su mu bile napete i na njih se je vidilo svaku žilicu. Prišal je pripravjen na stupac, pogjedal po mirišću, odmiril turgu i za mahnuće oka pustil strilu. Teška strila je zadila va turgu. Kalal je luk i pogjedal. Vidil je strilu va turgi ka je još drhtala od tofca. Sve se je dogodilo tako brzo da niti turgar niti puk nisu mogli tako naglo akoržit ča se je dogodilo.

372. Nato je nastal veli šušur, svi su nahrlili i pozdravjali i hvalili turgača. On je samo sramežjivo odgovaral kako ni bil niš boji od drugih. Za njin su turgale još nikolike skupine, a ondat se je šlo turgat zi konja, ma samo oni ki su va prvon pripećivanju zadili va turgu.

373. Poznova su turgali slavni bojevniki. Jizdili su na luših ki su bili navajeni boju i povodcu i ki su se na najmanji znak na mistu fermivali, obraćali va smir ku su bojevniki želeli, jizdili va trapu do samoga stupca i ondat noglo stali. Konji su bili visoki, mišićavi, poskokni i brzi. Niki su jimili na čelu bilu paku i bile noge. Drugi su bili posve črni kako saje, treći seri zi bilimi i črnimi pakami.

374. Svaki bojevnik se je ponosil zi svojin konjen. Skrbil se je zanjega ča je više mogal. Svi su bili očešeni, potkovani, kopita namazane zi ujen i spletenu grivu va kiku. Na njih su bila lipo ocvitana bojna sedla. Ocvitane cinture prsač su bile narizane va franže na kih su visili zvončići i balice od oluštrane mjedi. Potrbušnjak je bil zi lipu brozu zategnjen pod prsih. Podrepnjak je bil zavijen va tanku kožicu od kozlića, aš su se bojali zažiranja.

375. Zbande sedla su visile, na jakih cinturah, strimenci od dobro oluštrane mjedi. Po tih strimincih su Hrvuati bili znani po svon okolišu. Pod sedlon je bil ocvitan i na krosnih tkan pokrovac zi koga su franže i cindrići visili zi band. Oglavica je bila istešo posebojno delana za bojne konji. Bila je udelana od najboje naplati i jako lipo ocvitana. Zazubnjak je bil na polovici prekinjen zi dva zazubca zi bande, ke su jizdicu pomogle pri obvladanju luša.

376. Povodci su bile ali od jakih cintur ali pletene od volovske kože. Svaki bojevnik je jimil kožnu fruštu zi tri ali četire mjedene balice na kraju uvik veženu kolo zapešća. Frušta je bila više znak gospostva leh se je rabila. Strile su švigale, švikale zadinjale ali nisu zadinjale turge.

377. Na kraju je prišal na red Jizdislav, petsat sežnji od stupca je nagnal konja va divji halop, ne fermivajuć ga je nategnul luk i va trku pustil strilu. Skroz uši od sikire je zadil turgu drito va sredinu. Suci ki su sudili ki je najboji su jenoglasno proglasili Jizdislava za strilotusa. To lito su se svi složili zi suci i ni bilo nikakovih prepiri ki je bojan.

378. Jizdislava su dvigli na ramena i ga nosili do božca boga Hora i ga seli kraj luntara. Žrici su ga pomazali zi svetin ujen i ga ogrnuli zi lipjen tkanin črjenin kabanon, ki je bil štikan po rubih zi zlatnu žicu. Na livoj strani na prsih je bil hrvuaski znak, pet slebrnih krvadrići ke su bile mej sobu odvojene zi črjenin cviton kabana. Donali su mu zlatnu strilnicu, lipo ocvitano bojno sedlo i isto tako ocvitanu oglavicu i pokrovac za pod sedlo. Bil je va drugon nebu. Stric je bil toliko ponosan na njega da ni mogal skoro govorit od sriće. Mrmjal je: „Na mladih svit ustaje.“

379. Va njegovon sanjarenju ga je prekinul kratki švik, koga je vaje prepoznal, bila je to njegova jubav. Javil se je zi istešin švikon. Dvigal zi trave i ćapal konja pod nju. Znel je sedlo i pokrovac i ga hitil na travu. Konj je zahrzal i šal kuntra njegovomu lušu. Kada su prišli jedan kraj drugoga, su se povonjali i pričeli jis skupa zelenu travu. Ištar je skočila zi konja. Zi lahkin korakon je šla tamo kadi su bili razgrnjeni pokrovi i sedla. Sela se je na pokrovac i gjedala za Jizdislavom.

380. On je luši potiral daje kadi je bila dobra trava. Prignul se je i pobral par lipih rožic, ke su kolo rike cvale, jih posložil zi peri i jih dal Ištar. Povonjala jih je i rekla kako su lipe. Nato su se pojubili, sanjali o budućnosti, gjedali se i poznova jubili. Nakon fanj vrimena, ča se je njin činelo malo, su pripejali konji, jih osedlali i odjahali svaki na svoju stran.

HORDE

381. Jizdislav je prišal va svoju ojat, jedan od časniki mu je rekal kako su ga jiskali. Pital je zač. Odgovorili su mu da su nike horde poharale dva sela od njihovih prijateji Skiti i kako oni pričekuju kako ćeju jih Hrvuati branit. Rekal mu je neka se vaje javi banu, ki ga čeka. Prišal je banu, ki ga je čekal va većoj komardi.

382. Zidi su njoj bile urešene zi oružjen, konjsku armu i pokrovci za konji, ke su bile lipo tkane, od bunbaka i vune. Pokrovci su bile obrubjene zi črno bilin rubon zi spletenu kosu, nutri su bile črjeno slebrne ali črjeno zlatne kvadri, a ono ča je prišlo pod sedlo je bilo škuro črjeno, isto obrubjeno zi črno bilimi kvadrići. Na sred komarde je bila široka bijačina, zbande nje su bile kušini od kože, a va sredini bijačine je bil veli slebrni pladanj na nožicah ke su se mogle spravit skupa kada jih se je selilo.

