PO SLIDU SLNCA
Del prvi
Pravjano i začarkano va Punti na jižuli Krškoj lita Gospodnjega 1951.
I. ČRJENI BOJOVNICI ZI HAREZMA (ČA)
1. Nakon svih dešturbi i zi delon pasanoga dneva se je car Harezma, velikoga inperija ki se je raztezal od Male Azije na urinju i do Indijskoga mogulata na sorinju, od Afganistana na ishoju i sve do Črjenoga mora na zahoju, šal malo odpočit na balaturu, ka je bila va tuston hladu, pokrijena zi barcen na kon je trsje kaučine razplelo svoje rozge, zaperki i guste pera. Zi balature je bil horav pogjed na Tigris i njegove zelene ravnice.
2. Ravnice su se potezale do kuda ti je oko seglo. Ravnice su bile podijene na manje kvadrati, težačije. Po cvitu si vidil ča ja na koj bilo posijano i ča je na koj raslo. Kolo samoga Tigrisa je bil pas trstike i pavera va širini od trisat do pet sat paši. Za paveron i pred poji je bil visok narin ki je branil od povodnji.
NARIN
3. Svako toliko je bila va narinu zasika ka je bila zatvorena zi dvojnimi drvenimi vrati, obisi, ke su se mogle dvizat i kalivat, priko za to posebojno ustrojenih sistemi i na ke se je za visokih vod nahićevalo žintu i pripravjeno kamenje ko je bilo kako brižić dvignjeno na narinu. Ta narin su delali njegovi pridniki.
4. Na njen je delalo tisuće i tisuće judi. Tisuće voli, konji, mazg, mul i tovari je pejalo kamenje va vozih, nosilo zemju i jilo, va za to posebojno pletenih kofah ke su visile živu zi jene i druge strane čivej. Kofe su šoto jimile dna ke bi se bilo žakučilo za prevesla. Prije leh bi se jih bilo otvorilo bi se bilo zi daskami živu zašćitilo noge i ondat bi se bilo pustilo neka zemja sama pade zi kofe na tla.
5. Judi ki su delali na narinih su bili dobro plaćeni i delo su delali strukovno i požtvovno. Na narinih su živili, delali i umirali. Po narinih su pasli živinu, obdelivali vrti, sijali žito, sirak, metlač i rž. Sadili ripu, mirlin, tikve i hrastavci. Na vrhih narina su sadili trsi i smokve i datuje. Sve ča je rodilo na narinu je bilo lipo, jedro, zdravo i na samon carskon dvoru je bilo sve frutje i vrdura zi narina.
6. Svako godišće se je posebojno odvajalo fanj šoldi za dela na narinih, aš od narini je ovisilo kakova će bit jimatva i koliko će prit nazad va carske badovine. Tigris je zgjedal kako ribja kost, od ke su se zi kraježnice na pravu i hudu stran širile lebrene kosti. Od ozgora se je vidil kako zeleno modra široka traka, ka se je zgubjala nigdi dugo, dugo va bilkastoj sumaglici.
7. Skroz te zasiki va narinu su va sušnih misecih pušćali vodu i močarinili poja. Do svakoga zasika je pejal konal ki je bil i seda pun vode, blišćil se je kako trak slebra na jarkon slncu i kolo koga su hodile štakje, patke, race, lebedi, šjuke i čapje i lovile žabe, kaške, gliste i ribice. Te konali se je svako lito čistilo i produnbjivalo, aš bi bila trstika, paver i druge vodenike brzo napunile konal.
PUTOVANJE PO NARINU
8. Pametil je kada je prvi put zi ocen bil na narinu. Otac, car, je poznival svih glavnih graditeji na narinu i oni su cara i cilu carsku svitu pejali i njin razkaživali i tumačili kako su ča delali i kadi se još ča mora učinit. Pejali su se zi karocami po vrhu narina dlgo, dlgo.
9. Svaku večer bi se bili fermali, poredali karoce i vozi va jir. Va sredini bi bili udelali oganj i ondat se je kolo ognja vičeralo, peklo meso i pilo. Dlgo va noć bi bila odzvanjala pisma i kanat. Petnajsti dan su prišli do kraja. Kada su prišli do kraja, je glavni graditej pričel govorit kadi su zasinjali za pričet dela.
10. Tamo do kuda je prihajala najveća voda su zabili kolci od žukve ke su štršile paš nad težon. To je bil prvi dil del. Njemu kako ditetu od desetak protulić, ki je bil jako znatižejan i ki se je cili pretvoril va oko i uho, ni niš ušlo. Glavni graditej je caru govoril i kazal kadi ćeju vaje za žukvinimi kolci zgradit duplicu od najvećih kamici ke pejaju na vlačicah zi kargaci zi kav ke su fanj dugo od gradilišća.
11. Kamenje kavaju i ga dan i noć pejaju zi četveri najvećih voli. Kada ga pripejaju, ga kladaju na gomile i potlik ćeju od njega gradit gromače, duplice. Duplice se je gradilo od dva reda veloga kamenja mej koga se je nahićevalo tribjenac i šaldoć, ki je popunil sva prostor mej dvimi redi velih kamici.
12. Prva duplica zi najvećin kamenjen će bit tik uz žukvine kolci, ke ćeju potlik diventat stabla žukve i zi svojimi debli šćititi, branit duplicu od velih vod. Tri paši za prvu duplicu ćeju delat drugu duplicu od istešo veloga kamenja. Mej obi duplice će se nabit žinta i ondat na vrh klas velo kamenje, ko će čuvat krunu narina od vode.
13. Tristo paši od zadnje duplice će se poznova udelat duplica ka će bit dva paša viša od duplic sprida. Za nju deset paši će se poznova udelat duplica i mej te dvi duplice će se nabit jilovača, huhji, koguli i drobno kamenje zi kave. Sto paši za tu duplicu će se nahitat tež i tribjenac i ondat poznova udelat dvi za dva paša višje duplice i mej nje klas nabijeno jilo. Za zadnju duplicu će se ondat nahitat zemja, tež, i pomalo tresajuć trasat kuntra mekotan ke su va višini najmanjih vod va Tigrisu.
14. Krune svih narini su bile pokrijene zi velimi grotami i skalami ke voda ni mogla moknut niti za najvećih potopi. Kada se voda raširi do prve skaline, je vode jedan put više leh kada je voda normalna. Kada se dvigne do drugoga stupa, je za tri puti više leh kada je voda normalna, a do trećega stupa je za pet puti više leh kada je voda normalna. Car je pomno habal i pital ovo i ono ča mu se je činilo važno.
15. Graditej je mirno i jasno razlagal sve ča ga je car ali ki zi njegove svite pital. Vidilo se je kako vi sve o vodi, jazinah, jilu, težu, kamenju i vodenih raslinah. Kolo glavnoga graditeja je bilo desetak mladih muških ki su na svaki njegov mig nosili pergamenti zi načrti i jih kazali caru. Pametil je kako je mučal i se grizal za zajik, kako nebi zrekal ku bedastoću. Bojal se je ako bilo ča bedasto reče, kako će ga otac samo škuro pogjedat i ondat doma pokarat. Va sebi je mislil „dobar je strah komu ga je Bog dal“ i mučal.
16. Glavni graditej je uz sebe jimil i čovika ki je bil odgovoran za diljenje vode težakon kada je bila suša. On je razložil kako pričnu zi dijenjen va gorinjen toku rike i ondat otvaraju konali sve niže i niže tako svi ćapaju dovojno vode i svi su zadovojni. Svaki težak vi ostočno kada je na redu za vodu i čeka kraj svojih poj. Kada je močarinjenja dosti, ondat svaki na znak zatvori drvena vrata na konalu, a njegov susid jih otvori. Va svakon poju su jimili skopane zdenci kadi bi bili ćapali fanj vode i ku su rabili za polivat ono ča bi bilo patilo mej dva dijenja vode.
17. Kada su se tornjivali, je car bil jako zadovojan i mu je rekal: Ako je sve vidil i zapametil, aš kada njega više ne bude i on postane car će mu to i te kako dobro sve prit ča je vidil i čul. Shvatil je kako su ti narini, jazine, konali, dijenje vode i močarinjenje težačij jako važni za cilo cesarstvo i to nikada ni znel zi pameti.
LUKA
18. Pod samim štanajen je bila udelana vela luka, ka je jimila čudo muli, ke su bile učinjene od debal libanonskih cedri, priko kih su bile položene folke od cedrovine. Kada su bile vele vode, bi bilo šempre pobralo fanj folk i svaki put nakon povodnji i poplav se je moralo muli poznova popravjat i gradit. Kako je bil špac veli, a brodi nisu mogle čekat, se je svako godišće gradilo nove i nove muli.
19. Nike muli su gradili od veženih i zasidrenih brodi ke su bile posve zatvorene, zastupane i blakane i nisu mogle potonut. Zi takovih muli, ke nisu bile pod vodu niti za najvećih vod, su pejale skalete na kraj. Na muli su se veživale i koštivale brodi ke su prevažale svu moguću robu od jenoga kraja do drugoga i z mora po rikah i skopanih konali do najdajih kraji cesarstva.
20. Na jenon kraju su bile brodi njegove bojne efurice ke su, ako je rabilo, branile njegove trgovaške brodi. Brodi su se lipo vidile zi carske palače. To su bile duge i ušpitne brodi na ruge i veće šire brodi ke su jimile po jeno trokutasto jadro i su jadrile po širokoj riki. Zgoru po riki su jih potezale voli, ke su bile zaprežene va jaram, na dugon konopu, jarmuji, po pedeset pari na jedan brod.
21. Tik uz vodu rike je bil udelan fanj širok put po kon su voli potezale brodi. Put se je više puti na lito nasipeval zi melon, kako bi pokrili kamenje na kruni i kako bi volon bilo lagje potezat i kako nebi dešvivale potkovane pačenki na nogah. Put se je kako kafeno žuta kurdela potezal od jednoga vidokruga do drugoga.
22. Ta put je bil i prva jazina od visokih vod. Svako toliko je jimil mosti kako bi visoka voda mogla teć do drugoga narina i se raširit va šiče. Na drugon brigu Tigrisa je bil istešo takov put i cili sustav konali i narin kuntra plodnin mekotan. Za vrime dokjek je gjedal je najmanje dvajset brodi bilo na riki, ke su šle zdolu ali zgoru. Jisto toliko jih je bilo va luki i dežbarkivalo ali krcalo robu.
23. Zi luke je kuntra štanaju i daje va krajinu pejal jedan put, po kon su šle vozi, konji, kamile i tovari zi luke, i drugi put, po kon su šle vozi i tovorna živina kuntra luki. Puti su mej sobu bile odvojene zi najmanje tristo paši prostora, na kon bi bile fermane vozi i živina ka je čekala na inbark ali dežbark onaga ča je pripejala ali odpejivala. Do njega je dopiralo škripjenje kol, bleka vozači i živine. Kamo god je pogjedal je bil voz do voza i živina do živine.
RIBARENJE NA TIGRISU
24. Tigris je bil pun ribe ke su zi kof, kajići spletenih od šibja i obloženih zi kozju kožu, lovili ribari. Ribari su pleli povrazi i tunje od dlak zi konjskoga repa. Duge su bile i po dvajsetak paši. Udice su delali od roževine i kovači su jih kovali od bronce. Čudo puti se je dogodilo kada je veća riba zagrizla va ješku kako bi bila prekinula povraz ali ako ni pukal, kofu potezala po riki, kako luš zaprežen va voz.