383. Ban mu je rekal neka side i san je sil na jedan kušin i va kratko rekal ča se je dogodilo i ča se mora čin prije udelat. Jizdislavu je rekal neka spravi bojnu ojat, neka pošalje kanići i teklići i neka budu kosize spravne za boj. Jizdislav se je stal, pozdravil, sel na luša i šal svojin vijornin časnikon. Vaje ko je prišal, je naredil neka se pošaju kanići i teklići po županijah i selih i neka se sve kosize priprave za boj. Teklići i kanići su zi krvavimi mači tekli i jizdili po ciloj krajini i zvali svih sposobnih neka se postroje va kosize. Kada su se zbrali svi kosizi veli, pričela je bojna ojat.

384. Banska komarda je bila osvitjena zi plamenicami ke su bile zataknjene va ležezne tujavići. Svitlost je bila čas jača čas slabija, migala je, hitala hladići po sidećih kosizih velih, osvitjivala zi žutu svitlošću čas jenoga čas drugoga. Padala je po mečih, sulicah, timencih i brancih, osvitjivala čas veružnice, a čas nadci ke su bile poredane kolo zida i obišene na kjinih va zidu.

385. Kosizi veli su bili muži sridnjih lit, odlučnih košćenih obrazi, širokih škin, bili su visoki po šes ali sedan nog. Gole mišićave ruke pune brazgotin su počivale na branicah meči ke su bile va koricah od kože ka je bila lipo orisana zi orisi i prikazi lova i boja. Prišal je ban zi Strilotuson i Jizdislavon. Va par besid je rekal ča se je dogodilo i zač je zazval bojnu ojat. Svaki od kosizi velih se je malo nakašjal, odćaral i rekal ča je mislil. Nakon pol ure su se svi ziredali i rekli ča su mislili.

386. Odlučili su se kako se mora pomoć skitskin naselbinan aš su seda Skiti dil njih samih. Odredili su kako će Jizdislav s pomoću staroga iskušenoga kosiza veloga Strilotusa vodit hrvuatske kosize. Kosiz veli uhodice je ostočno poručal o hordi ka je napala na skitske sela. Rekal je kako su to manji judi, podobni Momulon. Jako su brzi na svojih malih konjićih. Dobro turgaju zi strilami i jako su spretni va boju zi sabju. Nimaju bojnih vozi ni atalic ni pišci.

387. To je veća skupina ka napada bez dobre ustrojbe i pjaška sve ča najde. Uhode su jizdili deset dni jizda i nisu vidili većih sel ali tabori. Uhode jizde daje i ćeju poslat poruku svakih deset dan po kaniću i poručit ča su vidili i našli. Bilo je odlučeno kako sve postrojbe va Hrvuatih moraju bit pripravjene aš se nikada nezna ča more bit zada.

388. Drugi kosizi zi ishojskih band su poručivali o svojih kunfinih i susidih, ki su, osin manjih kraj, bili mirni. Jizdislav je nato dodal kako bi na svaki fin otil jimit uz sebe Strilotusa aš on je najiskusniji bojevnik va Hrvuati i će ga znat svitovat. Nakon nikoliko ur je bila bojna ojat končana. Zjutra nazoru su se počele spravjat prve satnije.

389. Visoki bojovnici va punoj bojnoj spremi su na svojih visokih tankonogih konjih jizdili simo i tamo, avizevali jedan drugoga kadi je ča i kadi se more još ča dobit za zipopunit bojnu opremu. Kovači su jimili pune ruke posla zi potkivanjen konji i popravjanjen vozi. Satnija za satniju su se postrojile i ustrojile trosatne, bojne, trobojne i kosize. Časnici su na svojih luših stali sprida svojih postrojb. Vijorni časnici su se skrbeli za jizbinu i pričuvu. Efuri su spravjali alat na vozi i sve pripravjali za primošćivat ali pribrodit potoki, rike i jezera ako bi jin se našle na putu.

390. Časnici su udelali obhod svojih postrojb, pregjedali oružje, strile, luki, oštrulci, sulice i meči. Va isto vrime su pregjedali i luši i njihovu ormu. Bojne vozi i atalice su bile klajene na jenoj bandi i za njih je skrbel kosiz.

391. Kolo polne su prišli ban zi župani veli i župani. Banski kosiz je zapovidil postroj. Sve satnije su se poredale jedna zada druge. Tri satnije su udelale trosatnu, tri trosatne bojnu, tri bojne trobojnu, tri trobojne kosizu, tri kosize kosizu velu. Sprida svake postrojbe je bil satnik i njegov zaminik.

392. Zada njih su bili tri kanići ki su jizdeć nosili poruke kada je rabilo. Sprida svake trejsetače su bili trejsetači, a zbande svake desetače desetači. Jizdislav je rasporedil kozizu za kosizu, odredil čelnu kosizu, zbandne kosize i zadadnu kosizu. Va sredinu je klal bojnu ojat, efuricu, vijornicu, atalice i bojne vozi. Na Jizdislavov znak je bojnica pojizdila.

393. Šli su najprije zi korakon, a ondat su pojizdili va trap. Večer su bez larme i ognja nahranili konji zi zobnic i polegli svaki uz svoga konja, ki je bil vežen za oštrulac ali sulicu. Tabor je zi jene strane bil omejen zi fanj velu riku, a zdruge bande je bilo ravno poje. Noć je bila mirna bez dišturba.

394. Na svitlac su već bile sve luši nahranjenje i napojene. Bojovnici su bili pripravjeni, svaki je jimil pun mišćić vode i samo su čekali znak za osedlat luši i pojizdit naprid. Brzo je svitlac zaminjala zora. Prišla je zapovid „pripravi se “, par minut za tin „zajizdi “ i nato „hoj “. Bojnica se je kako jedan šlovik pomakla. Šli su va hoj i brzo za tin va trap.

395. Mučeć su jizdili obhodeć sela o kih jih je avizevala uhodica. Prije zahoja su poznova udelali tabor blizu rike, nahranili i napojili konji, jih pustili neka pasu par ure i nato su jih vezali. Bojovniki su zi pokrovci i čivejami udelali sebi lego i, trudni od cilodnevnega jizda, zaspali. Straže, ke su se minjale svakih par ur, nisu akoržile niš posebojnoga. Nakon jeno petnaes zahoji, jenoga jutra je bilo kako i pasani dan. Brzo su zajizdili i partili naprid.

396. Kolo polne je uhodica javila kako raztresene pahji, horde, pjaškaju, ubijaju i kradu naokolo. Jizdislav se je sporazumil zi Striloslavon i postrojbe rasporedil va bojni postroj. Zi boki je klal dvi kosize vele, va mezdrici je ustala banska kosiza, a zdada su bile tri kosize vele ke su bile va pričuvi. Svaka kosiza vela je na krila poslala krilne trobojne ke su pomalo obkoljivale prostor kadi je uhodica vidila tabor horde.

397. Krila su se zaplele va boji zi raštrkanimi postrojbami horde i jih razgnala. Jizdislav je zapovidil brzi trap i opkojivanje tabora. Prišli su na jenu vrstu od tabora. Va taboru horde je prišlo do uzbune. Bojevniki su se pričeli postrojivat. Premešćivali su se zi jenoga kraja va drugi, na kraju su se postrojili i pripravili za se branit.

398. Jizdislav je poslal kanići va krilne trobojne neka one napadu prve od boci i od zada, neka turgaju zi strilami i kada sturgaju zadnju strilu, neka va zrak sturgaju deset zapajenih stril. Nato će banska i krilne kosize sturgat strile i va halopu ćeju svi skupa naletit na tabor. Krilne trobojne, čin su dobile zapovid, su pričele z napadon.

399. Tisuće stril je poletilo na suvraga. Hordini bojovnici nisu vaje doumeli ča se dogaja. Pričeli su se pokrivat zi branci, skakat zi zadinjenih luši i se stiskat va veće skupinice, ke su se ondat mogle lagje obranit od stril. Jušto je turganje malo fermalo, je glavnina vojske, va brzon trapu, prišla na strilomet i poznova poškurela nebo zi strilami. Čul se je silni „ura“ i sva jizdica je va halopu pojizdila kuntra hordi.

400. Svaki bojevnik je zi dvignjenin mečen juril na svoga suvraga. Bojne vozi i atalice su zi stran letile kuntra onin ki su bižali i jih pohitali po poju. Čelne kosize su se va sredini tabora trefile zi bočnimi kosizami. Bojovnici su se još jedan put obrnuli i va lahkon jizdu gjedali ča se još kadi miče.

401. Tabor je bil posve unišćen, luši su brez svojih gospodari stale ali hodile naokolo. Oružje, konjska orma i deli tend su bili svuda naokolo. Hordini bojovnici su ležali mrtvi ali ranjeni naokolo. Ranjeni su zapomagali va nikon čudnon zajiku. Satnici su zapovidili neka se svih mrci klade na kup, svih ranjenih neka bahorci previju i koliko moru liče. Nato su pobrali sve oružje i konjsku ormu, pobrali ča je bilo dobro po taboru i šatorih, sve skupa klali na vozi i počistili mirišće.

402. Va taboru je bilo hranjeno pod razrušenimi šatori i va zemunicah više od dvisto žen i divojak i kolo sto zi verugami veženih muških. Svih zarobjenih su lažvali. Žene i divojke, aš su jin bile sela zognjane i obiteji poklane, su šle zi vojsku, a niki od sužnji su šli po svojih putih, doklek su drugi šli istešo zi vojsku. Sužnji su bili od svih stran svita. Niki su bili zi Rusije, niki zi Turkestana, jeni zi Feničije, a drugi zi Misira. Svi su pravjali kadi jih je horda zasužnjila i ča su sve morali delat za hordu.

403. Rusi su bili jaki judi zi dlgimi črjenimi bradami i mustaćami, tako da njin se ni nunkis dobro vidil obraz. Obučeni su bili va dlge haje, rubaču i široke brageše. Na nogah su svi jimili škornje. Glavu su jimili pokritu zi šubaru od ofčje kože, ozgora širu leh je to glava i visoku dvajsetak prsti.

404. Turkmeni su bili lipo obučeni va široku košuju ku su kladali va brageše. Brageše su bile spodaj široke i vezivale su se kolo kičice. Na nogah su jimili, zavijene sprida prsti, stupanje brez taka. Priko svega su jimili kaftani ke su bile fanj šporke, aš su od kada su jih zasužnjili delali, spali i živili va iston.

405. Feniči su bili obučeni va maje od vune i savijeni va dlge šijali ke su veživali zi pason. Na nogah su jimili vunene kalcete i postole od suha.

406. Misirci su bili obučeni va kože od koz i ovac, kolo boki su jimili do kolina kamižoti ke su se preklapale priko rubi i kolo pasa su jimili širok pas od stupice. Na nogah su jimili nikakovu obuću od kože ku su sami veživali kolo nog. Jedan od njih je znal niš malo govorit po hrvuasku. Govoril je više zi rukami i zi moti leh zi usti. Po pogovoru su ga sigurno jako bolile noge i ruke.

407. Uhode, ki su znali po više zajiki i ki su vavik govorili: „Koliko zajiki znaš, toliko vajaš“, su se zi lažvanimi sužnji pogovarali i kuntreštali i nastojali od njih ča više doznat. Večer kolo ognja su bile vele debate o svemu i svačemu. Uhode su se vavik delale pol šolda bedaste i više pitale i habale leh govorile.