25. Veće ribarske brodi na četire ali šest vesal su po dva skupa potezale mrižu spletenu od stupice. Te brodi su delali od maci trstike ke bi bili povezali va veli snop dlg po tri četire paši. Takove snopi bi bili klali tri šoto i ondat na njih zboki vezali zi svake strane po jedan još puno debji snop. Takove brodi su lipo plavale ma po dnu je vavik bilo niš vode, zato su dna još pokrivali zi pajoli od dasak. Na bočnih snopih su bile sohe za ruge. Na sredini su bile dvi visoke sohe, ke su bile vežene na vrhu i na kih su bile klajene derići i boceli za dvizat mrižu. Niki su jimili provu i krmu pokrijenu zi kravjimi kožami.
26. Mriža je na spodnjen kraju bila otežena zi olovnimi pezi, a na gorinjen kraju je bila vežena na tikve ke su ju držale tik pod škorupon. Na sredini mriže je bila maža, vrića va ku bi se bila riba spravjala i ku su svaku uru priko derića i boceli dvizali i praznili. Ribu su lovili i mriže jimili va vodi samo kada su hodili zdolu po riki. Zgoru su rugali zi dvignjenu mrižu aš bi bilo preteško za vozit. Ćapanu ribu su držali, va posebojnih kuneštrah ke su jimile pokrov od šibja, va vodi sve dokjek nebi bili koštali na mul.
27. Desetina od prodane ribe je hodila va carske badovine. Štibrari su badrili i pazili kako se riba nebi prodavala šoto man, aš to ni punilo carske badovine. Jistešo je bilo i zi svu robu ka se je prodavala po cesarstvu. Svih ki su delali kuntraband bi bili kaštigali i jin zeli sve ča su jimili.
28. Najveći kuntraband se je delal zi halon. Sol ali hal su pejali va brodih zi mora. Tamo su ju pridelali od mornice ku su posebojne sprave na vitar zlivale va za to pripravjene plitve soline. Pod jakin slncen bi bila voda zvitrila i sol bi bila ustala na dnu va jenon sloju. Tu sol su zi posebojnimi pobiračami od drva kladali na kup i kada bi se bila dobro ošušila, su ju mleli va malinih na vitar i prodavali trgovcen, ki su ju pejali po cilon cesarstvu. Sol su prodavali va većih mistih. Oni ki su provali dobit i ne platit davak, štibru, bi se bili koštali prije luk uz brig rike i tamo dežbarkali dil tovora soli i ondat su ga prodavali po selih i veseh .
29. Bava zi Tigrisa, ka je stalno bavala, slideć krk rike, je ugodno hladila i friškala vrti njegove rušave palače. Car je sidil samo va bragešah i svilenoj košuji va šediji i gjedal pinkljunića ki je zobal jušto uzrijale bobice na jenon črnon grozdu. Zbande barature je rasla vela črnica na koj su bile zrele i jušto napiskane črnice, ke je zi žutin kjunićen jil črni kos.
30. Sprida cara je na velon, lipo ocvitanon pladnju bilo svake šorte frutja. Mišale su se mogranji, ostružnice, jagode, smokve, marelice, naranže, krušve, jabuke i grozje zi mirlinon, ravanelu i očišćenimi koreni od broskve. Va malon pladnjiću su bile mendule, orihi, palmove košćice, pinjoli i miškujići.
31. Sve to je bilo lipo poredano po velikosti i po cvitih tako da je delalo mejsobni sklad i ugajalo oku. Zbande je bila bukaleta zi vinon pokrijena zi lipo rakamanin tavajolićen i blizu nje vrč zi vodu pokrijen zi pokrovon od kovanoga žinga, ki se je dvinul kada se je pritisnulo na pero.
32. Spodaj pod balaturu su bile jako lipe vrti, ke su se slizenasto kalivale sve do Tigrisa. Svaku večer su jih polivali, slizenicu za slizenicu, njegovi hlapci i sluškinje. Donjega je i seda dopiral šušur koga su delale zajimalke kada su se obraćale i prinašale vodu na više slizenice. Lončene zajimalke su bile poredane na kolu, jena zada druge. Zi zajimalk je mlaz vode spočetka, kada su izronile zi rike, tekal fanj jako, a ondat bi bil sve manji i na kraju su još padale samo kapje, ke su se kako margarite svitlile na zahojnon slncu.
33. Gjedal je kola ke su vodu, obraćajuć se, zi dolinje slizenice dvizale na gorinju. Kola su vrtele bivoli zapreženi va posebojne komata, va sporon jenoličnon huću. Na najgorinjoj slizenici je bila vela kamenica od ke je voda tekla va manje kamenice po civih, na svokoj slizenici. Od tih kamenic su sluškinje na zahoj, kada više ni bilo vele bružere, nosile vodu va vrčih i polivale svaku raslinu, drvo i trs.
HRVUATI
34. Na jenon kantunu od vrta, ki je bil ograjen zi visokin zidon, je stal stražar i gjedal ča se sve dogaja kolo štanaja. Car je gjedal sulitu figuru sražara i koržal sve ča je imil na sebi. Stražar je bil visok, sulit mladi muški ki je imil obučene črne brageše ke su bile pod kolenon vezane zi gremiki od stupanj.
35. Priko brageš je padala stomanja od lana. Na prsih je jimil tanku veružnicu na koj su bile sprida prsače, zada zadače, a ramena su pokrivale ramenjače. To su bile ramene ploče ke su bile počrnjene kako se nebi nadugo šajnale i odbijale slnčevu svitlost i stin akužale kadi je straža.
36. Na desnon ramenu je bil obišen dlgi arabel zi dva puta savijenimi kraci. Livo za pason je jimil strilnicu punu stril, ke su jimile zaletnice od šarih per i su se vidile zduga .
37. Za škinu livo je jimil obišen dlgi meč končar. Ručica mu je štršila nad livin ramenon, a bulbac je bil pokrijen zi črnu kapicu kako se nebi luštral na zahojnon slncu.
38. Na glavi je jimil timenac zi tantabranon i zavratnicu ka se je skoro dotikala ramenjač. Va boju mu je to branilo vrat i hrbtenicu od tofca zi mačen.
39. Za pason je jimil dva duga i jedan kraći nož, a va rukah je držal oštrulac, kratko kopje ko se je hitalo i ko je bilo zi gremikon veženo za bojevnikovu ruku i moglo ga se je potegnut nazad k sebi.
40. Stražar je dvignul ruku kako bi oči zaštitil od zahajajućega Slnca i gjedal na čestu ka je od ishoja pejala kuntra palači. Na česti je bil oblak prašine ki se je jako brzo koštival palači. Inperator je istešo gjedal va istu stran. Čekal je na kanića, ki će mu prnes novitadi zi ishojskih mejaši kadi se je njegova vojska borila zi Momuli .
41. Te mejaši nisu bile nikada tako sigurne kako one kuntra urinjskoj strani, ke su čuvali Hrvuati. Sva njegova osobna straža su bili Hrvuati. Svako drugo lito su kosizi zi Hrvuaskih postrojb slali tristo najbojih bojevnici va njegov osobni zdrug. Svako drugo lito bi se bilo prominilo jenu trećinu časnici i svih bojovnici.
42. Kanić je nesmijeno tiral luša. Konj je bil sva pokrijen zi pinu. Drugi luš je na povodcu osedlan jahal poredo znjin. Kanići su svakih dva kilometra va jizdu skakali zi jenoga konja na drugoga, a svakih desetak kilometri su bile postaje, kadi bi bili prominili luši, posrbali malo slatkoga šipunovoga pića, koga su zvali šerbat, i šubito zajizdili pripravjenoga konja i šli va halopu naprid.
43. Straža ka je bila na vjizdu, videć kanića je brzo spustila most i dvigla vjizd vajer. Kanić je brez fermivanja pasal va štanaj. Prišal je pred cara, se poklonil i mu dal savijen pargamenat koga mu je poslal njegov kosiz veli, zapovidnik svih njegovih postrojb na bojišnici. Kanić je na to brez besid šal ritansko nazad.
44. Bil je sva potan, prašan i jedva je stal na nogah. Dva badrača su ga ćapali pod ruku i popejali va vojarnu i ga seli na divan. Niš je zamrmjal, legal se i zaspal. Pokrili su ga i rekli: „Pustimo ga neka se naspi, aš je jizdil od bojišnice do ovuda brez se fermat .“
45. Car je odvil pargament i ga položil na stol pred sobu. Skršil je pečat i ga odvil. Na pargamentu je bilo zi lipimi velimi čarkami zi črjenu tintu začarkano na gusto cili svitak. Kada ga je car preštil, je postal bled. Vist kako je prišal va štanaj kanić je kako i vitar preletila po celon štanaju.
46. Careva svita je brzo prišla i stala kolo cara. Car, ki je bil jako bled, se je umiril. Va žmuj je nalil malo vina i vode, udelal bevandu i malo popil. Nasmel se je i rekal svin ki su bili blizu njega kako ni dobro i kako bojnica popušća. Nato se je obrnul i naredil neka mu sprave njegov bojni voz, odoru i oružje i neka se svi njegovi dvorani i njegov osobni zdrug priprave za boj. Nastal je muk.
47. Prvi se je oglasil zi zvonkin, muškin glason, ki ni trpel pogovora, veli kosiz straže i svojin kosizon naredil neka va najkraćen času, mučeć, sve urede. Ni jin bilo potriba ponovit. Tekuć su šli va mošune i bojnice. Rekli svojin bojnon ča jin je delat. Za mahnuće oka, kako na vižbi, su bili luši osedlani.
PRIPRAVA POHODICE
48. Sve bojne vozi su pripejane zi jatnic, kadi su bile klajene kako jih nebi temperija unišćivala, a atalice pripravjene i konji zapreženi. Bojovnici su bili obučeni i pod armu. Bojne vozi cara, kosiza veloga i kosizi su bile pripravjene. Cili osobni zdrug je bil postrojen i čekal na cara.
49. Luši su nemirno kopale zi potkovami zemju, obraćale jedan drugomu glave, se žulile ali provale jedan drugoga ugris. Jizdici su jih mirili, držali za uzde, gladili po čelu i vratu i njin stalno govorili neka budu mirni. Konji objidni, najideni i žejni jizda su cilo vrime delali korak naprid ali nazad i svih jizdici držali va stalnoj pripravjenosti. Čekali su cara, ki je daval zadnje naputki svojin hrvon, sindikon, štibraron, badovincen i stražaron.
50. Pozdravil se je zi ženu i hćeru i potegnul k sebi oba sina. Oni su otili poć šnjin va rat, ma on jin ni dal. Rekal jin je neka čuvaju štanaj, mater i sestru i neka se vade aš nikad se nena ča se sve more dogodit.
51. Car je nato urdinal ki jima ča udelat. Poslal je teklići i kanići na sve strane zi naredbu neka se spravi sva vojska i neka pride pod hlmine ča prije more. Vojski ka je čuvala mejaši je naručil neka potrostruče straže i neka nikoga ne puste va Imperij.
52. Carev bojni voz je bil pozlaćen. Bil je na dvih kolih ke su bile malo razmaknjene od četvorice voza. Sve bojne vozi su jimile železne vretena i na glavinah svidrače, ke su zi svojimi peri rasporejenimi kako slovo Salamunovo parale sve ča bi bile dosegle va vožnji. Sprida je bilo misto za vozača. Va sredici je bilo misto za cara, a zada su bile dva mista za njegovih bojovnici. Va voz je bilo zapreženih pet luši. Tri konji su bili zapreženi za ojići, a dva z band su bila na uzdah i su se mogli maknut od voza dva ali tri paši i zi cinturami kosit pišci .
53. Vozač je bil obučen va njadu odoru. Jimil je zlatni nadac ki mu je branil prsa, škinu, ruke i bedre. Na glavi je jimil timinac zi bušcen. Zi live strane na vozu je jimil zataknjen mač i za črjenin pason par noži. Va rukah je jimil škuriju i va vožnji uzde od svih konji.
54. Car je bil va njadoj odori zi zlatnin nadcen, za pason je jimil strilnicu zi strilami, na škini meč zi zlatnin bulbcen i za žutin pason par dugih i jedan kraći nož. Na glavi je jimil zlatni timinac zi bušci ke su fožale krunu.
55. Zada na povišenih delih četvorice su bila dva bojovnika ki su jimili istešo njadu odoru, nadac, pozlaćen, ki jin je branil prsa i škinu, timinac zi bušcen i čubranicu. Va rukah su jimili dlge sulice i zi svake bande na vozu joštrulci. Za pason su jimili težice i po dva para noži. Zada zašćikane va četvoricu su bile branci, ke su se rabile za odbijat suvragove strile.
56. Bojni voz kosiza veloga je bil istešo tako opremjen. Njihove nadci su bile od jacala. Timinci su bile istešo od jacala zi bušcen i čubranicu od konjskoga repa. Priko svega su jimili črjene kabani ke su bile sprida vežene zi prsaču. Sve bojne vozi su na kolih jimili dvajsetak centimetri duge noži, svidrače, zi kimi su lomili kola na atalicah, noge pišcen i konjen.
57. Atalice su bile bojne vozi, na četire kola, na kih bi bilo osan ali deset bojovnici ki su zi strilami, sulicami i joštrulci turgali va suvragovu bojnicu, zada tvrdih dasak ke su jih branile od suvragovih stril. Potezalo ju je par, a ki god put i dva para konji. Svaki luš je bil na posebojnoj zaprigi, pokrijen zi posebojno tvrdo šijenin pokrovon ki ga je branil od stril, sulic i mači, ako bi bil unatoč svemu ubijen ali ranjen se ga je vaje molalo i pustilo, kako bi drugi mogli vozit naprid.
58. Jizdica je bila obučena va črnu odoru, zi nadcen za prsa i timincen zi bušcen i čubranicu od črnoga konjskoga repa. Priko svega su bili pokrijeni zi črjenin kabanon. Jimili su dlgi, zi dva puta zavijenimi kraci, bogun, strile, za sedlon dlgi mač končar, dugu sulicu zi vijoru pod bušcen i branac. Za ubadcen sulici je bil ognjenac zi carevimi cviti. Konji su jimili oklop za glavu. Na bokih su jimili pod sedlon prešijene krpe, pokrovci, ke su konja branile od strile i tofca.
59. Pišci su jimili veružnice, timinac, ramenjače, prsače i zadače, dugi bogun zi dva puta zavijenimi kraki, strile, branac na zarizu, meč končar, sulicu i par noži za pason i va borši, torbici niš za jis i pričuvne stupanje. Na nogah su jimili debele stupanje vežene priko brageš za podkolinice.
60. Hrvuati su jimili još svi na prsih na livoj strani svoj znak, črjene i zlatne, črjena i slebrne ali črjene i žute kvadrići drugoga cvita ki je odgovaral sarži.
61. Na brancih je svaka postrojba jimila narišenu zvir. Jeni su jimili kjišćara, drugi kašku, treći požgaja, četrti mašku, peti mrava, a šesti cafa.
62. Sva bojnica je jimila priko svega črjeni kaban ki jih je šćitil od slnca, mraza, dažja i sniga. Na njen su spali i šnjin su se pokrivali. Tkan je bil od debelo predene vune i bunbaka. Šili su ga posebojno izučeni šilci. Nakon tkanja su ga stupali va stupi i močili va rastopjenon čelinjen vosku, uju i ostu. Takov kaban je bil zdržjiv i služil je svojoj namini.
63. Car se je razumil zi kosizon velin, dvigal mač i osobni zdrug zi svin ča je rabilo je šal kuntra ishoju. Kada su pasali desetak vrst, su trefili prvih bojnici ki su va neredu, raskinjeni, trudni i ranjeni hodili kuntra štanaju. Fermali su se i pitali ča se je dogodilo. Rekli su njih kako su jih nenadijano napali va hodu i do nog potukli Momuli.
64. Car je otil ča više čut o boju, kako su jih Momuli napali i od svakoga ča misli žač je njegova bojnica bila tako strašno potučena. Nakon više ur habanja se je obrnul i šal pod svoj šator. Trudan i jadan je brzo zaspal na tigrovoj koži. Straže kolo šatora su šišno hodile, badrile i koržale, kako bi car ča boje spal.
CARSKI ŠTANAJ
65. Car je brzo zaspal i sanjal svoj štanaj ki se je šajnal na slncu. To je bila veličanstvena palača. Kolo nje je bil visok zid zi dvajset i petimi turnji. Palaču je zidal njegov pradid. Svi njegovi pridniki su svaki po svojen guštu palaču dozidivali. Dodavali su njoj pilaštri, volte, cila krila, nove dvorane i naravno turnji i zidine. Kolo ciloga štanaja je bil širok konal pun vode. Nutri su palaču svi urešivali zi slebron, zlaton i majoliku. Po zidih su bile horave mozaiki, kipi i slike.
66. Va vrtu sprida, zada i z band palače su bile prekrasne žardini zi potočići, ribniki, vodohiti, vodopadi i vodopadići. Voda je po svuda škropila tekla i krkjala. Kada ju je obsijalo slnce, se je prelivala va svih Luninih cvitih. Vodu su pripejali od duga po svodnjakih, konalih i olovnih civih.
67. Sve žardini su bile pune svake vrsti drv, ke su bile pripejane od ciloga svita. Ribniki, potočići i vodopadi su bili puni svake šorte ocvitanih rib pripejanih zi svih stran svita. Va jenon krilu je bila njegova obitej, a va drugon krilu palače je bil njegov harem. Sridnji dil palače je bil pun dvoran, kancelarij i hrvnic, kadi su se gnjeli njegovi službenici, hrvi i sindiki ki su hrvali i čarkali sve ča se je dogajalo va Cesarstvu.
68. Davače, ke je on odrejal za svaku župu, za svaku županiju i krajinu posebno, i beči ke su tekle va njegove badovine su sve bile ostočno zahrvane i svaki štibrar i sindik je bil njemu osobno odgovoran za svaki prijimak i svaki odjimak. Badovine su mu bile pune zlata, slebra, dragoga kamenja i artižanskih del ke su bile ali kupjene ali donane ali pak dil plina njegovih prednjimci ali njegov.
69. Carica je bila lipa, visoka i vridna ženska ku su svi jako volili. Zibral mu ju je njegov otac, još doklek je bil dite. Od njega je bila starija fanj lit i stalno je mislila da ga more svitovat. Žnju je jimil dva sina i hćer. On se je za njih skrbela i jih odgajala. Sini je on vijeval dva-tri puti na misec i jih učil bojnin višćinan. Hodil je šnjimi i zi svojimi kosizi jizdeć konji na turniri. Učil jih je najprije turgat zi strilami, ondat badat zi sulicu, kako se siče zi mčen i kako se bada zi noži. Vadil jih je kako se moreš branit goloruk i ča sve moreš rabit za se obranit.
70. Hćer je vijeval jedan put ali dva na misec. Učil ju je jizdu, pravjal njoj je štorije i snju šetal po rušnih žardinih i vrtih, punih šipuni. Kazal joj je ribe va potokih i ribnikih i govoril od kuda je ku dobil i kako njoj je jime.
HAREM
71. Njegov harem, ki je jimil više od dvisto hur, priležnic i odalisk, mu je bil najdraži dil njegove palače. Bil je sva va zlatu i slebru. Urešen je bil zi brojnimi mozaiki, slikami i kipi.
72. Dvarane su mu bile zračne, svitle i pune živjenja. Tla su bile popločane zi tabelicami od najfinijega porculana pripejanoga zi Kine, mramora pripejanoga zi Altaja i bazalta pripejanoga zi Misira. Krilo je jimilo tri podi i svaki pod sto kamar. Podi su bile pokrijene zi debelimi tepihi va ke su se noge gruzile do kičice. Tepihi su bile od svile, vune i bunbaka, a tkale su jih na krosnih domaće tkaje.
73. Dvorane su bile obrubjene zi pilaštri. Postoji i glavice su jin bile pozlaćene i urešene zi jubavnimi prizori. Na mozaikih i na zidnih tepihih su jistešo bile slike zi jubavnoga živjenja.
74. Harem je vavik odzvanjal od umilne i uhu ugodne mužike. Njegove hure, priležnice i odaliske su zi sviranjen kratile vrime. Svaka od haremskih žen je jimila svoj stan. Mlaje i jebizovnije žene su jimile jako vele i lipo urešene stani od pet ali šes sob.
75. Sve pokućstvo je bilo od rezbarene sandalovine i ebanovine pripejane od Indij i Afrike. Sve ponjave, kušinelnice i kuverte su bile od čiste svile pripejane zi karavanami zi Kine.
76. Sanjal je kako je prišal va harem i tamo ni bilo niti jene hure i priležnice. Svi eunuhi i sandali su se nikamo ražbižali. Njegova glavna upravitejica, suhitana, ka ga je vavik čekala i mu pravila sve novitadi va haremu, ka je noseća, ku je premestila zi harema va drugi dil, kadi su bile noseće ženske, ke nisu jimile ča delat va haremu, ka se je zi ku posvadila i ka se je zi ku stukla, zičupala i zivlasala, koliko novih žensk su pripejali i poslali zi županij. Rekla bi mu bila kolike, aš su bile bolne, je poslala nazad, zi kuće zdihi, kadi su ženske čekale po tri šetimane za prit va harem.
77. Kada bi bile mlade ženske prišle va harem, jih je suhitana popejala zi dva sandala va kuću zdihi. Tamo se je ženska morala slić do gola i ondat ju je suhitana svu pregjedala i opipala. Sandali su ju nato oprali od glave do pet i obukli va za to posebojno pripravjene haje.
78. Sandali ki su spali va kamari do one kadi je spala mlada ženska su ju celo vrime koržali i sve paliževali suhitani, ča dela, kako se ponaša, kako i koliko ji i koliko se pere. Suhitana bi mu bila rekla ki eunuh ni bil poslušan i koga se mora kaštigat i ki sandal ni više za bit va haremu i mora ga se utopit va Tigrisu aš više ni sposoban za nijedan posal.
79. Na dnu dlgoga hodnika je bila samo jena mlada divojka, ku su mu zi jenoga bojnoga pohoda pripejali njegovi bojnici kako malo dite od šest do sedan protulić. Još kako dite je bila jako lipa. Jimila je sinje oči, plave vlasi, jako horav obraz. Bila je visoka i jako lipo je znala tancat i pivat. Poslal ju je upravitejici i naručil neka najde nikakvo delo za nju va haremu. Od tada ju ni vidil po haremu i ni znal ča se je š nju dogodilo.
80. Sada je najedan put bila na dnu hodnika divojka, sulita, stasita, horav obraz njoj je bil obrubjen zi plavimi vlasi ke su padale priko rušavih ramen na škinu i segale sve do božačne zadnjice, ka je bila nasajena na visokih nogah. Prelipe bedre i listi na podkolinici su se orisivale priko svilene poculice. Nožice su bile obute va zlatne stupanjice. Hodila je tihin mačjin hodon, gungajuć zi boci i zadnjicu.