408. Zi jenin Fenikon ki je bil likar se je jena uhoda zaplela va čudan diškorš. Uhoda je tvrdil da je srce glavno za živjenje, a likar kako su možgani ti ki odlučuju o živjenju i smrti. Ganali su se cilu noć i na kraju su ustali svaki na svojen. Kada su već hodili spat svaki pod svoj šator, je likar još vavik tvrdil: „Možgani, možgani su ti ki te drže na živjenju.“

409. Svih mrci svojih i hordinih su zakopali, svakih va drugu jamu. Ubijene konji su oderali, meso razdilili i sve nerabno važgali. Plin su klali na više vozi i pokrili zi ponjavami. Lažvanih sužnji su pustili neka gredu kamo ćeju.

410. Postrojbe su šle va lahkon jizdu kuntra riki. Tamo su udeli tabor, postavili straže i čekali noć. Drugi dan su se naputili nazad va domovinu. Sada su pasivali skrozi nasejena mista i svuda su jin davali kruh i sol i zahvajivali jin aš su zi njihovih mejaši zignali suvraga. Doma su jimili velu feštu na Horovu poju. Popili su zamrlinu za svih svojih bojnici ki su poginuli va bojih i ondat šli svaki svojoj komardi.

411. Jizdislav se je lipo opral, obukal čistu robu i šal pogjedat kako i kadi je Ištar. Kada je prišal do njihove komarde, su ga mat i hći najprije pitale kadi su jin sini i brati. Jizdislav jin je odgovoril kako su se junaški borili i kako su pasali samo zi nikoliko posikotin po rukah i kako još uvik slave premagu zi mladimi bojovnici. Rekle su mu kako vide da je on dobro i neka pride knjin va komardu. Hitil se je zi konja, ga vezal za oštrulac koga je zabil va tež i šal va komardu.

412. Sil je na kušin od kože i prekrižil noge. Mat i hći su ga pitale kako je bilo i sve ča se je dogajalo na mirišću. Jizdislav ni bil od velih besid. Na kratko je rekal kako su osabatali suvraga i ga potirali zi ishojskih mej. Rekal je kako misli da se više neće nijedan ufat napas na Hrvuatistan aš će se čut dugo naokolo kako su Hrvuati kurajni i junaški bojovnici, a na takovih se ne napada zlahka.

413. Počastile su ga zi vinon. Popil je žmuj črnoga gustoga i dišivoga vina, koga mu je zi žarice natočila Ištar, stal se, lipo zahvalil i šal va bansku komardu. Tamo su ga već čekali kosizi veli, kosizi, trobojnici, bojnici i drugi časnici ki nisu bili va službi. Prvo ča su vidili je bilo da je banska komarda mala i kako bi dobro bilo ovu proširit ali zgradit novu velu, široku i visoku, va koj bi mogli svi komodno stat. Cela komarda je vonjala po konjskon i juskon potu i zašušenoj krvi.

414. Čuda časnici je jimilo povijene ruke, glave, prsa i noge. Čuda od njih se je upiralo na sulice i meči. Prišal je ban. Zahvalil se je svin nazočnin na svemu ča su udelali va boju. Popili su zamrlinu do polovice žmuja, ostanak zlili za škinu i ondat se pomolili za svih mrtvih. Nato su seli zi prekriženimi nogami na konjske kože ke su bile poredane kola zida.

415. Počelo se je slavje va čast premoći. Prnesli su pečeno meso od vola ki se je pekal i vrtel na ražnju, friški kruh zi peće i mihi pune črnoga gustoga vina. Niki su jimili slebrne, zlatne i kositrene žmuji, a drugi su jimili dobro očišćene kravje rogi ke su napunili zi vinon. Ban je svin nazdravil, popil žmuj do polovice, a drugu polovicu prolel za škinu, za slavu boga Hora, Davora i Kiša. Gangalo se je, kantalo i zabavjalo tri dni. Časnici su se minjali, a isto tako i bojovnici.

416. Treći dan su podilili plin. Najveći dil su dobile obiteji poginulih va boju. Ni se gjedalo ali je poginul Hrvuat, Sumer, Hiks, Skit, Rusjan, Obr ali Ant, svi su bili jednaki i svi su poginuli za jistu stvar. Sve ča je ustalo su podilili po kosizah. Bogu Horu, Davoru i Kišu su udelali žrtvu pajenicu.

VELI OBHOD NA DONU

417. Večer na ojati kadi su bili svi kosizi veli i župani veli su stabelili kako ćeju nakon misec dan udelat veli obhod va kon ćeju bit nazočne sve bojne rodi. Odlučili su kako ćeju poć četire kosize vele i efurica tri vrste uz riku Don i ondat ćeju va bojnih postrojih, svečano jizdeć, prit pred hlmac na kon će bit ban, hrvi, sindiki, sindičići i kadi će jih čekat puk.

418. Jizdislav je jimil pune ruke posla i punu glavu skrbi. On je zi bansku ojatju sve pripravjal. Najprije je naredil kosizon neka pregjedaju sve oružje, bojne vozi, atalice i stroji. Nato su morali svi časniki i bojovniki uredit odore, nadci, kabani, timenci i oružje. Luši su morale bit najboje ča su jimili. Počešene, podkovane, oluštrane oglavice, postijaki i strimenci. Sve cinture su morale bit pregjedane, oluštrane i pošijene. Vadili su po cile dnevi kadi mora ki stat i za kin će ki poć.

419. Natezali su se kolo bojnih vozi, kih je svaka kosiza jimila po petsto, i atalic, kih je bilo po dvisto, zi ke bande jizdice će bit, koliko će bit razmak mej jenu i drugu satniju i ki će bit zi live, a ki zi desne bande rike. Kada su se kolo svega složili, je prišla na red efurica.

420. Posložili su na zravnanon podu tristo dašćic ka je svaka prstavjala ormanicu i jih više puti prerasporedili doklek se nisu složili kako će ka vozit kuntra hlmncu i stabelili kadi ćeju se, jena čekajuć drugu, posložit od jenoga briga rike do drugoga va dvih redih, kako bi mogle kosize zi livoga briga priko mosta prit na desni brig i ondat ćeju svi skupa projizdit i provozit se sprida bana.