81. Pod bilu, kako snig, poculicu su se jasno vidile prekrasne, miri oblikovane, tvrde dojke, škure bradavice su škurije ocvitale svilenu poculicu. Poculica je bila zi širokin pason vežena kolo struka i zi zlatnu prsačicu zaputana na prsih.
82. Smela mu se je i ga zi lahkin kreton, moton ruke zvala k sebi. Kada je šal kuntra njoj, je ona ušla va jenu od dvoran. Pri teku je pokazala svu svoju umilnost i gracioznost. Šal je za nju. Divojka je stala na sred dvorane. Va rukah je držala porculanski sud zi njegovin najdražin pićen. Kada se je koštal, mu je ona ponudila žmuj i natočila nutar prst pića.
83. Gjedal ju je i ni mogal znet oči od nje. Činela mu se je kako vila zi prič ke su mu pravjale njegove dadije. Spil je piće i prazan žmuj tornal boginji. Zamišjal ju je brez odiće. Zamišjal je nje tvrde sise, ravan, čvrst trbuh, horavu, veludastu kožu prelipih bedar i škuriji, obrasli srh med bedrami.
84. Baš ondat kada mu se je činilo kako mu je sve na ćapac ruke, ga je zbudil tutanj teških bubnji, konjskih kopit i prodoran i srhjiv zvuk tuturač. Protrl je zasanjane oči i prokjel. Uvidel je kako je sve bil san i da je zbija čisto drugačija.
85. Zazval je junaka i mu naručil neka mu pripravi nadac i bojnu opravu. Na brzu ruku se je opral, ubukal i pred šatoron zajizdil na konja. Zi svitu ka ga je čekala je šal sprotu kosizan ke su jušto prihajale va tabor. Cili dan su prihajale nove i nove postrojbe, vodjene z njegovimi najbojimi časnici. Naredil je neka uhodica uhodi kadi su Momuli i ča delaju.
86. Svojin je postrojban naredil neka počinu i neka budu čin manje vidni. Ni dozvolil nikakovih ognji, prevelih gibanj i premikanj, kako nebi dvizali prah i tako avizali Momuli kadi su i ča pripravjaju. Drugi i treći dan je bil isti. Prihajale su nove i nove postrojbe. Časnici su mu se javjali i svaki je dobil svoje misto i zadaću. Postrojbe su se spravjale, prihajale i svaka je dobila svoje misto, još cilih petnajst dan.
BOJNA OJAT
87. Kada se je i zadnja pojavila, je car zazval bojnu ojat. Prišli su svi njegovi kosizi veli i kosizi zi svojimi hrvi i sindiki. Svi su bili ubučeni va prekrasne haje. Na njih su šajnali nadci i blišćali timinci i čubranice. Njihove bojne vozi zi kimi su se pripejali na ojat su bile ocvitane zi ocviti svih cviti.
88. Konji va zapregi su bile najlipje ča jih je njihova županija mogla zgojit. Jimili su široke njišnice, lipu podugovatu glavu i dlgi savijeni vrat. Prsa su njin bile široke i jako mišićave, trbuh sulit, a noge dlge zi jakimi kopiti na kih su bile podkove od mjedi. Grive su jin bile spletene va podugovatu kiku va ku su bile zapletene ocvitane trake. Kako su privozili su vozi obraćali kuntra šatoru, a konji su bile obrnjene od šatora.
89. Njihovi vozači i po dva bojnika su badrili i čuvali voz, konji i koržali da se ki nezvani ne bi približil šatoru kadi je bila bojna ojat. Njihove odore su bile jako lipo ocvitane. Veružnice i nadci su se svitlili i luštrali. Na plećih su svi jimili kabani ke su jih šćitile od jakoga slnca po dnevi i od mraza po noći.
90. Za razliku od prekrasnih odor i pozlaćenoga oružja i oklopi, su njihovi obrazi i ruke odavali, ne ozirajuć se na staros, bojovnike od obrti. Svi su bili puni posikotin i brazgotin, ke su se još jače isticale i kazale na mišićavih tilih.
91. Svi su se poredali i sili va kolo jedan kol drugoga. Svaki je pred sobu držal dlgi mač končar i na njega upiral duge, jake i kosmate ruke. Ojat je trajala par ur. On ki je jimil ča reć, je dvigal ruku i čekal kada mu je car dal sinjal. Najprije se je oglasil Kosiz veli uhodice. Ostočno je poručil o Momulih. Rekal je kadi su, ča delaju i koliko jih je.
92. Fanj dlgo je raspravjal o njihovoj jizdici. Opisival je njihovih zapovidnici, jizdici, oružje i fin na ki napadaju. Ustanovil je kako jih je kako plive i kako napadaju va obliku mlaja Miseca. „Njajjači su na krilih. Va sredini su običajno najmlaji bojovnici. Zada njih je pričuva, va koj su stari iskušeni bojovnici ki va divjen halopu, ne gjedajuć na svoje žrtve, zimeju, pogaze i skopićaju sve ča je pred njimi.
93. Boj pričnu zi turganjen strilic. Strijaju zi luša i kada zturgaju sve strile, vaje gredu va napad. Zi strašnimi kriki prestraše suvraga i onda ga posiču zi krivimi sabjami, ke su kovane, kako bi bile ča savitjivije, i po dvajset puti. Po svakon prekivanju su se kalile va pišaki od mladih kobil, a ondat zadnje tri puti va pišaki od mladih divojak.
94. Sabje su jin lahke, oštre i čvrste. Momulske konji su male, zdržjive i brze. Luši nimaju potkov. Kopita su jin tvrde i zdržjive. Momuli su strašno dobri jizdici. Jizde na konjih brez sedla. Svaki peja na povodcu još jenoga luša i zi jenoga konja na drugoga zajaše va trku i za vrime boja. Konji su navajene gazit i nisu niš strašjive.
95. Momuli nimaju bojnih sprav i stroji i zato teško osvojiju gradi i ograjene tabori. Najraje napadaju na bojnicu ka je va kretnji, aš ju prije leh se pripravi na obranu osabataju, zi grmećin napadon. Napadaju va obliku četrt miseca, ma to ni vavik pravilo.“
96. Svaki kosiz veli i svaki kosiz je jimil pravicu reć svoje, branit svoje mišjenje i se zanjega borit. Kada su svi finili svoje govori, je zel besidu car i rekal kako će bit. Rekal je: “Čul san vas i svih habal ča ste govorili i predlagali. Približno ste svi bili jako blizu jedan drugoga zi svojimi predlogi i saviti. Od seda pa naprid se jima habat samo moja bisida, aš korab zi dva korbana tone. Odlučil san i za moga zaminika klal kosiza veloga zi urinjskih stran. Svi ga dobro znate i znate da je više puti va boju zi Momuli premogal i potukal njihovih kani.“
97. Va znak odobravanja su svi lupnuli zi meči va branci. „Njegov zaminik će bit kosiz veli zi ishojskih stran, koga istešo svi dobro poznate i ki je vavik bil kurajan, ustrajan i sve svoje boji finil zi premoći nad dušmanon.
98. Svitujen van: Svi jimenujte svaki svoga zaminika in on opet svoga, aš se nikada va boju nena ki će poginut, a ki će ustat. Obvistite svakoga svoga časnika i svakoga svoga bojovnika kako se jima držat va boju i ki vas zaminjuje ako bi ki nedaj bože poginul. Pravite jin kakovoga suvraga jimamo pred sobu i čega se svaki mora držat kako bimo premogli .
99. Pregjedajte, bojne vozi, atalice, luši, oružje i bojne stroji. Bojne stroji postavite na mista kadi ćeju bit koristan i od kuda ćeju lagjan delat. Jutro ćemo na svitlac, zi brzin hodon, poć kuntra momulskin hordan. Sprida bojnice će bit kosiza ka će zi uhodicu bit dobran povezana i ka će branit bojnicu od nenadijanoga napada sprida.
100. Zi kanići i teklići će bit va svezi zi bojnu ojatju. Zi svake bande ćeju bit istešo kosize ke ćeju čuvat i branit bojnicu zi band. Istešo ćeju bit zi kanići i teklići va svezi zi bojnicu i bojnun ojatju.
101. Va zadadi će bit istešo kosiza, ka će nas čuvat od nenadijanoga napada odzada. Va bojnici ćeju bit kosize ke ćeju istešo jimit svoje spridnje i bočne straže.
102. Zi brzin hodon ćeju hodit kosiza za kosizu. Va sredici svake kosize će bit kosiz zi svojimi trobojnici, bojnici i vijornimi časnici.
103. Va sredici svih kosiz velih će bit car zi svojimi ojatnimi i vijornimi časnici. Za sredicu će bit vozi zi jizbinu, pričuvnin oružjen i ratnimi stroji, strilometi, stinometi, hitačami, pokrovatami, ajeri, mišinami i lenjamon za gradit mosti, splavi i ormanice za primostit potoki i rike.
104. Ondat će hodit efurica zi svojimi vozi i svu potribu. Efuri ćeju pomoć pri primošćivanju rik i vod. Za njimi ćeju bit poznova kosize i va zadadi stražarska koziza.
105. Kada pridemo na mirišće, ćeju uhodica i čelna kosiza ustat va sredici. Vele kosize zi bojnice ćeju poć prva na livu stran, druga na desnu stran, treća na livu, četrta na desnu, i tako sve do carskoga zdruga, ki će ustat va sredici.
106. Kosize za carskin zdrugon ćeju se istešo postrojit prva na livo, a druga na desno, tretja na livo i četrta na desno, ma ćeju ustat kako pričuva za prvimi kosizami. Zadada će ustat zada svih i čuvat hrbat bojnici.
107. Efurica će bit uz bojne stroji i pomagat strojnikon ča bude rabilo. Vaje ko se pride na bojišnicu, se mora prve redi utvrdit zi dunbokimi jarugami va kih se zabije zaoštrene kolci i priko njih klade trstiku, šmahje i slamu.
108. Za jarugami moraju bit va konalih suličari zi dlgimi sulicami. Zada njih neka se postroje strilci, a zada njih atalice i jizdica. Zada jizdice bojne stroji.
109. Pustite suvraga neka napade prvi. Na njegove strile, kih bude toliko da poškuri se nebo, pokrijte se zi branci. Kada prične dušmanov napad, vaje turgajte zi bojnimi stroji i zi tuču kamenja, huhji, koguli i praćka zaspite suvraga.
110. Strilci neka ondat šubito pričnu turgat svoje strile i kopjanici va kunicah neka čekaju momulsku jizdicu zi dlgimi kopji. Onih kih ne potuču stroji, strile i dlge sulice, neka čekaju bojne vozi, atali zi atalic i jizdica zi svojimi sulicami, oštrulci i oštrimi končari. Ako bi Momuli probili našu prvu bojišnicu, ondat neka vaje prične pričuvna kosiza boj i neka zapre škuju va naših redih.
111. Pazite se dušmanskih kril, va kih su postrojeni njihovi bojan kuhuri. Ako suvrag prične bižat, ne pustite svih bojnici va progon, leh odredite one satnije, bojne i trobojne jizdice neka jih goni, a drugi deli kosize neka ustanu na mistu va skopanih konalih i čekaju kako jih suvrag zi furbariju, lukavošću, ne iznenadi i potuče.