421. Sve ormanice ke nisu vozile robu do mora su potegnuli na kraj po rodulih. Zravnali su jih, podprli zi band zi daskami. Zneli su van bukaporte i pod kuvertu pajoli, dobro osekali santine, oprali sve pod kuvertu i ondat pustili neka se osuši. Zvana su sva blak zognjali i ga zigulili. Oluštrali su art sprida prove i očistili visoku aštu. Sve okovki su pregjedali i ako je bil ki nevajat, su ga prominili.

422. Pregjedali su madiri, bišive prominili zi novimi. Oj su zneli zi kanjoli, lipo ga očistili, pregjedali rigetu od spodaj i ako je bila dešvana od ruzine, kambijali. Pulenu na vrh ašte su ostrgali, oprali i posušili. Kada je sve bilo urejeno i prominjeno, su cilu ladu ocvitali. Najprvo su ocvitali pulenu. Cviti su bile jako žive i vidile su se zduga. Nato su ocvitali aštu i ražme .

423. Škermadure su pustili va naravnih cvitih drva. Ondat su klali na mista oj i pričeli blakat boki i šotnji dil oja. Kordun su ocvitali zi črjenin cviton, a zi žutin gorinji dil oja. Langoru su premazali kako i škrmaduru, zi rastopjenu smolu. Kuvertu i bukaporte su ostrgali, zastupali i premazali zi smolu. Istešo tako su udelali zi pajolon na provi i na krmi.

424. Šoto pod pajol od prove su klali mujačicu zi smolu. Na bandi sprida na provi je bil hućak va ki je hućban tukal i daval huć rugačen. Sve vesla su ostrgali i jih namazali zi rastopjenu smolu. Prominili su sve konopi i zakučki ke su držale branci. Kada je pesima bila finjena i ocvit suh, su ju rinuli va vodu i poleli, aš bi se mogla drugač rasušit. Jenu za drugu su tako uredili sve ormanice. Svako jutro i večer su jih polivali kako se nebi rasušile. Slično kako zi ladami su učinili zi veslačicami, čuni i kajići.

425. Na isti fin su uredili sve atalice i bojne vozi. Vozači na atalicah i bojnih vozih su po cile dnevi čistili, popravjali i zaminjevali dili. Kovači su jimili pune ruke posla. Minjali su rigete na kolih, obruči na glavinah, škare na spridnjih i zadnjih stapkah, taki na zavirah i udlagice zi verugami na ojićih. Vretena su namazali i provali kako kolo kola. Sve železne dili su oluštrali i namazali zi paklon. Zi glavin zu zneli svidrače, bojeć se slučajne nesriće.

426. Bojovnici su očistili i precvitali branci, zaminjali cinture i oluštrali jabuku i okov. Sve odore su bile oprane, okrpane i pripravjene. Vrime je brzo kurilo i prišal je dan pred obhodon. Večer je svitil Misec i žoldanon osvitjival cilu pokrajinu. Prve su zaveslale uzvodno ormanice, rasporedile se i hitile sidra. Malo prije svitlaca su šle va pohod kosize. Kada su prišle na odrejeno misto, su dvi kosize priko mostin ke su bile premošćene priko ormanic šle na livu banu rike.

427. Zazorilo je. Nebo se je ocvitalo zi svimi mogućimi ocviti od modre, njade, črjenkaste i žutkaste boje. Modrilo se je brzo precvitalo va rumenilo i ondat va žutilo. Zada brižića su se probijale traci Slnca i brzo pozlatili cili kraj. Sve ocviti neba su se zrcalile va mirnoj i linoga teka ričnoj vodi. Brigi su njoj bile ritko prerasle zi grmi gloga, trna i akacije. Ovdi i ondi su bile dubašnice, glabrovice i jesenice zi visokimi stabli dubca, glabra i jesena. Ovdi i ondi je bil ki god visok jablan i po ka joha, čije pera su stalno trepetale i na najmanjoj sapici vitra.

428. Brzo su premostine pospravili, ormanice ustrojili va bojni red. Na prvoj ladi je bil sprida plovban banski, ki je zi vijorami daval bilihi svin drugin plovbanon na ormanicah. Korbani, ki su bili na provah svojih brodi, su davali zapovidi ojbanon i hućbanon. Po huću su ravnali rugbani zi veslači.

429. Jidban je bil na krmi kraj ojbana i mu pomogal ako je bilo potriba. Pazil je i na vijoru, ka je bila na štandarcu na livoj strani krme, i na bakju, ka je bila zataknjena va železnon zaručju na desnoj strani krme i ka je uvik gorila kada je ormanica bila na vojnoj zadaći. Bakja je bila va ležeznon potu nasajena na ratišće od tvrdoga dubca. Va potu je bila pilotina natopjena va uju i smoli i pomišana zi halon.

430. Z prave bande ojbana je bila zatajana va cok, težica. Lipo ocvitane branci su bile fermane na vanjskoj strani ormanice i zašćikane zi kjini. Na nutarnjen kjinu pod škermaduru su bile obišene arabeli i meči. Veslači su sidili na bankih. Zi nogami su se upirali va uporače, ke su bile na pajolih, pod banki. Banski kosiz, ki je bil sprida postrojenih kosiz velih na desnoj strani rike, je dal znak zi mečen.

431. Plovban banski je dal sinjal zi vijoru, tada su isti bilih zi vijoru poslali svi plovbani, korbani su odgovorili kako su vidili bilih i obhod je pričel. Na hlmcu je bil ban, župani i kosizi veli i kosizi kosiz ke nisu bile va obhodu. Kolo hlmca je bilo toliko puka i ni mu se vidilo kraja. Čudo dičine se je nagnjetlo kolo brižin na riki i zi jene i druge strane puta kadi su morale pasat postrojbe.