112. Za vrime brzoga hoda i premika neka uhodica proviri vodu i travu, aš ako nan zatrave vodu i travu, će nan poginut i zbolit živo i judi i suvrag će nas lahko osabatat. Va ta naminu neka jima uhodica žajne i lačne koze, i ako koze po pitju vode ustanu zdrave i žive, ondat more pit vodu i drugo živo i judi. Istešo je i zi travu.
MIRIŠĆE
113. Seda ćemo svi lipo popit žmuj vina na čast božice Aštur neka nan pomore premoć suvraga.“ Kada su svi jimili žmuji va rukah, su hlapci nalili vino, koga su na carev znak svi popili do polovice, a ondat ono ča je ustalo zlili priko ramena na tla, za premagu. Car jih je nato pozdravil i rekal neka gredu zi božju pomoću svaki va svoju kosizu.
114. Vozači su, kada su prišli kosizi va bojne vozi, potirali konji i zi kosizovin zdrugon kunpanjani partili va svoje ojati. Vijore na bojnih vozih i na sulicah jizdici kosizovih zdrugi su bile vezane da nebi loputale i vijorale i delale larmu.
115. Jutrin su već rano na svitlac sve postrojbe bile pripravjene. Na carski znak su pričeli zi brzin hodon. Postrojbe su hodile kako su se dogovorili bez larme i bez veloga škripanja i lupanja. Sva arma je bila pričvršćena i fermana. Sve kola su bila podmazana i sve na vozih poveženo. Prvi dan su pasali fanj vrst.
116. Put je bil miran i brez nenadijanih dogodki. Drugi dan kolo polne su prvoč vidili nikoliko brzih momulskih jizdici ki su va naglon halopu jizdili kuntra svojin postrojban. Pod večer su poznova va halopu i va oblaku prašine, zad bližnjih hlmci, bižali jurti momulskih jizdici. Nisu se obraćali niti su turgali kuntra čelnin postrojban. Kanići su obvistili cara o momulskin uhodan.
117. Car je naredil neka pod svaku cinu uhite par momulskih jizdici, kako bi ćapali zajik i čuli od njih koliko jih je i ča namiraju. Obećal je nagradu onomu ki jih ćapa i pripeja živih.
118. Kosiz uhodice je to rekal svojin uhodan. To su bili bojan bojnici ki su bili izbrani zi cile vojske i ki su pasali čuda boji i rati i vili kako i ča rabi udelat za ćapat zajik. Pred večer su uhode pripejali desetak prestrašenih mladih Momuli. Pali su va busiju ku su njin udelali uhode. Cilu noć su jih pitali i sprašuvali i na koncu nisu zvidili niš više leh ča su prije znali.
119. Tretji i četrti dan su pasali brez većih dešturbi. Peti dan zjutra, ko su se pričeli spravjat na put, se je zvidilo kako je krepalo više konji i kako su nike koze ke su pile vodu rigale i se napuhnule. Vaje su avizali svih neka konjen ne daju pit na vodah ke nisu sinjane. Bileh je bila kožica od janca na kolčiću. Na puti naprid se više ni niš dogodilo.
120. Predvečer su se fermali par mij pred suvragon. Šubito su se razporedili kako je bilo urdinano i prez počitka su pričeli kopat dunboke i široke jaruge, zabijat va nje kolci. Jaruge su pokrili zi trstičinu i nanju klali niš trave. Poslali su straže pred postrojbe, kopali konali va kih su bili kopjanici, zada njih strilnica i ondat jizdica i bojne stroji i se pripravjali za boj. Bojne stroji su složili i spravili skupa i jih provali kako delaju. Efuri su pomagali pri razmišćanju stroji, jiskali najpovojnije misto od kuda ćeju bit učinkovitni.
MOMULI
121. Sve jaruge su pokrili zi pleton od trstike i na nju nahitali niš zemjine i šmahja, da se jih nebi vidilo. Zjutra na svitlac su prvi momulski juti prišli va dotik zi satnijami čelne kosize. Jeni su na drugih turgali zi strilami, pritili i se rugali, ma ni prišlo do ozbilnijih bitak.
122. Kolo polne je bila jena ozbilnija bitka zi batijen momulskih jizdici. Napad je bil fanj jak. Naletili su na trobojnu čelne kosize, ka je bila postrojena i pripravjena sprida bojišne čarte.
123. Momuli su priletili na svojih brzih konjih, sturgali strile i va divjen galopu navalili na prvi bojni red carske trobojne. Va to vrime su zi stroji na njih hitili čudo istrilki kamenja, stril i barilčići zapajene smole. Skupa zi istrilki je strilnica sturgala strile.
124. Momuli su bili presenećeni zi toliko istrilki i stril. Oni ki su prišli do prvih čart, su naletili na dlge sulice i oštrulci ki su kosili i rečili njihove redi. Oni ki su ustali živi, su se na luših i hodeć, bižeć, tornali va svoj tabor. Oni ki su zgubili luši, su se dvizali na konji onih ki su jizdili i skupa jašuć koliko su mogli brže bižali kuntra svon taboru.
125. Večer je bila mirna. Po noći su se jeni i drugi provali probit va suprotni tabor, ma jin to ni uspilo. Ustanovili su kako su na jenoj i na drugoj strani iskusni bojovnici i kako će boj bit na živjenje i smrt. Kagan je večer pozval svih svojih kani. Posvitoval se je žnjimi kako i ča će ki udelat i kadi će ki bit za vrime napada.
126. Rekal jin je: „Pred nami je strašan dušman koga moremo premoć samo ako udela ku šabu. Budite kurajni i furbasti, lukavi, aš lukavost će van više pomoć leh kuraj. Zaludu ne zgubjajte kuhuri. Zjutra na zoru ćemo napas i pomoć će nan ishojsko Slnce, ko će zi svojimi zraki zaslipit carske postrojbe. Prva će napas sredica zi mlajimi neiskušanimi bojovniki, a ondat ćeju napas krila i tlić i stiskat suvragi na kup i tamo ćemo jih ondat osabatat.“
127. Kani su kratko ponovili svoje zadaće i brzo na konjih šli kuntra svojin postrojban. Jedan i drugi tabor je bil škur i brez larme. Zi jenoga i drugoga tabora se je čulo samo lajanje lovačin, hrzanje konji, blijenje lačnih i žejnih koz, njak tovari i čudno glasanje kamil ko je sličilo brunburanju vode va veloj pinjati na ognju.
128. Straže su šišno i mirno obahajale svoje položaji, pazeć da nebi ča spregjedali. Spregjedat je značilo poginut od suvragovoga noža ali bodeža i prepustit svojih subojovnici suvragu. Tu noć je redko ki bojovnik i kuhur spal. Časnici su na jenoj i drugoj strani va mislih pasivali bojišnicu i zamišjali razne prilike va kih bi se mogli nać va boju. Cesar se je istešo vrtil na svojen ležišću. Ni i ni mogal zaspat. Par puti je za čas zaspal, ma se je naglo zbudil misleć da čuje strašni momulski krik va napadu.
129. Prije svitlaca se je stal, prehodil po šatoru, naredil neka ga obuču va bojnu odoru i neka mu kladu nadac. Proval je meč ki mu je najboje odgovaral, pregjedal noži, oštrulci i pogladil timinac po čubranici. Naručil je naka se svi brzo priprave za napad. Svi kosizi veli i mali su već fanj vrimena bili pripravjeni. Njihove postrojbe su bile sve pod oružjen. Bojnici su bili zabavjeni zi čišćenjen i oštrenjen meči, noži, oštrulci, lopat i sulic. Pregjedivali su zaletnice i ubadci na strilah. gjedali veržaci i kraki na lukih i pregjedovali konjsku spravu, sedla, uzde, prsače, podrepnjaki i potrbušnjaki.
130. Bez larme va najvećen muku su svi šli svaki na svoje misto, čekali i kopali jame i prsobrani. Na ishoju se je pojavila zabela, za nju se je pojavil svitlac, koga je brzo zaminjala zora. Na nebu su se brzo minjale sve cviti i ocviti črnomodroga, plavkastoga, rumenkastoga, rumenoga, crjenoga i na kraju zlatnoga cvita.
BOJ
131. Prekrasne cviti i ocviti su se tako brzo minjale i lovile jedan drugoga. Cilo nebo je bilo jena lipa ravanica pod ku se ni moglo nunkis slutit ča se odvija. Kada su prve traci Slnca zasijale na gorećen nebu, je zi momulskoga tabora prijizdila rika jizdice. Stotisuće juskih i konjskih glav se je premikalo, migalo, dvizalo i kalivalo. Na mumenat se je momulska bojnica fermala, poravnala i va trapu prijizdila na strilomet .
132. Carska čelna kosiza se je brzo potegnula za svoju bojišnicu, kjekla va plitve konali i nad sebe dvignula branci. Momuli su na znak kani pričeli turgat strilice kuntra carskin postrojban. Nebo se je poškurilo od strilic. Strilice su tukle i zabijale se va branci, ki su zgjedali kako ježi puni badal. Zi druge bande su pričeli rigat svoje kamenje, huhji, koguli, praćki, zapajenu smolu va loncih, barilcih, žaricah i strile carske bojne stroji. Va isti čas je strilnica turgala svoje strile. Od silnih istrelki je nebo diventalo škuro. Prve satnije, bojne i trobojne su zi branci pokušale branit svoja tila od oštrih i zatravanih stril.
133. Momuli su zi strašnin krikon od koga su se tresle hlmi va nevijenon halopu zi golimi sabjami visoko nad glavami jurili kako maneni kuntra carskin postrojban. Luši su jin se blišćile od rose i pota po dlaki. Dlge grive su raspletene suškale kako svila. Topot kopit je odzvanjal kako kada tuku najveće bubnji. Iztrelki zi stroji, strile i praćki su delali svoje. Onamo su zadili konja, onamo jizdica, tamo je pal jedan, onamo drugi. Redi su postajale sve reje.
134. Poznova je prišal drugi val momulskih jizdici. Ov put se ni fermival niti turgal zi strilami, aš su se bojali zadit svojih. Va halopu su rušili sve pred sobu. Čuda jih je propalo va jaruge i konji i jizdici su se nabili na zakopane kolci. Bojne kunice kopjanikov su delale čuda va momulskih redih. Stroji i strilnica ka je jimila izvanredno moćne strile i dvojno savijene luki, je ridčila i do sedandeset paši pred sobu.
135. Poznova je prišlo do momulskoga napada i poznova je carska vojska zdržala. Car se je odlučil tirat momulske batiji ke su va neredu bižale nazad kuntra taboru prije leh su se poznova prestrojile. Njegov bojni voz i postrojba njegovih bojnih vozi, razporejena va tri kolone, je jurila kuntra Momulon i jih zi dvih stran obkoljivala. Njegov osobni zdrug je kako manen zjuril zi sugurnih bojnih čart na odprto poje. Za njimi je jurila jizdica spridnje čarte .
136. Suličari i strilnica je istešo mislila kako mora naprid i zapustila svoje mista zada jarug. Redi su se pomišale, više ni bilo urejene bojišnice. Od još pred par minuti urejene bojnice je nastal mišijot svih mogućih rodi. Gonili su Momuli, tirali jih, ubijali na trku, skakali va njihov tabor i pjaškali ki je ča mogal. Lovili su momulske konji, zimali luki i sabje od ubitih momulskih jizdici, sučevali z njih nadci i kalpače .
137. Rasula svoje vojske je zada jenoga bošca gjedal Kagan. Pomodril je ob bisa. Umiril se je. Popil niš kumisa zi mišine, pjunul kroz zubi i šapćuć jedva mičuć usnice rekal svojin kanon: „Sada je naše vrime. Ni nas čudo ustalo. Ono ča biži i tako ni više za niš. Slidite me.“ Na brzon lušu je va halopu obrnul tamo kadi je bil prekrasan carev bojni voz. Voz se je šajnal i blišćil na ishojskom slncu. Car va zlatnon nadcu je šajnal kako i zvizda Danica va škuroj noći.
138. Vijore na njegovon vozu i na sulicah njegovoga osobnoga zdruga su vijorale i banderale na vitru. Po svuda su bile vijore carskih kosiz. Kaganov zdrug, va kon su bili samo bojan bojovnici, je probijal put skroz raztrkane postrojbe carske vojske, ke su pijane od premage zgubile ćut za pirikul. Kagan se je našal na strilomet carskoga bojnoga voza. Svi njegovi bojnici su va hipu fermali svoje konji, nategnuli luki i strurgali tisuću stril kuntra samo jenoj turgi, caru.
139. Bojnici osobnoga zdruga kada su vidili ča se dogaja, su provali napad zaustavit, ma jin ni šlo za ruku. Cara je zadila teška strila skroz škuju za desnu ruku na nadcu. Strila je šla skrozi prsa i se fermala na livoj strani na nutarnjoj bandi nadca. Car se je ćapal za prsa zi livu ruku, a zi desnu za rukohvat na vozu. Oštrulači na njegovon bojnon vozu su ga ćapali i podprli. Čul je od dugoga krik: „Bahorca, bahorca ovamo, rabimo bahorca.“ Bahorac je sva va krvi prijizdil i se kalal va carski bojni voz, pogjedal ča se je dogodilo i rekal: „Ča će likar, koga će ličiti, kada ne more mrtvog uskrisiti?“
140. Niki od bojnici ki su bili va bižini su zableli : „Cara su zadinuli, car je ubijen!“ Kako oganj se je vist širila po cilon mirišću. Kagan se je brzo snašal, poslal kanići neka tornuju njegovih bižečih kuhuri i neka od njih na brzinu udelaju poznova postrojbe i neka navale na obezglavjenu carsku vojsku. Urinjski kosiz, ki bi bil moral zaminjat cara ako bi bil on ranjen, je i sam, zasičen od momulske ćorde, ležal va šatoru.
141. Ishojski kosiz je zi svojimi kosizi slavil i pil vino na slavu premoći i na čast božici Aštur. Kada su mu rekli ča se dogaja, je proval prezet kumandu va svoje ruke, ma mu ni šlo. Kosizi veli drugih kosiz, ki su doumili ča se dogaja, su pričeli spravjat svoje postrojbe, ma va općen metežu jin to ni uspivalo.
142. Kagan je dal naredbu neka svi njegovi kuhuri va halopu poznova napadu na cilo mirišće i neka posiku i pokoju sve ča se miče. Strogo je naredil neka nijedan ne zimje niš od suvraga, aš ako najde bilo ku, pa i najmanju stvar kol koga, će ga dat razčetverit zi konji. Momuli, ki su bili pred strašnin porazon, su se najedan put zbrali i pričeli svoj krvavi pir.
143. Carski bojovnici su se branili pojedinačno i va skupinah, ma nisu mogli odolit momulskin lušon i njihovin oštrin sabjan. Po mirišću je tekla krv, letile su glave, ruke i tula. Mišala su se pasja, konjska i juska tila. Momulski konji su bili zapinjeni i krvavi, jizdici potni, krvavi i trudni, ma nisu fermivali. Mahali su zi sabjami, naganjali luši i gazili sve ča se je micalo po mirišću.
SPOMINI
144. Car, zadit zi strilu, je pomalo zgubjal moć. Postajal je sve slabiji i slabiji. Najedan put mu se je pričelo odvijat pred oči sve njegovo živjenje. Letila je slika za sliku. Proval je to fermat, ma ni uspil. Najprije je vidil sebe kako malo dite. Kolo njega su bile dadije, divice, hlapci i njegova mat, ka je nad njih badrila kako sokolica nad sokolićen.
145. Sitil se je svojega ćaće, ki ga je pejal po žardinih i vrtih i mu pripovidal štorije i pravjal o njihovih pridnikih. Spomenul se je kada je prvi put zajahal konjića koga je otac pejal za povodac i kako su bili on i otac ponosni na to.
146. Pala mu je na pamet ženidba. Otac ga je zi šest lit oženil za dvanajs ali trinajs litnu pricezu. Po velon piru i slavju su on i žena šli plavat bročić va velu kamenicu zi ke se je polivalo vrti i žardini. Sitil se je kada je divental malo stariji i otac mu je dozvolil sidit na carskoj ojati. Preletilo ga je kako ga je učitej učil čarkat po zemjanih pločicah i štit načarkano.
147. Sitil se je smrti svoje matere. Pametil ju je na smrnoj postiji. Ležala je mirno. Blido lice je bilo obrubjeno zi serimi kudravimi vlasi. Na očih je jimila zlatne ekuli. Pune usnice su bile blede. Od vrata na doli je bila pokrijena zi bilin kako snig lancunon ki je visel sve do poda.
148. Nad glavu njoj je bila obišena na zlatnoj verugi carska kruna zi brojnimi dijamanti i biseri. Zi svake bande je bilo va kandelabrih šest vošćenih svić ke su pomalo gorile i jedva osvitjivale sobu va koj je ležala.
149. Kolo smrtne postije su kječale i molile za caričinu dušu nje družbenice i sluškinje. Po ciloj carskoj palači se je ćutil teški, malo slatkasti vonj po tamijanu i šipunovon uju. Prvi put je vidil suze va očih svoga oca. Činilo mu se je kako to ni moguće. Ni mogal zamislit kako tako odlučan, kurajan i tvrd muž more plakat. On i brat su bili njemi i nisu mogli nunkis plakat od tuge. Stisnuli su se va jedan kantun i mučali.
150. Nikoliko lit potlik je pametil smrt oca. Poznova je cila palača bila puna slatkastoga vonja po šipunovon uju i tamjanu. Ov put je shvatil kako je sada sam zi braton. Pogovoril se je zi bratom i sve su dogovorno učinili. Za sprovod se nisu morali skrbit aš to je sve učinel Alan, žric božice Aštur.
151. Sprovod je bil jako lip. Va bojni voz njegovoga oca je bilo zapreženo šest bojan črnih kako murva, luši va Carstvu. Na svih četirih kantunih četvorice su bile zatakjene sulice zi zlatnimi ubadci. Vijore na njih su bile kalane na pol kopjišća. Zi sve četire strani četvorice su bile zašćikane carske branci, ke su bile lipo ocvitane zi carskimi cviti.
152. Škrinja od ebanovine je bila otvorena, lipo oluštrana i šajnala se je kako Slnce. Znutra je bila obložena zi svilenu ponjavu njadoga cvita. Car je ležal va lipjan odori škrlatnoga cvita zi zlatnimi uresi i zlatnu zi dijamanti urešenu krunu. Na prsih je jimil carski mač zi zlanu ručicu i oluštranu mačnicu ka se je šajnala i malo potezala na modrasto. Na nogah je jimil črne oluštrane škornje zi zlatnimi ostrugami ke su bile pričvršćene na petah i priko stupala.
153. Spridnji dil kunica škoranj je bil okovan zi zlatnimi potkovicami ke su bile savijene kuntra zgoru i pokrivale dil naplati nad prstih. Sive vlasi je jimil spletene va kiku. Jake obrve su bile počešene kuntra čelu, a na očih je jimil zlatne šoldi, ke su držale klapnice kako se oči nebi otvorile za vrime sprovoda. Va drugon bojnon vozu je bil pokrov od škrinje na kon je pisalo zi zlatnimi čarkami: „Car Harezma, vojskovodja i vitez.“
154. Kolo pokrova je bilo njegovo oružje i dil konjske opreme. Zbande voza su jahali njegovi virni kosizi. Njihove luši odore i arma je bila očišćena, oluštrana, sva na svojen mistu i kazala je bojovnike od obrti. Na konjih su bile lipjan postijaki, pokrovci i zi bande su visile meči, palaši, strilnice i duplo savijene boguni. Svaki je va rukah ravno držal sulicu koj su pod bušcen bile črjene franže i na pol kopjišća kalana vijora. Tak kopjišća je bil naslonjen na nogu, ka je tvrdo stala va strimenu .
155. Dva konja zada je jahal on, princ i jutrašnji car. Bil je obučen va crnu odoru na koj su bile na ramenih zlatne cundre va kolu i obrubjivale rame. Na njidracu su bile popriko klajene zlatne trake ke su se zapućivale zi zlatnimi putci. Na bragešah je zi bande jimil crjeni trak va sredini razdijen zi zlatnin kordunon. Na nogah, ke su bile va zlatnih strimencih, je jimil crne mehke škornje zi zlatnimi ostrugami ke su sezale niš malo pod koleno.
156. Njegov črni luš je jimil spletenu grivu va kiku ka je mej uši finjevala zi dvi kikice ke su dopirale jušto do oči. Jimil je zlatnu oglavicu i zlatne uzde. Civi na nogah je jimil savijene zi zlatnin trakon. Kopita je jimil oluštrana i na njih su se vidili vrhi čavli zi kimi su bile začavlane potkove. Konj je, ponosno kriveć glavu va livu bandu i jako dvižuć noge, hodil po huću tamburi, ke su pratile, kumpanjale sprovod.
157. Zada njega je jizdila njegova supruga. Obučena je bila va široke brageše ke su bile pod kičicu vežene zi zlatnin kordunon. Brageše su bile istešo črne kako i prinčeva odora. Ozgora je jimila črni kaftan zi kapujaču ka je bila sprida pokrijena zi finimi čipkami kroz ke je ona mogla gjedat, ma nju ni mogal vidit nijedan. Jimila je istešo murvanca konja, ki je ponosito krivel vrat i držal glavu na jenu stran. Konj njoj je jimil lipo počešenu grivu na jenu bandu. Zlatna oglavica i zlatna uzda i pokrovac na zlatne i slebrne kvadrići su ga delale horavo lipoga.
158. Dva konja za nju je jizdil njegov rod va četiriredih. Svi su jimili istešo črne murvanci zi lipu slebrnu armu. Muški su bili va črnih odorah zi slebrnimi našitki, a ženske su bile, kako i princeza, va črnih hajah i pokrijene od nog do glave. Obrazi nisu jimile cele pokrijene, leh samo do nosa. Zada njih su šli njegovi hrvi, badovinci, čarki, davčari i poklisari.
159. Vaje sprida bojnoga voza su šli zi širokimi i teškimi handžari, va dvih redih, sandali. Obučeni su bili va bile haje i črjeni njidrac. Vlasi su jimili vežene va čuf i priko čela su jimili modre traki. Sprida njih su zi pokrijenimi glavami hodile va trih redih njegove hure, priležnice i haremske lipotice. Obučene su bile va kako snig bila odila. Glave su jimile pokrijene zi bilimi finimi čipkami.
160. Na nogah su jimile zlatne šandalice i svaka je va rukah nosila črjeni karoful. Sprida njih su hodili va četirih redih eunusi zi širokimi i teškimi handžari. Svi su jimili obritvane glave i priko čela vežen bili trak. Oni su bili obučeni va široke brageše vežene nad kičicu i va bilu kako snig stomanju. Priko stomanje su jimili modre njidraci obrubjene zi črjenu kurdelu .