432. Sprida svake kosize je bil va lipo ocvitanon bojnon vozu kosiz veli. Zaprega je jimila tri luši. Luši su bile prelipo armane, urešene komata, ke su na kunici jimile čubranice i čufići. Komatnjak je bil zlatno ocvitan, na njen su bile kolombarići od dobro oluštrane mjedi. Sve cinture su bile od jake volovske kože, ka je bila dobro oluštrana i podmazana zi tukon od puha. Ojići su bile od jesena, jistešo ocvitane zi zlatnin cviton.

433. Luši su ponosno, malo kriveć vrat, bočno, svaki na svoju stran vozile voz. Za njin su bili vijorni kosiz veli i ondat njegovi kanići, hrvi i sindiki, va isteših vozih, samo su cviti bile različne. Par dužin konja odzada je bil kosiz zi svojimi vijornimi časniki, pet konji za njimi je bil sprida trobojne bojnih vozi trobojnik zi svojimi časniki, na to je poznova tri konji ozada bil bojnik prve bojne bojnih vozi. Za njin je šal časnik prve satnije.

434. Ondat je va dvoredu šla satnija za satniju. Luši su bili ponosni i gordo su savijajuć vrati i visoko dvigujuć noge zi čubranicami od nojevih per na oglavici, va hodu, potezali svoje vozi. Za prvu bojnu je šla druga i za nju treća. Za bojnimi vozi je šla trobojna atalic. Sprida je bil trobojnik va svojen bojnon vozu zi svojimi časnici i kanići, ki su zband jizdili na svojih lipih mladih konjih. Sedla su jin bile lipo urešene zi zlatnimi našitki.

435. Pod sedlon je svaki jimil pokrovac od bunbaka i ofčje vune ki je bil prešit i ojačan zi balicami od mjedi, ke su čuvale luša od tofca zi kopjen, mačen ali sabju. Svaki je na povodcu pejal još jenoga istešo opremjenoga konja, uz onoga koga je jizdil. Niš malo za njimi je šal prvi bojnik atalic, onda časnik, a za njin su šle atalice zi koši od dasak crnoga cvita, ke su branile turgači od suvragovih stril. Svaka je jimila četver zapreženih konji i po dva vozača. Svaki luš je bil na vlastitoj zapregi i se je mogal va svakon mumentu odvezat. Za prvu bojnu je šla druga i ondat tretja. Za atalicami je prišla jizdica.

436. Sprida je bil kosiz i njegovi časnici. Z boka su jin jizdili kanići. Svi su bili na lipih, visokih, tankonogih konjih, sulitih trbuhi i jakih prs. Odore su jin bile kako zrizane. Jizdili su zi korakon i činilo se je kako su luši i judi od jenoga komada. Nikoliko dužin luša ozada je jizdil trobojnik na črnon murvaston lušu zi bilu zvizdu na čelu i bilih podkolinic. Konj je cilo vrime krivil vrat i kladal glavu nabandu, masteć zi kopiti. Luš ni bil navajen hodu aš je uvik zi gospodaron bil va trapu ali halopu.

437. Zada njega je bil bojnik prve bojne, visok, sulit, širokih ramen mladi muški zi črnimi dugimi brki i kako svi zi kiku na glavi. Onda je jizdil satnik na svojen rošavon lušu zi črnu zvizdu na čelu. Za njin je va četredu jizdila prva satnija, ondat druga i tretja. Kada je pasala prva bojna, njoj je slidila druga i treća. Kada si jih gjedal, ti se je parelo kako su svi jednaki i kako svi va huću jizde visoke, tankonoge konji širokih prsi zi stišnjenimi trbuhi. Va hodu se je parelo kako da valovi more.

438. Timinci ke nisu bile pokrijene zi krpami su se luštrale i šajnale na jutarnjen slncu. Veružnice su se isticale na bilih stomanjah. Črjene kabani, ke su bile zi prsačami zapućene na prsih, su bile zaškinu i samo na pol pokrivale gorinji dil tula. Svaki je va desnoj ruki jimil dlgu sulicu ka je bila naslonjena na desnu nogu va strimencu.

439. Pod bušcen je na sulici bila vijora na črjeno slebrne kvadrići. Na vitriću su vijore vijorale i šuškale kako roj čel. Svaki bojevnik je na škini jimil meč i njegov bulbac je pedanj stršil nad livin ramenon. Va tulcu na postijaku je bil klajen duplo savijen luk i uz njega strilnica zi strilicami. Sprida na postijaku je bila obišena težica i z druge strane mišćić zi vodu.

440. Pas su jimili siroko povijen zi črjenin pason za kin su bile klajene noži. Sve cinture na luših su bile namazane i oluštrane i pokrovci oprane, a oglavice urešene zi brončanimi balicami. Kolo desnoga zapešća je svaki bojovnik jimil fruštu ka je na kraju jimila tri brončane balice ke su bile oluštrane i su se šajnale na slncu.

441. Za prvu bojnu je šla druga, ondat treća i ondat poznova trobojnik i druga pa treća trobojna. Za prvu kosizu velu je šla druga va istešon sastavu i zada nje su šle teške stroji, hitače, strilometi, svidruje i pokrovate. Stroji su bile na teških vozih ke su potezale vitoroge voli. Kola na vozih su bile široke i zi jakimi rigetami. Hitače su potezale voli va četveru, a strilometi i svidruje po dva vola va paru.

442. Voli su bile mišje dlake zi svitlimi gubicami. Rogi su jin bile dlge i savijene zi brončanimi obručići na pol roga. Pačenki na nogah su bile podkovane zi zavijenimi podkovami. Zada njih je ustajal i ako je zemja bila pogažena od bojnih vozi, atalic i konjskih kopit, širok kolnik.

443. Zada svih je šla uhodica. Oni su bili obučeni va svagdanju robu zi črnimi, sivimi i kafenimi kabani. Jahali su na konjih, mazgah, mulah i tovarih. Glave su jimili pokrijene zi rubci na bakarku. Svaki je jimil mišćić zi vodu, mošnju za jilo i nož ili težicu. Oni nisu bili va redu, svaki je jahal po svoju i puk se jin je vavik smel aš su delali bravure. Njihov glavar na glavi je jimil rogi od praza i kada se je obraćal, je vavik blel kako brav.