161. Na čelu su bili žrici boga Hora i božice Aštur, obučeni va črjene haje, rakamane zi zlatnin koncen, na glavah su jimili zlatne mitre. Žrici su nosili kadilnice, sviće i žarice zi ujen. Zbande je šal njegov osobni zdrug na bojan konjih zi njegove carske štaje. Vijore na svih kopjih su bile kalane na pol kopjišća.
162. Konji va zapregi carskoga voza su jimili lipjan cinture i oglavice sve pozlaćene i na vrhu glave mej ušesi čubranice od pavanovih per. Hodile su visoko dvižuć noge i ponosito kažuć svoje čubranice.
163. Pomalo su hodili kuntra carevoj grobnici, ku su va živon kamiku sklesali sužnji pod kumandu žrici božice Aštur. Pokojni car ju je bil dva puta vidit kada je grobnica bila finjena i kada su zakopali njegovu ženu, caricu. Princ je bil va njoj samo kada su zakopali njegovu mater.
164. Grobnica je bila vela. Duga je bila deset paši, a široka šest. Na sredini je bil širok stol na koga su zi live bande klali njegovu mater, a desna je ustala za njegovoga oca. Grobnica je bila lipjan ukrašena zi zlatnimi i slebrnimi kipi i slikami. Kolo zidi su bile važi dišećega uja. Voltan štuk je bil urešen zi sliku Tigrisa po kon su plovile brodi i ribari lovili ribu. Priko svega je bil narisan zemjovid Harezma. Na podu su bile oluštrane mramorne ploče na kih su bile klesnjaci carevine i klesnjaci svih županij.
165. Zbande carske grobnice je bila još jena grobnica, ka je bila istešo dlga i na kraju je zi vrati bila povežena zi carsku grobnicu. Istešo je bila lipo ukrašena zi slebron i zlaton. Pod njoj je bil od finoga porculana, kako i zidi va carskoj grobnici, koga su pripejali zi Kine. Korak po korak, va huću bubnja, su se približevali grobnici. Kada su prišli do grobnice, su žrici odprli vrata, dvigli su carsku škrinju, njegovi su se zadnji put oprostili od oca, strica, ujca i zormana. Kosizi su zi velin štovanjen dvigli zi drugoga bojnoga voza pokrov od škrinje i žnjin pokrili carsku škrinju.
166. Šest kosizi velih je poneslo cara do vičnih počivalic. Nato su ponesli sve njegovo oružje i konjsku armu i nutar va grobnicu popejali njegovoga najdražega konja. Zatrumbitale su trumbete, rogi i sopile i zatamburale tamburi. Kada su ga položili, su zapivali elegiju, žalobnicu, i većan žric je prodikal o tomu ča je sve pokojni car učinel i kako je bil dobar za svoj narod.
167. Na zapajene bakje va železnih postavkih su hitili čudo tamijana, konju odsikli glavu i ga položili na trbuh zi savijenimi nogami i na podložen vrat obisili i zabili zi dlgu sulicu glavu probijenu po sredini čela. Nato su zaprli grobnicu.
168. Drugi žrici su za to vrime popejali sve haremske žene va drugu grobnicu. Tamo su zada zatvorenih vrat eunuhi posikli zi svojimi handžari svin glave na coku i jih položili sve na tla jenu do druge. Nato su žrici poubijali svih eunusi i sandali i jih položili mej obglavjene haremske žene i carsku grobnicu. Jedan od žrici je rekal neka budu uvik caru svi na uslugi kako ča su bili i dokjek su bili živi.
169. Posebni sluge su svin ki su bili na sprovodu natočili zi carskih konob najboje vino va žmuji. Kada su sve žmuji bile pune, su na znak princa i jutranjega cara, svi popili zamrlinu. Po zamrlini su svi zableli: „Slava caru, živil car!“ Nato su morali svi zapustit misto kadi je bila grobnica i tamo su ustali samo žrici božice Aštur.
170. Žrici su sami aržali grobnicu i ju čuvali tri miseci dokjek trava i posajeno drivje ni posve zaarbalo misto kadi je bila grobnica. Ki god je prišal blizu grobnice i bi ga bili žrici vidili, su ga ubili i zakopali dugo od grobnice. Na kraju su se žrici naputili va hramac božice Aštur, ki je bil blizu carske palače. Na carsku zapovid su jih va busiji čekale uhode i svih posikle. Tako više nijedan ni znal kadi je aržana carska grobnica. Na taj način su osigurali vični mir i pokoj caru i carici.
171. Na sprovod su prišli svi njegovi kosizi, trobojnici bojnici i čuda poklisari zi tujih držav. Oni su prnesli dari, zlato, svilu, drago kamenje luši i kamile. Sve to su donali novomu caru. Svi su hvalili mudro vladanje njegovoga oca i njemu govorili neka se ravna po njemu.
172. Jimil je dvajset lit kada je sil na pristoje. Bil je mlad, jak, lip i pametan i pričel je vladat kako je on hotil. Svačiju je habal, ma delal je kako je mislil da je najboje. Carstvo je podilili na više pokrajin. Va pokrajinah su vladali va njegovo jime župani veli. Vojnu svlast su jimili kosizi veli.
173. Davak se je stikal va njegove badovine. Nad blagon je badril badovinac, ki je bil odgovoran za svaki šold. Pametil je obrazi nikih župani velih ki su ga provali prevarit kada jih je pozval pred sebe i hladnokrvno jin rekal kako ćeju bit ubijeni.
BRAT
174. Njegov mlaji brat mu je pomagal ča god je rabilo. On je bil jako lipi čovik, dobar bojovnik i lovac. Kada god je mogal, je hodil va lov na tigra va sorinjskih i na medvida i divjega baka va urinjskih bandah. Zi lova se je vavik tornjival zi pjenon. Njegovi prijateji ki su hodili šnjin va lov su govorili kako je jako kurajan i kako puno rišća va lovu.
175. Jedan put se je pojavil blizu carske palače jedan veli tigar ki je ubijal živo po pojih i drmunih. Judi su hodili i pravjali ča je sve ubil i razderal. Jedan dan je prišal carski lušar i rekal kako je vidil na svoje oči kako njin je tigar zaklal tri lipjan kobile zi carske ergele. Princ je prišal bratu i rekal neka mu dovoli ubit tu zvir ka ne rešpeta niti carskih kobil. Car se je nasmel i rekal neka gre, ma neka se pazi.
176. Spravil je bojan lovci i podvečer šal šnjimi na lov. Po noći su gorili oganj i pomalo pijuć prebadrili noć. Zjutra su se raztrkali po pojih i drmunih. Stabelili su ki vidi slid ali tigra neka javi zi rogon. Cilo jutro su hodili i od nikuda ni bilo glasa. Kolo polne su se poznova svi zbrali na dogovorenon mistu, vezali konji i legli va hlad.
177. Podvečer su poznova šli po dva skupa svaki na svoju stran. Sve do zahoja ni bilo znaka. Pred sam zahoj se je čul rog zi trstike blizu Tigrisa. Svi su pognali konji kuntra rožanju. Kada su prišli blizu, su vidili va blatu blizu vode vele capata od tigra. Pomalo pazeć i gazeć po bjuzgavon blatu su šli po slidu. Pasali su fanj prostora i tigra nisu našli. Slid se je najedan put zgubila. Odlučili su blizu toga mista čekat. Konji su vezali za sulice. Legli su na raztegnjene kože i svake dvi ure minjali stražu. Pasala je noć. Svi su se stali, oprali i uredili i pričeli jiskat tigra.
178. Hodili su pomalo, zi čin manje šušura. Konji su poslali zada i jih čuvali. Hodeć desetak koraci jedan zbande drugoga su pomalo napridovali skroz visoku travu, trstiku i paver. Svi su jimili va rukah luki zi strilu pripravjenu za turganje. Kaučina kolo Tigrisa je bila gusta i puna kumarci, kjišćari i svake šorte kačak. Svako nikoliko vrimena bi se bila oglasila i zakrejutala prestrašena tica.
179. Svi su vaje stali i pripravili strile. Tigra ni i ni bilo. Trudni, pojideni od kumarci su se maknuli od kaučine i se poznova našli na jednon brižiću na kon je rasal jako veli bor i pod kin je bil jako lipi hlad. Seli su, napili se šerbeta i pojili niš land kruha i fetic sira, pazeć kako ne bi bili presiti i polegali po kožah. Još nisu niti zaspali, su čuli dva puta kratko rožanje .
180. Skočili su na noge i, čilo kako i da nisu cilo jutro hodili i jiskali, šli kuntra rožanju. Princ je bil prvi. Kada su prišli blizu mista od kuda su rožali, su vidili na jenon drvu prestrašena falašića ki su kazali kuntra čridu ovac ko je bilo sve krvavo i ovce su ležale porašobrtane naokolo po drmunu. Falaši su kazali kuntra jenomu busu i tvrdili kako je tigar va njemu.
181. Princ je zi nategnjenin lukon i zi tešku strilu korak za korakon hodil prignjeno kuntra grmu. Kada je prišal četire ali pet paši od grma, se je va grmu niš premaknulo. Veli tigar je čučnul, nategnul sve mišići, stisnul uši kuntra glavi nazad, sva je postal kako jena zategnjena šušta. Va mahnuće oka je va luku skočil kuntra princu. Princ je sturgal tešku strilu. Tigar je po zraku letil kuntra njemu. Strila i tigar su se trefili va zraku. Čul se je tup tofac. Tigar je letil naprid i pal na princa.
182. Čulo se je lomjenje kosti i škrtanje zubi. Drugi lovci su se fermali i pustili luki, Svaki je zi golin mačen šal kuntra tigru. Princ je bil posve pokrijen pod velin tigron. Prvi ki je prišal do tigra je vanjega zabil mač do ručice. Pritekli su i drugi. Kolo tigra i pod tigron je bilo sve krvavo. Tigra su obrnuli i pod njin vidili mrtvoga princa. Jimil je prekinjen vrat i prekinjenu desnu ruku.
183. Tigru je teška stril bila zadinjena va livu stran prs. Zeli su nož i po strili otvorili prsa. Strila je tigra zadinula drito va srce, ma jistešo je jimil još toliko force koliko mu je rabilo za ubit princa. Zarožali su va rog i pozvali lušari neka pripejaju konji. Dvi sulice su klali jenu kraj druge, preškujali volovske kože na rubih i skrozi škuje klali kopjišća od sulic. Nato su položili mrtvoga princa i kopjišća vezali dvin konjen na sedla.
184. Princ je ležal zi nogami kuntra guzici spridnjega luša. Oči su mu pokrili zi dva ekula. Mrtvoga princa su pripejali va carski dvor. Car ni mogal virovat ča se je dogodilo. Princ mu je bil desna ruka i va sven mu je pomagal i čudo puti jako dobro svitoval. Princa su zi svu častju zakopali i žalovali za njin po običaju tri dni.
185. Sprelitilo ga je kada je kako devanajst litni dičak bil prvi put zi žensku. Bila je to jedna od sužanj ka je delala va njihovih žardinih. Činilo mu se je da ga i seda ćapuju srhi va huću ke su se širile od spodnjega dila trbuha priko želuca va prsa i va glavu. Spreletivali su ga žmarci i ta općutak ga je potlik pratil cilo živjenje. Svaki put kada je pomislil i bil zi žensku, su ga spreletivali žmarci va huću ki su postajali sve gušći i na kraju finili zi općutkon slabosti i lažve.
186. Spominjal se je prvoga puta kad je bil zi caricu. Ona je bila starija i njemu se je činilo da ni dala svega od sebe kako bi ga zadovojila. Ni bilo onoga savijanja tila, puzenja i premikanja ko je općutil kada je bil zi robinju. Ona se je kako beštran savijala kolo njega, jubila ga, grickala, lizala i na kraju grizla. Sraz njihovih til je bil kako kada se va neviri tuču oblaci, savijaju i vrte va vrtjajih jedan kolo drugoga, minjaju cviti i ocviti od siline sraza, lupaju strile i vitar pometa po pokrajini.
187. Pred oči mu je bilo kada se je rodil prvi sin. Bil je strašno vesel i ponosan. Svi su mu čestitali. Utruka je zasul zi dari. Ča god mu je prnesal, mu se ni činilo dovoj dobro za njegovoga sina. Dite je bilo jako lipo, živo i veselo. Mat ga je sama dojila i tendila. Ni otila dat nijenoj dadiji prit blizu. Po rojstvu dideta su se nikako zbližili. Brzo za prvin je prišlo drugo, a ondat i treće dite. Po trećen ditetu mu se je žena nikako otujila. Skrbela je samo za dicu. Njega skoro ni više gjedala.
188. Tada je prvi put našal priležnicu. Bila je mlada, lipa i podatna. Ugajala mu je koliko god je mogla. Noći šnju su bile kako pisma. Potlik trudnoga državnoga dela bi bil šal va njene odaje. Tamo su pili, pivali, pogovarali se o sven i svačen i na kraju su finili va postiji, kadi je njegova priležnica bila nenadmašiva.
189. Davala mu je sve moguće užitki. Žmarci bi ga bili prelitili samo ko je pomislil na nju. Više puti je zatekal sebe kako sred najburnijih debat i odluk misli na nje okrugle sise, sulito tilo, dlge z veludastu kožu pokrijene noge i na zi dlakami obrubjeno mejnožje ko se je, posuto zi blišćivimi kapjicami, crjenilo i zvalo na milovanje.
190. Va jenon bojnon pohodu su mu pripejali desetak sužanj. Sve su bile lipe kako rožice. Pripejal jih je va dvor i tako je pričel nabirat svoj harem. Svaka od njegovih hur i priležnic je bila drugčija. Minjal jih je svaku noć. Svaka ga je na svoj mod usrićila i mu dala sve od sebe ča je mogla. Neridko je istu noć spal zi pet ali šest odalisk.
191. Kada god je prišal va harem, je bil dobro došal. Na mig suhitane, ka je skrbela za harem, sve hurije, priležnice, odaliske, eunuhi i sandali su dvorane pretvarali va najlipje pozornice. Odaliske su pivale uz citre i harfe, tancale trbušne tanci. Koprene i tančice su lepršile kolo mladih, sulitih, jedrih i lipo rašćenih til. Dojke su jin bile napete, tvrde i pružne, trbuhi čvrsti, a zadnjice pune, nabijene.
192. Hodile su zavijajuć i tresuć zi dojkami, zadnjicami i bedrami i jebizovno lizale usnice i zrele krušve ali praskve zi vlažnimi zajičići. Duge noge i veludasta koža na bedrih je bila privlačna i čas skrivala a čas odkrivala ženske draži. Po dvorani se je širil miris ambre, tamjana, šipuna, anisa, nevena, limuna, mošuša i amarilisa. Znal je kako je to pripravjeno njemu na čas i kako samo mora mignut zi prston i dobit će sve ča bude otil.
193. Noći su bile burne, pune putenosti i zore nezaboravne. Spominjal se je prvoga puta, a to se je dogodilo samo od sebe, najedan put, bez mislit, gjedal je prestavu ku su delali eunuhi skupa zi njegovimi odaliskami. Zbande njega je bila jedna od njegovih hurij. Va ciloj dvorani je bilo na pol škuro, gorilo je samo niš malo svić i ujenic. Dvorana je bila puna tihe glazbe, dišala je po ambri, mošušu i po mladih ženskih tilih.
194. Hurija mu se je koštala z boka i ga pričela dotikat zi bosu nogu. Kada je vidila da se on ne protivi, je nogu dvignula do bedre i šnju nježno pasivala po njegovoj bedri. Položil joj je ruku na rame i ju pričel gladit. Pomalo njoj je sukal njidrac, ondat svilenu hajicu i potegnul suknju i suknjicu.
195. Ni znal kako se je našal na njoj. Kuševal joj je sise i mejsisje. Ona se je uvijala kako grun po kajiću i dotikala ga nježno po cilon tilu. Njegova sprav je bila nategnjena i sve više se je šnju stružval bo nje bedrih. Ona se je pomakla i va svoju ženskost prijela njegov ražaren samac. Pričela skucat i cvilit. Savijala je noge kolo njegovih boci. Tresla se je i dvizala zadnjicu va huću zi njegovimi moti. Ni vidil niš kolo sebe.
196. Činilo mu se je kako su samo oni dva na svitu i kako je važno samo njihovo uživanje i njihov sraz. Druge hure, priležnice i odaliske su, videć par va srazu, i same željne jubavi pričele gladit najprije svoje ruke, ondat sise, pa boci i na kraju bedre i finile na svojoj ženskosti. Cila je dvorana bila va dunbokon transu, pomami i žeji za užitki. Nike od starijih žen su potegnula va jigru i eunuhi ki su jin milovali sise, lizali bedre, mejnožje i jih trli po zadnjici. Cila dvorana je skucala i cvilila.
197. Zbande njega je bila druga priležnica, ka ga je gladila po škini i zadnjici i teplila sebe taruć bedre. Općutil je krčevit ruk va dolinjen dilu trbuha. Nato su slidile sve gušće i gušće krči va huću i na kraju je zi krikon pal zbande hure ka je savijala tilo noge i ruke i koj se je trbuh va huću dvizal i kalival još fanj vrimena, dokjek ni doživila micul. Cila dvorana je vonjala po izlučkih madih ženskih til i dražila njegove nosnice.
198. Jako brzo se je opomogal i poznova pričel jubit svoju huru, ka se je brzo odzvala i poznova su pričeli jubavni tanac, sraz, milovanje i divji huć jubavi. Cila dvorana, va koj je bilo više od sat žen, je to z gušton ponavjala, škrtala zi zubi, cvilila i skucala i duboto va jisti mumenat ostala ležat isčrpana, na svilenih bijačinah, kanapih i bijcih .
199. Legal se je na kanape i gjedal ča se dogaja kolo njega. Jedna od njegovih odalisk ga je pričela trt. Nježno ga je gladila po vratu, zi palci mej lopaticami i pritiskala žunte i mišićne skupine. Zi dva prsta je pasivala uz njegovu kraježnicu, pritiskala priko lopatic i lebrnih mišic. Pritisnula je ovdi i ondi, trla je ruke i noge i poznova se tornala na vrat.
200. On je gjedal hure, odaliske i druge haremske žene kako su jena drugu kuševale, nježno pipale i milovale po sisah, bedrah i ritnicah, lizale i sisale jena drugoj trbuh i samičicu, dokjek nisu doživile micul. Micul po užitku je bil toliko jak i svi su mislili samo na to ča više uživat i ča kašnje doživit micul. Cila dvorana je bila va jenon samon gibu, obraćanju i zdihu.
201. Prvi put je vidil i doživil ženske ke su stremile po zadovojstvu i ispunjenju svojih žej, ke nisu kako stroji delale ono ča drugi od njih zahtiva. Bile su juska bića ka su kako i judi želela, strimila i uživala. Micul jih je gnal kako najveća sila i ni više bilo srama ali kajanja za ono ča su delale. Najedan put je leteće slike prekinulo blišćeće svitlo i nezaboravna milodija. Svitlo i milodija su bili sve jači i jači, svitliji i ugodniji i najedan put je diventalo škuro.
PORAZ
202. Kolo carskoga bojnoga voza se je zi divovskin kurajen boril osobni zdrug. Kosiz veli osobnoga zdruga je bil svuda. Posikal je ovoga, udril onoga, pomogal kadi su popušćali i letil od jenoga kraja na drugi. Luš mu je bil sva va pini i krvi. Momuli su pritiskali i pomalo jenoga po jenega ubijali njegovih bojovnici. Kagan je to gjedal zi strane i naredil neka napad prestane. Pozval je kosiza veloga neka pošaje dva časnika na pregovori.
203. Kada su prišli kaganu, jin je kagan rekal neka carski voz, mrtvoga cara i svojih mrtvih zemu i neka gredu kamo ćeju. Rekal je kako to dela zato aš još takovih bojovnici ni vidil. Njegovi Momuli su, doduše, jako kurajni, bojeviti i ne cejuju zlahka, ma ča takovoga do seda još ni vidil.
204. Pital ga je od koga je naroda i kamo će poć. Kosiz mu je odgovoril da je Hrvuat i kako je carska kosiza je bila sastavjena od samih Hrvuati. Sada kada više nimaju gospodara, ćeju se tornat va svoju zemju i provat živit od onoga ča jimaju.
205. Kagan je zapital jenoga od bojovniki: „Ča pomeni to Hrvuat?“ Bojovnik mu je odgovoril da se pod tin misli na kurajnoga, poštenoga, zdržjivoga, delavnoga, bistroga i pametnoga čovika. Kagan je rekal san zasebe: „To san i vidil.“
206. Koziz je zapovidil svojin trubentačen neka zatrunbitaju zbor. Kagan je naredil svojin Momulon neka jih puste na miru i neka se deštakaju od mirišća. Koziz je zabil vijoru va zemju. Kalal vijore na carskon i svojen bojnon vozu na polovicu sulic. Suličaron je naredil nega zavežu svoje plamenci na kopjih. Svi živi bojovnici su se va jenu uru zbrali kolo kosiza veloga i carskoga bojnoga voza va kon je ležal mrt car.
207. Pomalo su, niki na bojnih vozih, atalicah i na luših, a drugi podupiruć se na mači, oštrulci, prekinjene sulice i držeć se za konjske postijaki i armu, hodili kuntra carskoj palači. Prije tako ponosna, dobro armana, naoružana izučena bojnica, je seda zi banderami na pol kopja, sva rasparana, ziranjena, pretučena i zimučena, hodela potežuć noge kuntra carskoj palači. Kagan je držal besidu. Pustil jih je na miru.
208. Kada su prišli pred carsku palaču, su cara zi svu častju zakopali. Ni bilo vrimena za ga popejat va carsku grobnicu, za ku nisu točno ni znali kadi je, aš su ju žrici po sprovodu cara dobro hranili, a i sami su potlik bili ubiti i tako tajnu zeli sobu va grob. Sve njegove odaliske, hure, priležnice i eunuhi su zi odsičenimi glavami bili položene va grob zi jene i druge bande njega. Njegovoga konja su istešo ubili i ga položili sprida cara va grob. Žena i dica, ki su već bili fanj veli, su zi kosizon osobnoga zdruga i osobnin zdrugon, boje rečeno zi onin ča je od njega usatalo, šli va zemju Hrvuatov ali va Hrvuati.
209. Jedan od zormani pokojnoga cara je ustal i pričel kolo sebe zbirat bojovnici. Pomalo su napadali Momuli, kadi god su mogl. Jimili su tatiku: napadi, unišći i biž. Kolo toga zormana se je zbiralo sve više bojovnici. Kada jih je bilo dosti, su napali sve momulske postrojbe i jih zignali zi Harezma. Obnovili su Harezm. Harezm je bil vela država. Momuli su ju poznova osvojili va deveton ali deseton viku po Kristu, od tada mu više ni glasa.