444. Va uhodici su bile i ženske, ke su bile lipo obučene va črne kamižoti, bile hajice, črnin ali črjenin njidracen i zi rubon ki je bil istešoga cvita kako i njidrac. Jahale su na lipih konjih. Za postijakon su jimile duplo savijen luk, strile, težicu i zapason nož, zbande je bil savijen i vežen na doćap ruke kaban. Zbande cile obhodnice su tekle bile, visoke i sulite pasi lovačine na črne pake, ke su vavik kumpanjale bojnicu kamo god se je primikala.

445. Kada su ormanice prišle na bilih, su zatuturale tuturače, zarožale rogi i zasople sopile. Brzo su, čekajuć jena drugu, se postavile va dva reda, hitile sidra, se mej sobu povezale i vezale konopi na brižini. Ormanci su spravili vesla. Nato su efuri brzo tekuć postavili mostine, fermali jih i ondat je, zi live strani priko mostin, pasala prva i za nju druga kosiza vela zi svimi bojnimi vozi, atalicami, stroji i jizdica zi konji priko na desnu stran. Bez fermivanja su va hodu ustrojili osan redi i šli va obhod pred bana.

446. Pred banon je svaki zapovidnik i časnik va znak pozdrava dvignul meč i šnjin zasikal zrak kuntra banu. Gjedajuć va bana je udelal desetak koraci i ondat se je obrnul naprid i šal na veli prostor koga su jimili odrejeno za počitak. Jizdica je pozdravila zi kalivanjen sulic kuntra hlmcu, kadi je bil ban.

447. Strojnici su stali na vozih blizu svojih stroji i pozdravjali zi dvizanje desne ruke na livu stran prs. Uhodica je pozdravjala svaki na svoj fin i nasmijevala puk i onih ki su bili na hlmcu. Kada je obhod pasal, je ban z bansku postrojbu i časnici zajizdil luši i šal va sredinu bojnice. Još jedan put je svih pohvalil i svin zahvalil za sve ča su udelali.

448. Naokolo poja su se vrtili i pekli na ražnju voli, janci i kozlići. Va kotlih se je kuhala riba i kotlovina. Kruha je na vozih bilo cile gore, dišal je i zi svojin vonjen mamil na jizbinu. Konji, bojne vozi, atalice i vozi zi stroji su sve šalvali i jih pustili pod stražu, a svi drugi su se veselili, pili, jili i se jubili sve do zore.

449. Kada je to sve pasalo, su se tornali svagdanjen živjenju. Delali su, lovili, orali, hranili živinu svitkovali i se veselili živjenju. Jizdislav i Ištar su rekli materi i stricu od Jizdislava, aš Jizdislav ni jimil starijih, kako se vole i kako bi se oženili.

DOBRINJEVO

450. Prišlo je Dobrinjevo i skupa zi drugimi su i oni stali pred žrici boga Hora. Žric jih je pogjedal i po obredu su šli jašuć kako i svi drugi na bilih luših za dvi, tri ure va škuribandu. Tornali su se, prišli na feštu i ondat su šli spat va posebojni šator. Jutrin su sve ženske prominile rubi i svaka nova obitej je šla va već prije za njih pripravjenu komardu. Živjenje je teklo po staroj kolotečini.

451. Pasivale su dnevi, šetemane i miseci. Pal je prvi snig, Dani su postajali sve kraći i prišal je najkraći dan i najduja noć. Tada se je slavilo božicu zime Moranu. Njoj va čas se je udelala žrva pajenica. Večer su se po svih selih i mistih palile vele ognji, aš je Slncu rabilo dat moći kako bi poznova pričelo teplit zemju i njoj dalo novo živjenje.

452. Ognji su palili falaši i falašuje. Hitali su na oganj sve šmahje ča bi bilo ustalo kada se je hranilo živinu. Kada bi bil oganj škorlal, bi bili falaši i falašuje skakali priko ognja i tako bi bili diventali mladići i divojke. Kada bi bile ustale, samo ujeni su na njih pekli meso, ripu i mirlin, tancali kolo žeravice i se veslili.

453. Žene bi bile va lončene poti klale žeravicu i ju nosile na domaće ognjišće kadi bi ju bile zakutale i ondat drugi dan od nje delale oganj. Kada bi se bilo jilo, se je kol ognja vavik pušćala zdilica zi niš jistvine za duha lara, ki je bil čuvar žeravice i ognjišća. Pod krov se je obiševalo niš sušenoga mesa, ko je bilo za duha komarde, penata.

454. Za živinu se je delalo strišnice ke se je pokrivalo zi trstiku ali slamu i pod kimi je bila va jati. Strišnice su zi ishojske strane bile tik do zemje. Na zahojnoj strani su bile dvignjene na sohah i gredah, ke su bile više od dva sežnja tako da su nutar mogle i jako vele luši i voli, a ne samo drobnica.

455. Čin je pasala zima, se je pričelo orat poja i sijat šenicu, rž i žito. Kada se je to finilo, su stabelili poć delat velu novu banovinu. Pozvali su judi ki su gradili palače još va Inperiju. Udelali su načrt. Na daskah narisali kako bi morala palača zgjedat i ča ćeju sve rabit za ju udelat. Na jenon hlmcu su na zemji zakrojili jako velu kuću.

BANSKI DVORI

456. Vrata i okna je jimila obrnjene kuntra sorinju, a zadada je bila obrnjena kuntra urinju, po starih hrvuaskih užancah, kih su se vavik držali. Zravnali su zemju i doklek su jeni kopali temeji, su drugi na velih kargacih na vlačicah pejali kamenje i ga klesali i fožali. Treći su udelali velu peć va koj su pekli kupe za krov i matuni za tini, volti i pod. Četrti su pejali otešene grede i razpijene daske zi gvozda, ke su najprije močili va blatinu i vodi kako nebi razpucale i jih slagali na kup.

457. Les su dvigli od zemje i med grede i daske klali mezomuralići. Tako je vitar sušil drvo i ga pripravjal za armaduru i za ga ugradit va podi i krov. Četrti su udelali japjenice i jih pričeli žgat. Živo japno su zadušili polivajuć ga zi vodu va jami blizu gradilišća. Kada je sve bilo pripravjeno, su pričeli najprije zi fundamenti. Na livi kantun od kuće pod ogulski kamik su klali va potić od zemje zlatni prsten i zlatnu podkovu i ondat su na to klali kamik.

458. Nato su ga pokrili zi meltu i pričeli zidat. Kamik do kamika su nosili na čiverah i pričel je rast zid. Kada su zid dvigli za deset nog, su udelali zub nanjega položili pripravjene grede. Na grede su klali daske i udelali pod. Nato su zidari poznova dvigli zid za osan nog, poznova klali grede i daske i dvigli zid još za tri noge i dvigli zarebak, ga pokrili zi daskami i ondat na daske klali kupe ke su fermali zi meltu. Nutri su cilu kuću podilili doli na dvi dvorane, a gori su udelali sobe za upravu i bana.

459. Kada su pokrili kuću, su na dimjak, ki je bil va sredini krova, klali odsičenu kitu od jesena i udelali lukanje. Tri dni su na podu kuće gorili oganj i hitali svako toliko zelene kitine od bora i šmrik, tako je dim zadimil sve va kući. To su udelali na čast boga Vojtuha, ki je šćitil od rušenja. Na sriću kuće su popili po žmuj vina i kus kruha zi solu.

460. Pod su šoto pokrili zi matuni, ožbukali i obilili sve zidi, na zidi obisili zaplinjeno oružje, konjske sedla oglavice i na sred zida dvi prekrižene sulice zi dlgimi vijorami na kvadrići. Va sredini mej prekriženimi sulicami je bil lipo ocvitan branac koga je nosil ban kada se je šlo va boj. Po podu su bile posvuda vele bijačine i volovske i konjske kože. Kolo zidi va dvoranah su bile poredane kušini od kože ke su bile napunjene zi vunu. Na zidih su bile železne kjini na ke se je obišivalo kabani i oružje kada se je hodila na ojat.

HOROVO

461. Ban je kada je bilo bilo ča važno posebojno zazval bojnu ali županijsku ojat. Bojna ojat bi se bila zazvala svaku misečinu, a županijska, na ku su hodili samo župani, svaku drugu misečinu. Banska ojat, na koj su bili svi kosizi veli i svi župani veli, se je zazivala svake tri misečine.

462. Kolo Horovoga božca su va kolu bile zgrajene palače za sve potribe bana, banovine, županije i bojnice. Kako je zi svakin misecon rabilo sve više hrvi, sindiki, čarki, badrači i drugih, su se pričele gradit palače va drugon, trećen i četrton redu.

463. Horovo, kako su ga zvali, je diventival sve veći i lipji. Župani su po svojih županijah pričeli istešo gradit kolo božci boga Hora, Davora, Kiša, Dobrinja, Peruna, Visle, Aštur i drugih va kolu kuće ke su rabile za potribe županij. Tako je nastalo sve više i više gradići i gradi i jedan dil judi se je zi sel preselil va gradi. Oni nisu mogli obdelivat zemju i hranit živinu i zbog toga su te gradi jimile svoje trgi, na kih se je moglo kupovat ono ča je komu rabilo.

464. Živjenje je šlo va svoju kolotečinu. Ištar je rodila dite. Mali je bil lip kako rožica. Mat je skrbela zanjega. Baba ga je čuvala kako oči va glavi. Ujci su ga čuvali, i kada je bil malo veći, zimali po svuda sobu. Za prvin diteton je prišlo drugo, treće, četrto i peto. Svi su bili lipi, čili i zdravi. Otac i mat su za njih skrbeli, jih učili krijanci, delu i redu. Ujci su se istešo oženili i jimili svojih dicu.

465. Svi su stali va bližini i dica su se jigrali skupa. Na svih je običajno pazila baba. Više puti je bilo plača, tučnjave i vajanja. Baba ni nikada nijenomu dala pravo. Svih bi bila pokarala i svitovala. Pravjala jin je priče i pivala pismice, kih je ona znala strašno puno.

VELA HRVUASKA

466. Utruci su rasli, zitruci umirali. Stare običaji se je čuvalo, vladalo i sudilo po starih užancah i slavilo bogi i boginje ke su slavili i njihovi stari. Hrvuaski narod se je širil zahvajujuć tomu ča je svaka obitej jimila čudo dice. Kako su se jih susidi bojali, ni bilo velih bojn, i narod je rasal. Proširili su se priko Karapati, prišli va Panoniju, zasegli zemju kolo Balatonskoga jezera i se proširili do Danuba, ga prebrodili i prišli do Drave, raširili se priko Buga i Visle, Morave i Svitave .

467. Tako velu zemju više se ni moglo vladat zi jenoga mista. Središnja vlast je postajala sve slabija i župani i kosizi su va svojih županijah diventali gospodari. Načelno su još vavik držali skupa i habali bana, ma stvarno je od toga habanja bilo malo koristi. Od najzahojskijih stran do Horova je rabilo više miseci kanićen za prines zapovid ali vist i jisto tako od Horova do ishojskih, urinjskih i sorinjskih stran.

468. Zi ishoja su pričele pritiskat tatarske i momulske horde. Priko Hrvuatije su pasale nimške, vandalske, gotske i druge horde. Ustroj više ni bil tako tvrd kako ča je bil na pričelu. Tatika je postala drugčija leho prije. Sada bi bili suvraga pustili va zemju, i kada bi se bil raširil i raztrkal, bi bili odred po odred napadali zi satnijami na butih, ušćacih va gvozdih i busijah, i tako osabatali oslabjenoga suvraga a da sami nisu jimili velih zgubitki.